"Brüssel görüşlərini Azərbaycanın növbəti diplomatik uğuru hesab etmək olar" - RƏY

“Brüssel görüşlərini Azərbaycanın növbəti diplomatik uğuru hesab etmək olar. Azərbaycan həmişə olduğu kimi haqlı və ədalətli, eyni zamanda beynəlxalq münasibətlərə uyğun mövqeyini Brüssel görüşlərində də sərgilədi. Azərbaycanın məlum məsələ ilə bağlı mövqeyi onsuz da dəyişməzdir. Dövlətimizin müharibə zamanı, habelə post-müharibə dövründəki mövqeyi cənab Prezident tərəfindən hər zaman bəyan edilib. Biz Cənubi Qafqazda Azərbaycanla Ermənistan, o cümlədən digər dövlətlər arasında dayanıqlı sülh və əməkdaşlığın olmasının tərəfdarıyıq”.

Bunu Pravda.az-a açıqlamasında Milli Məclisin deputatı Elman Məmmədov Brüsseldə Avropa İttifaqı Şurasının Prezidenti Şarl Mişel, Azərbaycan Prezidenti İlham Əliyev və Ermənistanın Baş naziri Nikol Paşinyan arasında keçirilən görüş barədə danışarkən deyib.

Parlament üzvü bildirib ki, Azərbaycan dövlətlərarası münasibətlərin mehriban qonşuluq zəminində inkişaf etməsini istəyir: “2020-cu ilin noyabrın 10-da, 2021-ci ilində yanvarın 11-də, noyabrın 26-dakı Soçi görüşündə, eyni zamanda Brüssel görüşlərində də Azərbaycanın mövqeyi eyni olub. Biz qalib gəlmişik, torpaqlarımızı işğaldan azad etmişik. İndi isə müharibə səhifəsini çevirərək sülhdən, əməkdaşlıqdan və mehrinan qonşuluqdan danışmaq niyyətindəyik. Bu, haqlı və ədalətli mövqedir. Brüssel görüşündə mövqeyimizin beynəlxalq təşkilatlar tərəfindən də bəyənildiyi məlum oldu. Azərbaycan və Ermənistanın sərhədinin delimitasiyası və demarkasiyası məsələsi, Zəngəzur dəhlizi, nəqliyyat xəttlərinin açılması və yaradılması, müxtəlif istiqamətli əməkdaşlıqlar müzakirə edilib. Təbii ki, sağlam düşüncəli siyasi rəhbər və beynəlxalq qurumlar belə mövqeyin əleyhinə çıxmazlar, çünki həmin mövqe müharibə və işğalçılığa xidmət etmir. Bu, Azərbaycanın humanizm prinsiplərinə sadiqliyinə və sülhpərvərliyinə işarədir. Ermənistan Azərbaycanın mövqeyi qarşısında heç nə deyə bilməz”.

E.Məmmədov, həmçinin qeyd edib ki, Brüssel görüşünü əvvəlki üçtərəfli görüşlərin davamı kimi qəbul etmək olar: “Brüssel görüşlərində Azərbaycan Prezidenti İlham Əliyev və Avropa İttifaqının Prezidenti Şarl Mişel tərəfindən səsləndirilən bütün fikirlər Soçi görüşündəki fikirlərin, belə demək mümkündürsə, təkrarı idi. Yəni, Brüsseldə Rusiyanın əleyhinə olan, onun xoşuna gəlməyəcək heç bir fikir səsləndirilmədi. Görüşlərin məqsədi müxtəlif danışıqların aparılması nəticəsində müəyyən razılaşmaların əldə olunmasıdır. Bölgədə dayanıqlı sülhün təmin olunması və müharibə ritorikasından uzaqlaşmaq da hədəf seçilib. Bu, həm Azərbaycanın, həm də Ermənistanın xeyrinədir, eyni zamanda bölgə dövlətlərinə də faydalıdır”.

Nəzrin Cavid

Tarix: 15 Dekabr 2021, 17:02

Xəbər lenti