“Azərbaycan istənilən vaxt öz ərazilərində anti-terror əməliyyatları keçirməyə hazırdır və buna qadirdir” - RƏY

“Nikol Paşinyanın son bəyanatları Ermənistanın təxribatçı mövqeyini bir daha nümayiş etdirdi. Noyabrın 26-na planlaşdırılan üçtərəfli görüşdən əvvəl Ermənistanın bu cür mövqe sərgiləməsi onun müəyyən Qərb dairələrindən dəstək aldığını sübut edir. Bu münasibət ötən ilin noyabrın 10-da və bu ilin yanvarın 11-də imzalanmış üştərəfli bəyanatlara uyğun deyil. Görünür ki, Ermənistan öhdəliyinə düşən məsələlərdən qaçmaq niyyətindədir, eyni zamanda mövcud sənədlərin bir sıra bəndlərinin icrasını gecikdirməyə və imitasiya etməyə çalışır”.

Bu fikirləri Pravda.az-a açıqlamasında Milli Məclisin deputatı Cavid Osmanov Ermənistanın baş naziri Nikol Paşinyanın noyabrın 23-də Azərbaycan əleyhinə çıxışları barədə danışarkən deyib.

Deputat qeyd edib ki, Ermənistan Azərbaycanın 44 günlük Vətən müharibəsində onların başını əzdiyini, diz çökdürərək kapitulyası aktını imzalamağa məcbur etdiyini yaxşı bilir: “Bu ilin noyabrın 16-da Azərbaycan-Ermənistan sərhədində düşmən tərəfindən törədilmiş hərbi cinayətlərin qarşısı da Azərbaycan ordusu tərəfindən qətiyyətlə alındı. Bu uğuru Vətən müharibəsindəki şanlı Zəfərin davamı kimi qiymətləndirmək olar. Ermənistan nəticə çıxarmalıdır ki, Azərbaycan güclü və qüdrətli dövlətdir, məhz ona görə də Azərbaycanla təxribat dili ilə danışmaq mümkün deyil. Nikol Paşinyan görüşdən əvvəl belə bəyanatlar verməklə Ermənistanın mövqeyini bəlli edir. Ermənistan müəyyən siyasi dairələrdən özünə arxa-dayaq taparaq indiki vəziyyəti olduğu kimi saxlamaq istəyir, lakin bu, onlar üçün çox ağır başa gələ bilər. Azərbaycan istənilən vaxt öz ərazilərində anti-terror əməliyyatları keçirməyə hazırdır və buna qadirdir. Həmçinin Rusiya Prezidenti Vladimir Putin də üçtərəfli bəyanatın imzalanmasından sonra bildirmişdi ki, Ermənistanın həmin sənədin müddəalarının icra etməməsi özünüqəsd ola bilər. Belə davam edəcəyi halda, Ermənistanın “dəmir yumruğ”u başının üzərində görməsi ehtimalı artır. Hesab edirəm ki, Ermənistan “dəmir yumruq”la növbəti dəfə qarşılarsa, onun sonrakı vəziyyəti daha ağır və rəzil ola bilər”.

Parlamentin üzvü vurğulayıb ki, Soçi görüşü Ermənistana verilən son şans kimi dəyərləndirilə bilər: “Ermənistan əgər düzgün nəticə çıxarmayacaqsa, bu, ona baha başa gələ bilər. Ermənistan Vətən müharibəsindən əvvəl ona xəbərdarlıq edildiyini heçə sayaraq Azərbaycana qarşı genişmiqyaslı hərbi əməliyyatlara başladığını unutmasın. Ondan sonra Ermənistanın üzləşdiyi ağır vəziyyət “unutqanlığının” nəticəsi idi. Təsadüfi deyil ki, Ermənistan bu günə kimi də rəzil durumdadır. Bu baxımdan, Ermənistana verilən son şansdan - Soçi görüşündən düzgün nəticə çıxarmalıdır”.

Nəzrin Cavid

Tarix: 25 Noyabr 2021, 12:12

Xəbər lenti