Qazi Ülfət Həsənov: “Abid Qafarovun məqsədi qazilərin arasını vurmaq, çaxnaşma yaratmaqdır”

“Biz Abid Qafarovu həbs etdirmək məqsədi ilə deyil, böhtan atdığına, qaziləri təhqir etdiyinə görə məhkəməyə vermişik. Hər bir vətəndaşın borcudur ki, öz millətini, xalqını, torpağını, ölkə başçısını qorusun, müdafiə etsin. Biz öz başımızdan gedib döyüşməmişdik. Cənab Prezidentin əmrini gözləmişik. Əmr veriləndən sonra gedib əlimizdən gələni edib 30 il ərzində düşmən tapdağı altında olan torpaqlarımızı geri qaytardıq. Bu gün kimsə “Tərtər işi”ni araşdırırsa, bizim buna qarışmaq niyyətimiz yoxdur…”

Bu sözləri Pravda.az-a qazi Ülfət Həsənov “Kim Tv” “Youtube” kanalının rəhbəri Abid Qafarovun qaziləri təhqir etməsi barədə danışarkən deyib.

O bildirib ki, Abid Qafarov qaziləri təhqir etdiyi üçün onunla Xəzər rayon məhkməsində görüşüblər: “Söhbət də etdik. Bununla bağlı videomuz da var. Orda Abid Qafarovla barışıq elan etdik. Ceyhun Ağayev və digər qazilərlə gedib məhkəmədən ərizəmizi geri götürdük. Şərtimiz isə o oldu ki, sosial şəbəkələrdə paylaşılan qazilərlə bağlı təhqiredici sözləri, videoları, yazıları silsinlər. Biz dedik ki, nə qədər təhqiredici sözlər varsa, kim nə deyibsə, o sözləri öz üzərinə götürəcək. Onlar da bizə söz verdilər. Məhkəmə qarşısında hamı da bunu eşitdi. Amma onlar saytda yerləşdirilən görüntüləri yalandan, müvəqqəti gizlətdilər. Guya siliblər. Təəssüf ki, silmədilər. Nə üçün? Kimliyindən asılı olmayaraq nəyə görə kimsə təhqir edilməlidir? Belə şeylər xoşagələn deyil. Bu səbəbdən də ərizəmizi yenidən təqdim etdik. Abid Qafarov bizdən üzr istədi, ancaq sonra məsələni hərləyib-fırlayıb gətirib “Tərtər hadisələri”nə bağladı. Bizə isə bunun aidiyyəti yoxdur, təhqir videosuna görə qazilərimizdən üzr istəməsini tələb etdik. Sonra o, öz öhdəliyini yerinə yetirmədi. Başqa yolla “Tərtər hadisələri”ni ortalığa atıb aləmi qarışdırdılar. Onların başında duran Qurban Məmmədli millətimizə nalayiq sözlər yazır, təhqir edir. Sualımız olacaq, çəkilişə hazırlaşırıq. Qurban Məmmədli, sən xaricdə oturmusan, burda məni araşdırırsan ki, hansı döyüşdə iştirak etmişəm, ya etməmişəm? Gəl Azərbaycana, araşdır. Əvvəla, komandirlərim, generalım, Ali Baş Komandanım var. Biz bir “dəmir yumruğ”uq, verilən döyüş tapşırıqlarını, əmrləri gözümüzü qırpmadan yerinə yetirən əsgərik. Qurban Məmmədli yaxşı insandırsa, dövlətinin, millətinin, xalqının, anasının, bacısının qeyrətini çəkən şəxsdirsə, görürdü ki, dövlətimiz darda idi... 44 günlük müharibə ərzində gələrdi, cənab Prezidentə məktub yazardı, səhvini bildirərdi, səngərdə döyüşərdi. Ay Qurban Məmmədli, onda sənin danışmağa dilin olardı. Bəlkə də onda səni cənab Prezidentimiz bağışlayardı. Görərdi ki, döyüşürsən. Hər kəs müharibədə torpaqları azad etmək üçün döyüşürdü. Heç kim geri dönməyi fikirləşmirdi. Amma sən oturmusan xaricdə, ağzına gələni danışırsan, yetənə yetib, yetməyənə daş atırsan”.

Ü.Həsənov deyib ki, bir qrup “jurnalist” və “qazi”lər Abid Qafarovun tərəfini saxlayırlar: “Məqsədləri nədir, onun tərəfini niyə saxlayırlar, anlamırıq. Abid Qafarov sübut etsin ki, hansısa şəhid ailəsinə, qaziyə köməklik edib. Biz bunu məhkəmədə də ondan tələb etdik. Niyə sən avtomobilimin nömrəsini çəkib paylaşırsan, yazırsan ki, “bunlara ”krışalıq” edən kimdir?” Biz özümüz-özümüzə “krışalıq” edirik. Vətən, millət, torpaq uğrunda ölməyə hazır olan sipər oğullarıq. Yaralanmışıq, qazi olmuşuq, qoymarıq ki, kimsə bizim adımıza, millətimizə, Prezidentimizə ləkə gətirsin. Abid Qafarovun məqsədi yalnız qazilərin arasını vurmaq, qazini-qazi ilə üz-üzə qoymaq, çaxnaşma yaratmaqdır. Məhkəmə qarşısında gördük ki, hörmətsizlik edir. Ona 5 vəkil verdilər. Nə oldu dövlət tərəfindən təklif edilən 5 vəkilin biri də səni müdafiə etmədi? Camaatın qabağına çıxıb özünü reklam etmək, aləmi qatmaqla deyil. Kişisən, Vətənin, millətin, xalqın yanında ol, qaziləri bir-birinə qarışdırma...”

Aytəkin Qardaşova

Tarix: 8 İyul 2022, 18:03

Xəbər lenti