“Tarix Yazanların Yadigarları” adlı tədbir keçirildi

"Əsgərə xatirə kitabı" layihəsinin təşkilatçılığı ilə 8 Mart – Beynəlxalq Qadınlar Günü münasibətilə “Tarix Yazanların Yadigarları” adlı tədbir keçirilib.

Pravda.az xəbər verir ki, bayram tədbiri Azərbaycan Respublikasının ərazi bütövlüyünün bərpasında, qorunub-saxlanılmasında canından keçmiş və şücaət göstərmiş, eləcə də Vətən Müharibəsi zamanı vətəndaşlıq borcunu layiqincə yerinə yetirən şəhid və qazi analarına, həyat yoldaşlarına, bacılarına və qız övladlarına həsr olunub.

Tədbir iştirakçıları öncə torpaqlarımızın azadlığı uğrunda canlarını qurban vermiş qəhrəman Vətən övladlarının - şəhidlərimizin əziz xatirəsini bir dəqiqəlik sükutla yad edib.

Dövlət Himninin oxunması ilə açıq edilən tədbirdə tanınmış ictimaiyyət nümayəndələri, milli məclisin deputatı Vüqar İskəndərov, layihə rəhbəri Nuranə Şıxəliyeva, “SARO çay” şirkətlər qrupunun rəhbəri, Beynəlxalq Turan Oyunları komitəsinin Sədri Fərid Əlizadə, Şəhid anaları – Abdurrəhmanlı Mehriban, Manafova Natavan, Qarayeva Təhsilə, sahibkar, “Creative Minds” uşaq bağçası və inkişaf mərkəzinin direktoru Xəyalə Əzizli, Əsgərə xatirə layihəsinin fəxri üzvü, həkim-ginekoloq Tamilla Hacıyeva, canlı qəhrəmanlarımız Famil Məlikov, Amin Musayev, Fəqan Musayev və Camal Alxaslı, “Peşə yönümlü təhsilin inkişafına yardım” İB-nin sədri, yazar İradə Əlili, “Gənclərin Töhfəsi” İB-nin sədri Asim Vəliyev çıxış edərək təbriklərini çatdırıb.

Qeyd olunub ki, bu gün ölkəmizdə artıq ordu ilə xalqın daha sağlam mənəvi birliyi yaranıb və bu birlik, həmrəylik qırx dörd günlük Vətən müharibəsi zamanı bir daha öz təsdiqini tapdı. Azərbaycanın təcavüzkar Ermənistan tərəfindən işğal edilmiş tarixi torpaqlarının azad olunması, respublikamızın ərazi bütövlüyünün bərpası uğrunda “Dəmir Yumruq” əməliyyatı ilə başladığı Vətən müharibəsində qazanılan möhtəşəm qələbədə Müzəffər Ali Baş Komandan İlham Əliyev başda olmaqla hər bir Azərbaycan vətəndaşının, hər bir hərbi qulluqçunun böyük xidmətləri vardır. Vətən isə bu xidmətləri heç vaxt unutmur. İlk növbədə hərbi əməliyyatlar zamanı qanları ilə qalibiyyət dastanı yazan, əbədiyyət zirvəsinə ucalan şəhidlərimizə, onları boya-başa çatdıran ata-analarımıza minnətdarıq, onlara borcluyuq.

Tədbirin bədii hissəsində, mədəniyyət və incəsənət xadimləri olan Nazim Pişyari, Mənsum İbrahimovun tələbəsi, gənc muğam ifaçısı Kənan Şərifov, İlqar Sadıqov,əməkdar artist Vasif Məhərrəmli cıxış etdilər.

Layihənin icraçı direktoru Məltəm Şıxəliyeva tədbirin ərsəyə gəlməsində dəstək olan, “Əsgərə xatirə” layihəsinin fəxri üzvlərinə, cəsur və zərif qəhrəmanlarına, iş adamlarına, sahibkarlara, mədəniyyət xadimlərinə, tədbirin keçirilməsi üçün, KİV nümayəndələrinə, xüsusi minnətdarlığını bildirib.

Tədbirdə şəhid ailələri üçün hazırlanmış tort şirnisi kəsilib.

Sonda xatirə şəkli çəkilib, şəhid ailələrinə bayram sovqatları təqdim olunub, sülh, əmin-amanlıq rəmzi olan göyərçinlər səmaya uçurulub.

Bütün dünyada barış olsun, savaş yox!!!
Güc birlikdə, sevgi həmrəylikdədir!
Qələbəmiz əzəli və əbədi olsun!