İlham Əliyevlə xalqın birliyi özünü Vətən Müharibəsində göstərdi...

Azərbaycanda dekabrın 31-ni yeni təqvim ilinin bayram axşamı kimi təmtəraqla qeyd edirlər. Həmin gün baş verən hadisə onun mahiyyətini artırdı. 1989-cu ilin bu günü baş verən sərhəd hərəkatı bayram axşamını Milli Bayrama qədər ucaltdı. Bayramın tarixindən. Dekabrın 31-də xalqın iradəsininin ifadəsi olaraq Azərbaycanın cənubu ilə şimalı arasında humanitar, mədəni, iqtisadi və qohumluq əlaqələrini bərpa etmək məqsədilə sərhəd çəpərləri götürülüb və mühəndis-texniki qurğuları sökülüb.

O zaman Sovet İttifaqı Kommunist Partiyasının, Azərbaycan Kommunist Partiyasının mərkəzi komitələri, partiyanın yerli orqanları, SSRİ sərhəd qoşunlarının rəhbərliyi buna mane olmaq üçün bütün siyasi və hərbi təsir vasitələrinə əl atdılar. Həmin vaxt Azərbaycanda “Sərhəd hərəkatı” adı altında bir sıra siyasi aksiyalar həyata keçirildi. İlk dəfə Arazın o tayında, bu tayındakı qohumların, həmvətənlərin ünsiyyət imkanları yarandı, sadələşdirilmiş keçid məntəqələri təşkil edildi. Həmin gün Dünya Azərbaycanlılarının Həmrəyliyi bayramına çevrildi, 1990-cı ildə isə həmin günün ildönümü ölkənin bütün yerlərində qeyri-rəsmi bayram kimi geniş qeyd olundu.

Ötən illər ərzində bu hərəkatla bağlı müxtəlif fikirlər səslənib. Bu ümumxalq hərəkatına imperiya mövqeyindən yanaşan SSRİ-nin və Azərbaycanın kommunist rəhbərliyi, hərbi dairələri qara yaxmağa başladılar. Bununla da Azərbaycan milli azadlıq hərəkatını gözdən salmaq, onun hədəflərini arxa plana salmağa çalışdırlar. Hərəkatı bölüb, parçalamağa, cəmiyyətin birliyini pozmağa cəhd göstərdilər. Ancaq belə yalanları, böhtanları dünya və Azərbaycan ictimaiyyəti qəbul etmədi. Çünki Azərbaycanın həm də Güney və Quzeyə bölünməsi də tarxi ədalətsizlik olduğu sirr deyildi. Hərəkat isə bu kimi ədalətsizliklərə etiraz idi. Ermənilərin dəstəklənməsi, onların Azərbaycana qarşı günü-gündən azğınlaşan davranışı, Moskvanın təzyiqi, represiya və təqiblərinə qarşı bu hərəkat yarandı. Bu həm də beynəlxalq ictimaiyyətin diqqətinin Azərbaycana yönəltmək üçün zəruri idi.

1990-cı ilin noyabr ayının 3-də Türkiyədə keçirilən Birinci Millətlərarası Azərbaycan dərnəkləri qurultayı isə Naxçıvan Muxtar Respublikasından başlanmış sərhəd hərəkatının real davamı kimi milli birlik və həmrəylik yolunda atılan daha bir mühüm addım oldu. Noyabr ayının 5-də qurultayın qəbul etdiyi qərarda 31 dekabr gününün hər il geniş qeyd edilməsi zərurəti irəli sürüldü. 1991-ci il dekabrın 16-da Naxçıvan Muxtar Respublikası Ali Məclisinin sədri Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-i tarixini Dünya Azərbaycanlılarının Həmrəylik Günü elan etdi.

Bu barədə Naxçıvan Muxtar Respublikasının Ali Məclisi 6 bənddən ibarət qərar qəbul etdi. Bununla da 31 Dekabr ilk dəfə olaraq rəsmi bayram olaraq qeyd olunmağa başladı.

Bu günün tarixi, maddi, mədəni, iqtisadi, siyasi və mənəvi önəmi sonrakı dövrlərdə daha da aydınlaşdı.

İkinci ildir ki, dünya azərbaycanlıları bu bayramı torpaqları işğaldan azad edilən Azərbaycanda qeyd edirlər. Həmrəyiliyin, birliyin gücünü 44 günlük müharibə zamanı Azərbaycan vətəndaşları bir daha təsdiqlədi. 1989-cu ilin bu günü respublika rəhbərliyi ilə xalq arasında uçurum var idi. Çünki o vaxtkı hakimiyyət Moskvaya xidmət edirdi. 30 ildir, Azərbaycan müstəqilliyini bərpa edib.

Dövlət başçısı İlham Əliyevlə xalqın birliyi özünü Vətən Müharibəsində göstərdi. Bu əzəmət qarşısında Azərbaycana qarşı olan heç bir qüvvə tab gətirə bilmədi. 1989-cu ildəki güc, birlik, həmrəylik Azərbaycan dövlət müstəqilliyini, 2020-ci ildəki milli birlik isə suveren respublikanın ərazi bütövlüyünü bərpa etdi.

Milli həmrəylik Azərbaycan xalqının milli hədəflərinin bünövrəsi də sayıla bilər.

Odur ki, 31 Dekabr Dünya azərbaycanlılarının və Azərbaycanı sevən hər kəsin bayramıdır.

Bayramımız mübarək!

“Pravda.az”-ın analitik qrupu

Tarix: 31 Dekabr 2021, 07:50

Xəbər lenti