“Türkiyədə hakimiyyət dəyişsə belə, Azərbaycanla münasibətlərə ciddi təsir göstərə bilməz” - RƏY

“Türkiyə Yaxın Şərq və Ərəb coğrafiyasında, Cənubi Afrika, Əfqanıstan, Somali, Qətər və nəhayət, Qafqazda özünü regional güc kimi təsdiq edib. Bütün dünya ölkələrinin liderləri Türkiyəyə münasibətlərindən asılı olmayaraq hörmətlə yanaşırlar. Həmçinin Rəcəb Tayyib Ərdoğan əvvəlki iqtidarlarla müqayisədə Azərbaycanla daha yaxın siyasət yürütməyə başladı. İndi isə xüsusilə xarici qüvvələrin təsiri altında Türkiyədə fəaliyyət göstərənlər hakimiyyəti dəyişməyə, parlamentli respublika yaratmaq istəyirlər. Həmçinin belə qüvvələrin niyyəti Türkiyəni Qərbin vassalına çevirməkdir. Təbii ki, Türkiyənin inkişafı dünyanın bir çox güclərini narahat edir. Lakin bu, Azərbaycan-Türkiyə münasbətlərinə mənfi təsir göstərmir, çünki iki dövlət arasında əlaqələr çox güclüdür. Nəzərə almaq lazımdır ki, Azərbaycanla Türkiyənin ortaq strateji maraqları var və hər iki ölkə Türk dünyasının böyüməsində, habelə əlaqələrin getdikcə güclənməsində, iqtisadi imkanların uyğunlaşdırılmasında maraqlıdır”.

Bunu Pravda.az-a açıqlaamasında Milli Məclisin deputatı Nəsib Məhəməliyev deyib.

N.Məhəməliyev bildirib ki, Türkiyənin daxili ictimai-siyasi proseslərində ədalətlilik prinsipi kifayət qədər qorunur: “2003-cü ildən etibarən təkbaşına iqtidarda olmuş Ədalət və İnkişaf Partiyası və lideri Rəcəb Tayyib Ərdoğanın Türkiyənin iqtisadi-siyasi və hərbi baxımdan güclənməsi üçün rolu böyükdür. Cənab Ərdoğanın hakimiyyətə gəlməsinə qədər Türkiyədə müxtəlif koalision hökumətlər fəaliyyət göstərib, Türkiyə dövləti və xalqı heç vaxt öz haqlarını indiki kimi müdafiə etməyib. Daha çox NATO sistemində və Qərb siyasətinin tərkib hissəsi kimi Türkiyə, əsasən, regional məsələlərin həllində istifadə edilib, yəni, Türkiyəyə seçim imkanı tanınmayıb. Ərdoğanın rəhbərliyi ilə isə Türkiyə çox böyük iqtisadi inkişafa nail olub, eyni zamanda NATO-da ABŞ-dan sonra çoxsaylı və ciddi döyüş qabiliyyətli orduya sahib olan ikinci dövlətdir”.

N.Məhəməliyevin sözlərinə görə, Türk dünyası əməkdaşlıq nəticəsində qlobal gücə çevrilməkdədir: “Bu, əlbəttə ki, həm Türkiyənin, həm də Azəbaycan dövlətinin marağındadır. Mən inanıram və ümid edirəm ki, 2023-cü ildə Türkiyədə keçiriləcək prezident seçkilərində Rəcəb Tayyib Ərdoğan qalib gələcək. Arzu edirəm ki, cənab Ərdoğan indiki siyasətini davam etdirər. Ümumiyyətlə, Türk və İslam dünyasının maraqlarına xidmət edən Rəcəb Tayyib Ərdoğan kimi liderin hakimiyyətdə qalması yaxşı olardı. Nəzərə almaq lazımdır ki, onun şəxsiyyətinə münasibətlərindən asılı olmayaraq, hər kəs Ərdoğana hörmətlə yanaşır və onunla hesablaşmağa məcburdurlar. Unutmaq olmaz ki, Türkiyə Prezidentinin xüsusilə terrorizmlə mübarizəsi dövlətin daxili və xarici siyasətində ciddi əhəmiyyətə malikdir və bu siyasət davam etdirilməlidir”.

Deputat, həmçinin qeyd edib ki, Türkiyədə xarici qüvvələrə xidmət edən siyasi partiyaların mövcudluğu təəssüf doğurur: “Lakin hakimiyyət dəyişdiyi halda belə, bu, Azərbaycan-Türkiyə münasibətlərinə ciddi təsir göstərə bilməz. Dövlətlər arasındakı münasibətlərin strateji əsasları var. İki dövlətin münasibətləri iki millətin təbii maraqlarını özündə əks etdirir. Yəni, siyasi hakimiyyətdə kimin olmasından asılı olmayaq, bu dövlətlər arasındakı təbii bağlılıq münasibətlərin yalnız inkişaf edən xətt üzrə dəyişməsinə səbəb ola bilər”.

Nəzrin Cavid

Tarix: 22 Noyabr 2021, 15:46

Xəbər lenti