Azərbaycan nə etməlidir?

Azərbaycan nəhayətdə öz müttəfiqlərini müəyyən etməli və BMT qarşısında artıq durmadan, israrla Ermənistanla sülh müqaviləsi bağlanmasını və Ermənistanın Azərbaycanın ərazi bütövlüyünü, suverenliyini tanıması ilə bağlı qarşılıqlı surətdə ortaya sənəd qoymalıdır. Bu olmayacağı təqdirdə Azərbaycan nəhayətdə dünyaya və diplomatik korpusa sübut etməlidir ki, Ermənistan revanşa hazırlaşır. O cümlədən bu məsələdə maraqlı olan tərəflər də hüquqi nəticələrə deyil, siyasi nəticələrə söykənmək istəyirlər. Bu konfliktin siyasi nəticəsi növbəti müharibədir. Bunun yalnız hüququ nəticəsi Cənubi Qafqazda sülhü və əmin-amanlığı gətirə bilər.

Hüquqi nəticələr BMT - nin Azərbaycanın tanıdığı ərazi bütövlüyüdür və bu ərazi bütövlüyü çərçivəsində də Azərbaycanın suveren hüquqlarının bərpasıdır. Çox təəssüflər olsun ki, ATƏT - in Minsk qrupu çərçivəsində də, digər birliklər çərçivəsində də tərəflər Azərbaycanın ərazi bütövlüyünü uzun illər tanısa da hüquqi deyil, siyasi həllə üstünlük verdikləri üçün 44 günlük savaş çıxdı. İndi də hüquqi deyil, siyasi həllə üstünlük verəcəklərsə, yenidən savaşın olması qaçılmaz olacaq. Ermənistanın Azərbaycanın ərazi bütövlüyünü tanımaması və sülh müqaviləsi imzalamaması onun göstəricisi olacaq ki, Ermənistan optimal vaxt və ya hansısa tərəflərdən demarş gözləyir ki, nə zaman ona yardım edəcəklərsə, müharibəyə başlasın. Azərbaycan bu sənədləri ortaya qoyduqdan sonra əgər yenə də tərəflər öz mövqelərindən çəkilməzsə, Azərbaycan düşünmədən Azərbaycan və Ermənistan arasında sərhəd çəkməlidir. Belə ki, dəmir-beton sədlər çəkilməlidir və Ermənistanla bütün əlaqələrin kəsilməsi üçün dünya ölkələrinə də müraciət etməlidir. Bu, Ümid Partiyasının mövqeyi və təklifidir. Biz bu təklifi 9-dan 10-a keçən gecə saziş imzalanandan həmən sonra vermişdik. (Bəs Göyçə, İrəvan deyənlər, qarşımızda dayanan öncəlik işğaldan azad etdiyimiz ərazilərdə möhkəmlənməkdir)

Beləliklə:

1. Ermənistanla sülh müqaviləsi imzalanmalı;

2. Qarabağ və ətraf rayonların problemi hüquqi müstəvidə həllini tapmalıdır;

3. Beton istehkamlar çəkilməlidir

Azərbaycan özünü sığortalamaq üçün altbazanı hazırlayaraq, təklif etdiyimiz 3 bəndi həyata keçirməlidir.

Türkiyə, İsrail, Ukrayna, Pakistan bu istiqamətdə Azərbaycanın ən yaxın müttəfiqləri olmalıdır. Bu coğrafiyanı genişləndirmək də olar. Çini, Gürcüstanı, separatizmdən əziyyət çəkən digər postsovet ölkələri ilə danışıqlar aparmaq mümkündür, - Moldovanı da əlavə etmək olar, - Qazaxıstan və türkdilli dövlətlərlə və s.

Beləliklə də Rusiyanın söykəndiyi postsovet məkanında Ermənistanı və Rusiyanı təkləmək siyasəti həyata keçirə bilərik.

Ardınca sərhədlərimizi beton istehkamlarla möhkəmlətməklə dünyaya, Ermənistana və Rusiyaya da mesaj verməliyik ki, biz torpağımızın bir qarışını da kimsəyə verməyəcəyik.

Təəssüflər olsun ki, hakimiyyət bilərək vətəndaşın başını sosial problemlərlə qarışdırır ki, o, siyasi hüququnu unutsun və beləliklə də anlamır ki, cəmiyyət daxilində Qarabağla bağlı düşüncələrdə parçalanma yaradır.

Ən utancverici hal da bu ki, ölkədə özünü rəy adamı olaraq təqdim edənlər belə bu məsələlərə ironiya ilə yanaşır. Kütləni maarifləndirək deyərkən belələri kütlələşir malesef... Nə üçün? Bir quru "like" xətrinə.

Düşünün bir...

Tamilla Qulami

Ümid Partiyasının sədr müavini

Tarix: 20 Noyabr 2021, 21:09

Xəbər lenti