Ağasif Şakiroğlu: “Siyasi xadimləri aşağılamağa çalışırlar, “avtobus müxalifəti” adlandırırlar...”

“Bir qrup qaragüruh var ki, dünəndən etibarən Prezident İlham Əliyevin 60 illik yubileyi ilə bağlı təbrik məktubu ünvanlamış müxalifət liderlərini hədəf seçiblər. Öz aləmlərində qara yaxmağa, ictimai rəy formalaşdırmağa çalışırlar. Ölkə başçısını təbrik etmiş sayılıb-seçilən ictimai-siyasi xadimləri olmayan ağılları ilə aşağılamağa çalışırlar, “avtobus müxalifəti” adlandırırlar. Yazılanları oxuyaraq qaragüruh dəstəyə, sadəcə, acıyıram...”

Bunu Pravda.az-a açıqlamasında Gələcək Azərbaycan Partiyasının sədri Ağasif Şakiroğlu deyib.

A.Şakiroğlunun sözlərinə görə, ömürlərini qeybət, şantaj, söyüş, təhqir və boş boğazlıq üzərində qurmuş bu dəstə anlamır ki, onların “formalaşdırdığı ictimai rəy” özlərini simulizasiya etdikləri sosial şəbəkənin məlum seqmentindən kənara çıxmır: “Xalq üçün bu siyasi riyakarların və siyasət alverçilərinin fikirləri, “formalaşdırdıqları ictimai” rəy maraqsızdır. Real həyatla simulizasiyalı həyatları arasında fərqi duymayan, Azərbaycan xalqının hər bir nümayəndəsinin öz çevrələrində olduğu kimi qara düşüncəli insanlardan ibarət olduğunu zənn edən bu siyasətbazlar anlaya bilmirlər ki, dar düşüncələri və dar çevrələri ilə elə ömürlərinin sonuna qədər qaragüruh müxalifət cinahında qalacaqlar. Və bu kafa ilə heç bir zaman nəinki iqtidar, heç müxalifət düşərgəsində iqtidar olmağı bacarmayacaqlar… Bu tip insanlar nəyi qəbul edə bilmir, bilirsinizmi? Ölkədə sağlam müxalifət-iqtidar münasibətlərini! Onlara iqtidar-müxalifət münasibətlərində sağlam əlaqələr lazım deyil. Və ya lazımdır, amma istəkləri iqtidarın siyasi partiya olaraq bir tək onlarla münasibət qurmasından, görüşlər keçirməsindən, dialoq aparmasından ibarətdir. Məqsəd də bəlidir: İqtidarla rahat və şahidsiz alver edə bilsinlər. Necə ki, 1995-ci ildə, 2000-ci ildə və 2005-ci ildə bu alverləri ediblər!”

Partiya sədri qeyd edib ki, alverçilər üçün siyasət iqtidarı Qərblə şantaj etmək və bu yolla iqtidardan nəsə qoparmaqdan başqa bir şey deyil: “Bu qaragüruh istəmir ki, Azərbaycanda siyasi qüvvələr arasında qardaş Türkiyə modeli münasibətlər formalaşsın. Necə ki, formalaşıb! Bu qaragüruh anlamır və ya anlamaq istəmir ki, Prezident tərəfindən nəzakət göstərilərək müxalifət liderlərinə zəng edilərək müxtəlif bayramlarda bayram münasibətilə, eyni zamanda yubileyləri olmuş müxalifət liderlərinə yubileyləri münasibətilə edilmiş təbriklər ənənəsini mövcud iqtidar formaşdırmış və müxalifət liderləri tərəfindən də qarşılıq alıb. Bu yeni və sağlam iqtidar-müxalifət münasibətlərini qorumaq və inkişaf etdirmək hər bir siyasi liderin amalı olmalıdır. Dövlətini, xalqını sevən hər bir lider üçün siyasi proseslərdə sağlam ənənələrin formalaşması prioritet olmalıdır. Bu qaragüruhun prioriteti isə nəzakətdən, siyasi etikadan çox uzaqdır. Apardıqları söyüş, təhqir siyasətinin və hikkənin içində batan və günbəgün cəmiyyət tərəfindən “iqnor” edilmiş bu siyasət alverçiləri bunu konpensasiya etmək üçün digər sağlam mövqe sərgiləmiş müxalifət liderlərini “qaralamaq”, “təhqir etdirmək” və ən aşağı səviyyəyə enərək küçə adamları kimi söydürməklə, sadəcə, özlərinə təskinlik tapmış olurlar… Tanrı hidayət versin…”

Həmid

Tarix: 25 Dekabr 2021, 22:57

Xəbər lenti