Deputat: ““Kərimə”çilər də, Kərimliçilər də nə qədər gec deyil, sakitcə “yox” olmalıdırlar”

“Azərbaycan həmişə tolerant mühiti ilə dünya üçün nümunə olub. Bu gün də demokratik, hüquqi, dünyəvi, unitar respublika olan Azərbaycanda hər kəs öz inanclarında, etiqadlarında sərbəstdir və dini azadlıqların təmini üçün də kifayət qədər yetərli və pozitiv normativ baza mövcuddur, eyni zamanda, dövlət başçısı və Birinci vitse-prezident də həmişə dövlət-din münasibətlərini şəxsən diqqətlərində saxlayırlar. Cənab İlham Əliyevin hakimiyyəti dövründə tikilən, təmir edilən məscidlərin, dini ibadətgahların sayı Azərbaycan dövlətçilik tarixinin istənilən dövrü ilə müqayisədə daha çoxdur. Cənab İlham Əliyevin müzəffər ali baş komandanlığı ilə işğala son qoyulmaqla dağıdılan, təhqir edilən, 70-ə yaxın məscidimiz tapdaqdan, təhqirdən qurtulub və Azərbaycan dövləti işğaldan azad olunmuş ərazilərimizdə təmir bərpa prosesinə ilk növbədə məscidlərdən başladı.

Prezident həm Azərbaycan Prezidenti, həm Qoşulmama hərəkatının sədri kimi dünyada islamı terrorla eyniləşdirən yaxud başqa formada açıq anti-islam mövqe sərgiləyən dövlətlərə, güclərə qarşı birmənalı, sərt və cəsarətli mövqeyi ilə seçilən azsaylı siyasətçilərdəndir. Ona görə də heç kəs, xüsusən də son günlər küçələrə çıxıb, başqaları tərəfindən maşa kimi idarə olunan kütlə bizə müsəlmanlıq və dinə ehtiram dərsi keçə bilməz. Bu dövlət, bu hakimiyyət dildə yox əməldə dinə də, inanca da sahib çıxmağı bacarır”.

Pravda.az xəbər verir ki, bunu deputat Bəhruz Məhərrəmov bildirib.

“Təsəvvür edin, cənab İlham Əliyev ən ali platformalarda mübarizə aparır ki, islam mütərəqqi dindir, bunlar isə çıxıb Bakı küçələrində, metroda, yollarda bağırışa-bağırışa terorçulara dəstək verir. Bəs ermənilər 30 il məscidlərdə donuz saxlayırdılar, onda hardaydız? Niyə səsiniz çıxmırdı? Bu adamların harda necə yetişdiyi bizə bəllidir, kimlərdən tapşırıq aldığı aydındır. Hər kəsə o da bəllidir ki, Azərbaycanda bu adamlara informasiya dəstəyini anti-milli şura və onlara bağlı troll mediası təmin edir. İndi özünüz baxın görün, bunlar nə günə qalıb, görün kimlərdən mədət umurlar. Guya öz aləmlərində mövcud hakimiyyətə qarşı güclərini birləşdiriblər. 30 il ölkədə hər hansı bir formada siyasi səhnədə olan, zamanla, hətta hakimiyyətdə təmsil olunan bir qüvvə bu gün "kərimə" ideologiyası ilə birgə hərəkət edirsə, üzüsulu bu ölkənin siyasi səhnəsindən getməlidir. Azərbaycanda dünyəvi rejimi hədəf alan istənilən adam və istənilən siyasi qüvvə, o cümlədən onlara hər hansı formada yardım edən hər kəs dövlətə də, xalqa da xəyanət edərək konstitusion quruluşa qarşı çıxır. Hər kəs bilsin ki, Azərbaycanda xalq-hakimiyyət birliyi var, güclü dövlətimiz var, ölkə rəhbərinin çox ciddi sosial bazası mövcuddur. "Kərimə"çilər də, Kərimliçilər də bunu bir az tez anlamalı, nə qədər gec deyil, sakitcə "yox" olmalıdırlar” – B.Məhərrəmov qeyd edib.

Kənan

Tarix: 30 İyun 2022, 13:07

Xəbər lenti