Azərbaycanda şirkət rəhbərinə qarşı 75 min manatlıq dələduzluq edildi - ÖZƏL

Azərbaycanda şirkət rəhbərinə qarşı 75 min manatlıq dələduzluq edilib.

Pravda.az-ın əldə etdiyi məlumata görə, bu barədə Bakı Apellyasiya Məhkəməsində keçirilən prosesdə elan olunub.

İttiham aktına əsasən, Sövzəliyev Aqil Şəmsəddin oğlu zərərçəkmiş, "Pilot Holding” MMC-nin rəhbəri Təhməzov Amil Qulu oğlunun ümumilikdə 75 min manat pulunu ələ keçirib.

Belə ki, Amil Təhməzov tanışı olan təqsirləndiirlən şəxsə Nəsimi rayonu Hənifə Ələsgərov, Səməd Vurğun, İmran Qasımov və Mustafa Topçubaşov küçələrinin əhatə etdiyi ərazilərdə 70 000 kvadrat metr ərazini əhatə edən sahədə çoxmərtəbəli yeni yaşayış binalarını inşa etdirmək fikrində olması, tələb olunan sahə həddində tikintinin aparılmasına Dövlət Şəhərsalma və Arxitektura Komitəsinin Bakı Şəhər Memarlıq və Şəhərsalma Baş İdarəsi tərəfindən razılığın verilməməsi və bu mövzuda həmin dövlət qurumunun vəzifəli şəxsləri ilə aparılmış işgüzar danışıqların nəticəsiz qalması barədə məlumat verib.

Daha sonra Aqil Sövzəliyev ona Prezident Administrasiyasında rəhbər vəzifədə çalışan şəxslə qohumluq əlaqələrinə malik dostunun köməkliyi ilə tikintinin 70 000 kvadrat metrlik ərazidə aparılmasına dair Dövlət Şəhərsalma və Arxitektura Komitəsinin Bakı Şəhər Memarlıq və Şəhərsalma Baş İdarəsindən icazə sənədini alacağı barədə yalan vəd verərək zərərçəkmişdən 2020-ci ilin sentyabr ayında 50 000 manat məbləğində pul vəsaitini dələduzluq yolu ilə ələ keçirib.

Bundan başqa, o, Amil Təhməzovun xaricdə təhsil almış oğlunun bakalavr diplomunun etibarlılığı Azərbaycan Təhsil Nazirliyi tərəfindən tanınmadığı üçün düzələ bilməməsi barədə məlumat alıb. Aqil Sövzəliyev dövlət orqanlarının rəhbər vəzifəli şəxsləri arasında böyük nüfuz sahibi, habelə əvvəllər Milli Məclisinin deputatı olması barədə zərərçəkmiş yenidən yalan məlumat verib özünə inandırıb. O, bu yolla Amil Təhməzovdan 15 000 manat məbləğində pul alaraq zərərçəkmişə xeyli miqdarda maddi ziyan vurub.

Daha sonra Aqil Sövzəliyev verdiyi vədə əməl etməyib. Amil Təhməzov isə ondan polisə şikayət edib.

Polis əməkdaşları tərəfindən saxlanılan Aqil Sövzəliyev barəsində Cinayət Məcəlləsinin 178.2.2-cü (Dələduzluq, təkrar törədildikdə) və 178.2.4-cü (Dələduzluq, xeyli miqdarda ziyan vurmaqla törədildikdə) maddələri ilə ittiham irəli sürülüb.

Nərimanov Məhkəməsinin hökmü ilə təqsirləndirilən şəxs 3 il 9 ay müddətinə azadlıqdan məhrum edilib. Hökmdən narazı qalan zərərçəkmiş və Aqil Sövzəliyev apellyasiya şikayəti veriblər. Bakı Apellyasiya Məhkəməsinin qərarı ilə şikayətlər təmin olunmayıb.

Kamal Məmmədov

Tarix: 18 May 2022, 21:39

Xəbər lenti