"Başqa yerdən qurbanlıq gətirməyin" - "Mir Mövsüm Ağa" ziyarətgahında qadağa?

İnsanlar adətən müəyyən niyyətlərinin qəbul olunması üçün qurban boyun alır və onu kəsmək üçün dini ziyarətgahlara üstünlük verirlər. Bakıda ən çox qurban kəsilən yerlərdən biri də Mir Mövsüm Ağa ziyarətgahıdır. Sosial şəbəkələrdə bura kənardan qurbanlıq gətirilməsinin qadağan olunması barədə məlumatlar yayılıb. Qeyd olunub ki, vətəndaşlar başqa yerdən aldıqları qurbanı kəsmək istədikdə onlara icazə verilmir, yalnız ziyarətgahın satdığı qurbanlıqları almaları tələb olunur.

Pravda.az xəbər verir ki, məsələ ilə bağlı danışan ziyarətgahın əməkdaşı bildirib ki, yayılan məlumatlar əsassızdır, insanlar istədikləri yerdən qurban gətirib kəsə bilərlər:

“Gətirilən qurbanlarda yeganə tələb şəriət baxımından qurbanın yaşı 6 aylıqdan kiçik olmamasıdır. Əks halda onun ziyarətgahda kəsilməsinə icazə verilmir. Daha böyük qurbanların gətirilməsinə isə heç bir məhdudiyyət yoxdur. Eyni zamanda ziyarətgahda da qurbanlıq qoyunlar satılır. İstəyən buradan alar, istəməyən özü ilə qurbanlıq gətirər. Ziyarətgahda kiçiyindən böyüyünə qədər hər kəsin cibinə uyğun qurbanlıq satılır”.

Bəs qurbanlıq kəsimi necə olmalıdır? Qurban harada kəsilməlidir? Din bu barədə nə deyir?

Mövzu ilə bağlı suallarımızı cavablayan Qafqaz Müsəlmanları İdarəsinin nümayəndəsi Ağaseyid Yaqubov bildirib ki, “Mir Möhsüm Ağa” ziyarətgahı qurumun tabeliyində deyil və müstəqil fəaliyyət göstərir.

Onun sözlərinə görə, İnsan Həcc ziyarətinə gedirsə, boynunda qurban kəsmək haqqı var: “Qurbanlıq - insan övladı yer üzündə yaşamağa başlayandan icra olunan əməldir. Allah ilk dəfə Adəmin övladları Habil və Qabildən qurban istəyib. O zamandan peyğəmbərlərin hər biri tərəfindən qurban ayini icra olunub. Qurban kəsmək azad ayindir. İlin hər bir günündə qurban kəsmək mümkündür.

Qurbanı kəsən müsəlman olmalı, islam qaydalarına riayət etməlidir. O, qurbanlığı 3 hissəyə bölə bilər: bir hissəsini özünə, bir hissəsini kasıblara, bir hissəsini isə dostlarına, qohumlarına paylasa yaxşı olar.

Qurbanlıq seçiləndə heyvanın sağlamlığına fikir verilməli, heyvan ətli-canlı olmalıdır. Qurbanlığı alıb satarkən qiymətində müştəri və satıcı arasında narazılığa yol verilməməlidir, hallalıq vacibdir”.

Ağaseyid Yaqubov bildirib ki, qurbanlıq xırdabuynuzlu heyvandırsa, yaşı ən azı 8 aylıq olmalıdır: “Bununla yanaşı, görünüşü, çəkisi bildirməlidir ki, kəsilməyə yararlıdır. Çox xırda heyvan qurban kəsilməz. Yaşı çox olan heyvan daha çox ət verəcək və daha çox insan ondan faydalanacaq.

Qurbanlıq iki niyyətlə kəsilə bilər: vacib niyyətlə və müstəhəb olaraq. Əgər vacib niyyətlə kəsilərsə, yaş həddi yuxarı, özü qüsursuz olmalıdır. Lakin sadə bir niyyətlə, saleh əməl kimi kəsirsə, heyvanın istədiyini kəsə bilər. Lakin diqqət edilməlidir ki, körpə quzu kəsilməsin, qurban yeyilməyə yararlı olsun”.

O qeyd edib ki, qurbanın kəsilmə yerində məhdudiyyət yoxdur: “Qurbanı hər yerdə kəsmək olar. Sadəcə ətrafdakı insanlara narahatlıq yaradılmamalıdır. Başqa heyvanların gözü qarşısında qurban kəsmək də doğru deyil”.

Teleqraf.com