“Qafqazın Xirosiması” adlandırılan Ağdamın erməni vandalizmindən azad edilməsi dövlətimizin qüdrətini göstərir - RƏY

“Ötən ilin noyabrın 20-də Ağdamın, eləcə də sonrakı vaxtlarda Laçın və Kəlbəcər rayonlarının heç bir şəhid vermədən işğaldan azad edilməsi Azərbaycanın siyasi və diplomatik gücünün göstəricisidir. Ermənistan dövlət başçısı, müzəfər Ali Baş Komandan İlham Əliyevin apardığı məqsədyönlü və düzgün siyasəti nəticəsində ərazi və əhalicə böyük olan 3 rayonu təslim etməyə məcbur oldu. Həmçinin həmin rayonlarda, xüsusilə də Ağdamda düşmənin güclü müdafiə istehkamları yaradılmışdı. Düşmənin məcburiyyət qarşısında qalaraq Ağdamı boşaltması Azərbaycanın döyüş meydanında olduğu kimi, siyasi müstəvidə də güclü olduğunun bariz nümunəsidir”.

Bunu Pravda.az-a açıqlamasında Milli Məclisin deputatı Elman Məmmədov deyib.

Parlament üzvü bildirib ki, Ermənistan həmin rayonları Azərbaycana özbaşına təhvil verməyib: “Düşmən Vətən müharibəsi gedişində Azərbaycan ordusunun apardığı hərbi əməliyyatların gücünü gördü və çox ağır itkilərə məruz qaldı. Ermənistan həm çox sayda canlı qüvvə, həm də hərbi texnika itirirdi. Nəhayət, düşmən tərəf ölçüb-biçdi və Azərbaycanın rəşadətli ordusu qarşısında tab gətirə bilməyəcəyini başa düşdü. Davam edəcəyi halda daha çox itgiyə məruz qalacağını duyan Ermənistan məblubiyyətini etiraf etməyə məcbur oldu. Azərbaycanın güclü, tələblərimizin haqlı və ədalətli, həmçinin beynəlxalq hüququn bizim tərəfimizdə olmadığı təqdirdə biz bu uğuru, əlbəttə ki, əldə edə bilməzdik. Prezident İlham Əliyev müharibə dövründə təkcə döyüş meydanında deyil, siyasət, diplomatiya və informasiya müharibəsi meydanında da qətiyyətlə mübarizə aparırdı. Bunlar hər biri böyük gücə çevrilmişdi və düşmən bu gücün qarşısında aciz olduğunu qəbul etməli idi. Nəticədə, Azərbaycanın 3 böyük rayonu düşmən işğalından güllə atılmadan azad edildi. Müharibədən sonra şahidi olduq ki, düşmən Ağdamda bir neçə zolaqdan ibarət müdafiə sədləri yaradıbmış. Həmçinin, Kəlbəcər və Laçın rayonlarının coğrafi şəraiti, relyefi müharibə üçün uyğun deyil. Yəni, qış aylarında dağlıq ərazilərdə döyüşmək olduqca çətindir. Həmin 3 rayonun siyasi müstəvidə həll olunmadan hərbi yolla düşməndən azad edilməsi nəticəsində Azərbaycan tərəfi daha çox şəhid verə bilərdi. Cənab Prezidentin apardığı çox uğurlu siyasət Azərbaycanın bu qələbəsini şərtləndirdi”.

E.Məmmədov, həmçinin Ağdam rayonunun post-müharibə dövründəki inkişafından da bəhs edib. Bildirib ki, Ağdam rayonu da işğaldan azad edilən digər bölgələr kimi əvvəlki şöhrətini bərpa edəcək: “Ermənistan tərəfindən tamamilə darmadağın edilmiş, “Qafqazın Xirosiması” adlandırılan Ağdamın erməni vandalizmindən azad edilməsi dövlətimizin gücünü və qüdrətini bir daha sübut edir”.

Nəzrin Cavid

Tarix: 18 Noyabr 2021, 15:10

Xəbər lenti