"Təəssüf edirəm ki, Akademiya prezidenti vəzifəsində olan şəxs bu qədər cılızlığa əl ataraq, təkcə məni deyil, digər deputatları da təhqir etdi. Ramiz Mehdiyevin səviyyəsinə enmək istəmirəm, amma bəzi gerçəklikləri söyləməyi vacib hesab edirəm. Mən Ramiz Mehdiyevi istefaya çağıran AMEA-nın həqiqi və müxbir üzvləri arasında ilk şəxsəm. Öz yazımda Ramiz Mehdiyevin şəxsiyyətinə qətiyyən toxunmamışam. AMEA-dakı problemləri, gənclərin elmdən getməsini, doktorantura və dissertanturaya yerlərin boş qalmasını, əlaqələndirmə şuralarını ləğv edib, öz əlində cəmləşdirib, adamlarını yığmasını, institutların hesabatına institut rəhbərlərinin çağırılmamasını akademiyada yaratdığı intriqa, dedi-qodu mühitini demişəm. Bundan da çıxış yolu kimi Ramiz Mehdiyevi istefaya səsləndirmişəm".

Bunu Pravda.az-a açıqlamasında Milli Məclisin deputatı, Azərbaycan Milli Elmlər Akademiyasının (AMEA) müxbir üzvü Musa Qasımlı deyib.

Deputat bildirib ki, akademiyada nəsillər arasında əlaqələrin qırıldığını nəzərə alsaq, deməli, bi bir neçə il sonra Azərbaycan elminin tamamilə məhvini görə bilərik: "Bu iradlarının cavabında görün, Ramiz Mehdiyev nə yazır?! Yazır ki, guya mən Musa Qasımlı zamanında Ramiz Mehdiyevin kitab təqdimatlarında onun ünvanına, kitablarına təriflər demişəm. Hörmətli oxucular üçün aydınlıq gətirirəm: 2006-cı ildə Ulu Öndər haqqında kitabım nəşriyyata gedərkən Ramiz Mehdiyev mənə zəng etdi. Dedilər, Ramiz Mehdiyev sizin kitabınıza elmi məsləhətçi olmaq istəyir. Mən o zaman Bakı Dövlət Universitetində sadə professor idim. Ramiz Mehdiyev isə Prezident Administrasiyasının rəhbəri və akademik idi. Soruşuram, mənmi Ramiz Mehdiyevdən xahiş etdim, yoxsa o məndən? Mən indiyə qədər Ramiz Mehdiyevin heç bir kitabında rəyçi olmamışam. O, öz xahişi ilə mənim həmin kitabıma elmi məsləhətçi olub. Ramiz Mehdiyevin kitablarının təqdimatında onun tutduğu siyahı ilə çıxışlar olub. Mən istəsəm belə onun kitablarının təqdimatında çıxış edə bilməzdim. Ramiz Mehdiyev mənim çıxış etməyimi özü istəyib. Mən çıxışlarımın, yazdığım yazıların arxasında dayanıram. Ramiz Mehdiyevi dövlətin adamı olaraq qəbul etmişəm və heç vaxt bəlli çərçivələri keçməmişəm. Ramiz Mehdiyev məni əqidə yoldaşlarımdan asanlıqla imtina etməkdə suçlayıb. İndiyə qədər yalnız bir partiyanın – Müsavat Partiyasının üzvü olmuşam. 2003-cü ilin oktyabrında qarma-qarışıqlığa, anarxiyaya, xaosa etiraz olaraq istefa vermişəm. Bu gün də ölkədə xaos, anarxiya və qarışıqlığın əleyhinəyəm. Ramiz Mehdiyev nə istəyirdi? İstəyirdi ki, xaos, anarxiya davam etsin? Bu özünə dövlət adamı deyən bir şəxsə yaraşmır. Mən soruşuram, Ramiz Mehdiyev Kommunist partiyasının üzvü olub, oradan çıxıb? O çıxmamışdan əvvəl Əbdürrəhman Vəzirov Azərbaycana gələndə, oxumamışam, görməmişəm, amma deyirlər, Ramiz Mehdiyev Heydər Əliyevin əleyhinə məqalələr yazıb. Yalnız Əbdürrəhman Vəzirov onu azad edəndən sonra mövqeyi dəyişib. Nə üçün ən çətin anlarda “91-lər”in cərgəsində olmadı? Yeni Azərbaycan Partiyasının sıralarına niyə qoşulmadı? Ramiz Mehdiyev məni cildi dəyişməkdə, şəxsi maraqlarımı güdməkdə ittiham edir. Siz özünüz deyin, cildini dəyişən Musa Qasımlıdır, yoxsa cilddən-cildə girən Ramiz Mehdiyevdir? Mən mövqeyi aydın, konkret və birmənalı olan şəxsəm. Ramiz Mehdiyev yazır ki, Musa Qasımlı deputat vəzifəsinin imkanlarından istifadə edərək, övladlarını yüksək maaşlı dövlət orqanlarına işə düzəldib. Mən ona bildirmək istəyirəm ki, övladlarım cəbhə bölgəsində xidmət ediblər, biri zabit kursunu bitirib, hər ikisi rütbə daşıyır. Mənim övladımın biri üç nəfərlik ailəsi ilə bir otaqlı mənzildə, 57 kvadratmetrlik taxta döşəməli evdə yaşayır. O biri isə dörd nəfərlik ailə üzvü ilə birlikdə iki otaqlı mənzildə yaşayır. Mən Ramiz Mehdiyevdən soruşuram, sənin oğlun harada xidmət edib?  