Məlahət İbrahimqızı: “Rusiyadakı vətəndaşlarımızın ölkəyə gəlməsində heç bir problem yoxdur”

“Rusiya-Ukrayna müharibəsi ilə əlaqədar olaraq Rusiyada yaşayan azərbaycanlıların ölkəyə qayıdışı normaldır, onlar Azərbaycan vətəndaşıdırlar. Həmin azərbaycanlılar ölkəni 100-200 il əvvəl tərk etməyiblər. Yəni, hələ XX əsrin əvvəllərində xaricə mühacirət etmiş azərbaycanların məsələsi başqadır. Hazırda Rusiyada yaşayan Azərbaycan vətəndaşları, əsasən, işlə bağlı gediblər. Nəzərə almaq lazımdır ki, dünya qloballaşıb. Dünyanın elə mərhələsində yaşayırıq ki, kiminsə daimi və ya müvəqqəti olaraq başqa ölkədə yaşayıb, işləməsinə qeyri-adi yanaşılmır”.

Bunu Pravda.az-a açıqlamasında Milli Məclisin deputatı Məlahət İbrahimqızı deyib.

Deputat qeyd edib ki, Rusiyada yaşayan Azərbaycan vətəndaşların bir qismi müstəqilliyin ilk illərində ölkədə xaos yaşananda, bir qismi isə sonralar qonşu ölkəyə üz tutublar: "Bu, təkcə Azərbaycan xalqına məxsus deyil. Elə Rusiyada, Avropada, Afrikada yaşayan Türkiyə vətəndaşları da çoxdur. Rusiya-Ukrayna müharibəsi yeni başlayanda mətbuatdan oxudum ki, təkcə Ukraynada 20 minə yaxın türk iş adamı var. Yəni, Azərbaycandan da Rusiyada iş quran, təhsil alanlar çoxdur. Həmin vətəndaşların ölkəyə gəlməsində heç bir problem yoxdur, ölkəmizin vətəndaşıdırlar. Azərbaycan dövləti güclüdür və hər zaman vətəndaşının qayğısına qalır. Dövlət bugünlərdə Ukraynada yaşayan azərbaycanlıların təxliyəsi ilə bağlı bütün imkanlardan istifadə edir və ölkəyə sağ-salamat qayıtmaları üçün onların təxliyə problemlərini həll edir. Hesab edirəm ki, bu məsələləri şişirtmək olmaz. Müharibə şəraitində, əlbəttə ki, mülki şəxslər təhlükəsizlikləri üçün müxtəlif yollar axtarırlar. Rusiyada yaşayan azərbaycanlıların isə, demək olar ki, əksəriyyətinin Azərbaycanda-kənddə, şəhərdə evi, həyəti, qohum-əqrəbası var. Ona görə də onların gəlişi qeyri-adi nəticələnə bilməz. İnşallah, müharibə tezliklə sülhlə başa çatar. İstər ukraynalı, istərsə də rusiyalı, ümumiyyətlə, insan ölümü çox ağrılıdır. Azərbaycan müharibə yaşamış dövlətdir və 2020-ci ildə Vətən müharibəsində 3 min nəfərə yaxın qeyrətli oğlumuz şəhid olub. Azərbaycan Birinci Qarabağ müharibəsində 1 milyondan çox qaçqın və məcburi köçkün problemi ilə üzləşib. Həmin dövrdə Türkiyədən başqa, heç bir dövlət və beynəlxalq təşkilat bu məsələdə Azərbaycana dəstək verməyib. Azərbaycan təkbaşına problemini həll edib: Məcburi köçkünlər Ulu öndər Heydər Əliyevin dəstək və qayğısı ilə Vətəndə yerləşdirilib, sonralar isə Prezident İlham Əliyevin hakimiyyəti dövründə bu diqqət və qayğı davam etdirilib. Onların sosial vəziyyəti daim diqqətdə saxlanılıb, mənzillə təminat həyata keçirilib. Yəni, biz müharibənin acısını yaşamış xalq olaraq kiminsə burnundan bir damcı qan axmasını belə istəmərik. Bütün xalqlara sülh, əmin-amanlıq, sağlam tərəfdaşlıq arzu edirik".

Nəzrin Cavid

Tarix: 2 Mart 2022, 11:29

Xəbər lenti