"Prezident İlham Əliyevin rəhbərliyi ilə Azərbaycan yeni reallıqlar yaradıb, bundan İran da faydalana biləcək" - RƏY

"Azəbaycan bir çox beynəlxalq təşkilatların, o cümlədən İqtisadi Əməkdaşlıq Təşkilatının fəal üzvüdür. Ümumiyyətlə, Azərbaycanın İqtisadi Əməkdaşlıq Təşkilatına üzv olan ölkələrə münasibəti dostluq və qarşılıqlı hörmətə əsaslanır. Prezident İlham Əliyevin həyata keçirdiyi beynəlxalq siyasət özündə səmərəli əməkdaşlığı ehtiva edir. Noyabrın 28-də İqtisadi Əməkdaşlıq Təşkilatının zirvə toplantısında bir daha sübut etdik ki, biz bütün dövlətlər, eləcə də üzvü olduğumuz təşkilatlardakı dövlətlərlə qarşılıqlı dostluq və qardaşlığa söykənən münasibətlərin tərəfdarıyıq və münasibətlərin hər zaman yüksələn xətlə inkişafında maraqlıyıq. Aşqabadda keçirilən 15-ci zirvə toplantısında Prezident İlham Əliyev bir çox ölkələrin rəhbərləri ilə ikitərəfli görüşlər keçirdi və hər bir görüşdə dövlət başçıları Azərbaycanı 44 günlük Vətən müharibəsindəki Zəfərinə görə təbrik etdilər, hər biri bizim uğurumuza sevindiklərini dilə gətirdilər. Görüşlərdən biri də İran Prezidenti Seyid İbrahim Rəisi ilə baş tutdu və nəticədə indiyə qədər müəmmalı qalan bir çox suallara aydınlıq gətirdi".

Bunu Pravda.az-a açıqlamasında Milli Məclisin deputatı Vüqar İskəndərov noyabrın 28-də İqtisadi Əməkdaşlıq Təşkilatının Aşqabadda keçirilən XV Zirvə toplantısı, Azərbaycan və İran siyasi liderlərinin görüşü barədə danışarkən deyib.

Parlament üzvü bildirib ki, İranın siyasi rəhbərliyi ən yaxın qonşu olan Azərbaycanla münasibətləri yüksək səviyyəyə çatdırmağın əhəmiyyətini anlayır: "Çünki Azərbaycan Ermənistanı çıxmaq şərtilə qonşu dövlətlərlə sıx əlaqələr saxlayıb və bunun strateji dostluğa çevrilməsi üçün əlindən gələni edib. O cümlədən Azərbaycanla İran arasında da müəyyən sual yaradan münasibətlər olsa da, bu, ciddi dostluq və əməkdaşlığa söykənib. Sonuncu görüş zamanı İranın siyasi liderinin Azərbaycanın qələbəsi ilə bağlı xoş fikirlər səsləndirməsi, Zəfərimizi bütün regionun uğuru kimi qeyd etməsi və indiyə qədərki münasibətlərdə də İranın hər zaman işğalı pislədiyini və Azərbaycanın suverenliyinin bərpasını istədiyini deməsi sevindirici haldır. Doğrudan da, Prezident, Ali Baş Komandan İlham Əliyevin rəhbərliyi altında Azərbaycan regionda yeni reallıqlar yaradıb ki, bu reallıqlardan İran da faydalana biləcək. Prezident İlham Əliyev bunu öz fikirlərində qeyd etdi və söylədi ki, İranla bizi birləşdirən dəyərlər çoxdur. Bunlara din, qonşuluq, tarixi keçmiş kimi faktorlar daxildir. Qısacası, Aşqabadda keçirilən sammitin Azərbaycan üçün kifayət qədər uğurlu nəticələndiyini söyləmək mümkündür, dövlətimiz zirvə toplantısından böyük uğurlarla ayrıldı. Bir sıra prezidentlərlə görüşlərdə Azərbaycanın haqq işinin dəstəkləndiyini gördük. Ümumiyyətlə, Azərbaycanın Zəfəri onun dünyadakı siyasi çəkisini artırır. Biz inamla söyləyə bilərik ki, dövlətimiz dünyada çəkisi olan, nüfuzlu ölkələrdən biridir".

Nəzrin Cavid

Tarix: 30 Noyabr 2021, 11:39

Xəbər lenti