Hansı biliyin sahibidir ki, Milli Təhlükəsizlik Nazirliyində, Xarici İşlər Nazirliyində, Miqrasiya Xidmətində və Fövqəladə Hallar Nazirliyində xidmət edib? Ramiz Mehdiyev, oğlun hansı keyfiyyətlərinə görə nazirlikləri gəzir? Övladlarımın biri 2008-ci ildə işə düzəlib, mən onda BDU-da sadə bir professor idim. İkinci oğlum isə 2010-cu ildə işə düzəlib və həmin il deputat seçilmişəm, amma seçkilər bu hadisədən sonra olub. Ramiz Mehdiyev, bəs sənin övladın vəzifələrə necə gedib? Ramiz Mehdiyev qırmızı cizgiləri keçib. O, haqqımda yazır ki, Azərbaycan elminə bir xeyri dəyməyən insanlar... Kitabıma məsləhətçi olmağı xahiş edəndə böyük tarixçi-alim idim, indi elmə xeyri dəyməyən adam oldum? Bu sözlərini nə tez unutdun? "Kitablarımın təqdimatında çıxış etsən, kitablarım hörmətə minəcək" deyirdin. Mən dünyanın yeddi ölkəsinin arxivində işləmişəm, kitablarımı özüm yazmışam, yaxşısı da, pisi də mənimdir. Soruşuram, Ramiz Mehdiyevin kitablarını kim yazıb?  Ona şəxsi savaş açmamışam. Bu gün masamın üstündə 6 nəfər gəncin CV-si var. Onlar erməni və gürcü dillərini bilirlər. Mən dəfələrlə müraciət etmişəm, Ramiz Mehdiyev onları Qafqazşünaslıq İnstitutunda işə götürməyə imkan verməyib, əvəzində mənə “filankəsi işə götür” deyib, təzyiq edib. Aparat rəhbərinə cavabımı demişəm ki, həmin istedadlı gəncləri 4 ildir işə götürməyə icazə vermirsiniz, magistratura bitirməyən, elmə həvəsi olmayan bir şəxsi necə göndərirsiniz? İstəyirsiniz, institutda muhasibatlığa, kadrlar şöbəsinə, ümumi şöbəyə öz adamınızı göndərin, hətta sürücünü də öz adamınız təyin edin. Amma elmi işçiləri mən götürürəm. Mən yox dediyim üçün sən məni təhqir edirsən? Mənim aldığım tərbiyə bu sözləri deməyə imkan vermir. Ramiz Mehdiyev Akademiyaya gələndən sonra Qafqazşünaslıq institutu dağılmağa başlayıb. Erməni və gürcü dilini bilən gənclər çıxıb, gedirlər. O gənclər bir də nə zaman yetişəcək? Ramiz Mehdiyevin bu hərəkəti Azərbaycanın dövlət, milli maraqlarına nə dərəcədə uyğundur? Mən kitablarımın hər cümləsinə cavabdehəm. Ramiz Mehdiyev kitabından bir cümləsini desin. Bu gün Ramiz Mehdiyev Azərbaycan elminə ləkədir, Akademiyanın müqəddəs divarlarının içərisində olmağa layiq deyil. Onun mənim haqqımda dediyi sözlər bilavasitə özünə aiddir. Mən öz zəhmətimlə gəlmişəm və bu dövlətə qulluq edirəm. Bəzən bizdən soruşurlar ki, Azərbaycan mətbuatı nə üçün söyüşlə danışır? İndi sizə məlum oldumu ki, 30 ilə yaxın müddətdə Azərbaycan cəmiyyətinə söyüşü, təhqirləri gətirən kimdir? Bu, Ramiz Mehdiyevdir. Onun dünənki yazısındakılar Akademiyanın prezidentinə, özünə akademik deyən şəxsə yaraşırmı? Məni iki dəfə Akademiyanın müxbir üzvü seçilməyə qoymadılar, gəlib dedilər ki, filankəs qoymur. Ramiz Mehdiyev, sən necə oldu ki, akademiyanın müxbir üzvü seçilmədən, akademik seçildin? Hansı kitabına görə? Beynəlxalq reytinqlərə baxsın. Mənim əsərlərimə təkcə keçən il dünyanın 10-a yaxın ölkəsində 29 iqtibas edilib. Ramiz Mehdiyev AMEA-nın prezidentidir, özünü akademik sayır, görsün onun kitablarına neçə iqtibas olub? Görsün Ramiz Mehdiyevin kitabları nə qədər oxunur? Ramiz Mehdiyevin mənim elmim, biliyim və tərbiyəm haqqında danışmağa haqqı yoxdur. Dedikləri bilavasitə onun özünə aiddir”.