Deputat: “Onlar daha yaxşı olardı ki, Fransada yaşayan ermənilərə ən ali formada muxtariyyət verilməsi məsələsini həll etsinlər”

“Fransanın Avropa və xarici işlər üzrə naziri Jan İv Lö Drianın 18 yanvar tarixində Milli Assambleyada verdiyi açıqlama əsla diplomata yaraşmayan haldır. Bu açıqlaması ilə Jan İv Lö Drian həmçinin beynəlxalq hüquqa məhəl qoymadığını da sərgiləmiş olub. Diplomatik prinsipləri kobud formada pozan bu açıqlama eyni zamanda Fransanın bəzi hökumət və parlament nümayəndələrinin cinayət tərkibli əməllərini pərdələmək məqsədi daşıyır”.

Bunu Pravda.az-a açıqlamasında Azərbaycan Milli Məclisinin deputatı Cavid Osmanov bildirib.

Deputatın sözlərinə görə, Milli Assambleyada Erik Siotti adlı birinin təxribatçı çıxışına şəraitin yaradılması və başqa bir ölkənin prezidentinin ünvanına heç bir əxlaqa yaraşmayan ifadələrin işlədilməsi ilk növbədə elə Fransanın nüfuzuna xələl gətirmiş olur: “Ayrı-ayrı ölkələrə demokratiyadan və “ali dəyərlər”dən dərs keçməyə çalışan Fransa hökuməti bu kimi hallarla özünü ifşa edir. Fransa hökuməti 44 günlük Vətən müharibəsi və ondan sonrakı dövrdə işğalçı Ermənistanın tərəfində olduğunu açıq formada nümayiş etdirmiş və bu ölkənin Parlamentinin hər iki palatası Ermənistanın özünün belə tanımadığı qondarma qurumu tanımağa çağıran sənədlər qəbul etmişdir. Bu cür hallar Fransa hökuməti tərəfindən pislənməli və aradan qaldırılmalı olduğu halda, əksinə onlar bu təxribatları dəstəkləyir və ört-basdır etməyə çalışırlar. Fransada keçiriləcək prezident seçkilərində namizəd olan Valeri Pekressin Azərbaycanın Qarabağ bölgəsinə qanunsuz səfəri Fransada yaşayan erməni seçiciləri cəlb etmək məqsədi daşıyır. Ölkəmizin ərazi bütövlüyü və suverenliyinə qarşı olan bu cür etinasız münasibət qəbuledilməz haldır. Azərbaycan Respublikasının Prezidenti cənab İlham Əliyevin bu məsələ ilə əlaqədar öz haqlı mövqeyini bildirməsi və sərt reaksiyanın verilməsi təbii haldır. Nazir Lö Drianın hökumət nümayəndəsi olaraq bu cür bəyanat səsləndirməsi, digər ölkənin dövlət başçısının açıqlamasının əsassız və kobud şəkildə şərh edilməsi eyni zamanda öz hökumət başçısının apardığı siyasətə qarşıdır. Bir halda ki, Fransa Prezidenti Emmanuel Makronun təşəbbüsü ilə 2021-ci il dekabrın 15-də Brüsseldə Azərbaycan Respublikasının Prezidenti İlham Əliyev ilə konstruktiv görüş keçirilmişdir. Fransalı nazirin bu cür cəhdləri təkcə Azərbaycanla münasibətlərə zərbə vurmur, həmçinin Qafqaz regionunda sabitlik və inkişafa da mane olmağa xidmət edir. Odur ki, bu sərsəm bəyanatına görə Fransanın Avropa və xarici işlər üzrə naziri Jan İv Lö Drian Azərbaycan Prezidentindən üzr istəməli və diplomata yaraşmayan açıqlamasını təkzib etməlidir. Fransada keçiriləcək növbəti prezident seçkilərində prezidentlik iddiasında olan Valeri Pekress və onun hökumətində vəzifə almaq hərisliyi ilə özünü erməni sevgisindən “məcnun” kimi aparan Jan İv Lö Drian və Erik Siotti kimilər daha yaxşı olardı ki, Fransada yaşayan ermənilərə ən ali formada muxtariyyət və ya müstəqillik verilməsi məsələsini də gec qalmadan həll etsinlər”.

Tarix: 20 Yanvar 2022, 12:45

Xəbər lenti