“Ordu ilə bağlı məsələlərdə diqqətli olmalıyıq” - Deputatdan ÇAĞIRIŞ

“Müasir dövrümüzün bir çox tələbləri yaranıb və bunlardan biri informasiyanı sürətlə alıb, ötürməkdir. Hazırda media çalışır ki, bu işin öhdəsindən gəlsin. Biz Azərbaycanda mövcud olan bir çox media qurumunun, saytların məlumatlarının, xəbərlərinin dəqiqə ərzində yenilənməsinin şahidi oluruq. Onlar vəzifələrini layiqincə yerinə yetirməyə çalışırlar. Hazırda bu media qurumlarına alternativ olaraq sosial media da mövcuddur. Təəssüflə qeyd etmək lazımdır ki, sosial media idarəolunmaz hala gəlib. Azərbaycan demokratik prinsiplərlə idarə olunur və burada söz azadlığı, plüralizm dövlət siyasətinin tərkib hissəsindən biridir. Prezident İlham Əliyev ortaya siyasi iradə qoyub, ölkədə bütün media subyektləri, qəzetlər, saytlar, televiziyalar azaddırlar. Onlar istədikləri məlumatları alıb ötürə bilirlər”.

Bunu Pravda.az-a açıqlamasında Milli Məclisin Hüquq siyasəti və dövlət quruculuğu komitəsinin üzvü Vüqar İskəndərov deyib.

Deputat bildirib ki, sosial şəbəkələrdə mövcud olan vəziyyət yalnız Azərbaycanda deyil, bütün dünyada arzuolunmaz formadadır: “İnsanlar ürəkləri istəyən, ağılları kəsdikləri formada, eşitdikləri hər hansı bir fikri çox rahat şəkildə sosial şəbəkələrdə paylaşa bilirlər. Əlbəttə ki, onların hər bir tam savadlı deyil və paylaşdıqları məlumatın dəqiqliyini anlamaya bilərlər. Belə hallar isə çox vaxt cəmiyyətdə anlaşılmazlıq yaradır. 44 günlük Vətən müharibəsindən sonra Azərbaycan müzəffər xalq obrazındadır. Bizim dövlətimizin gücü Ali Baş Komandanın rəhbərliyi altında xalqımızın yumruq halında birləşərək düşmənə ağır zərbəni endirməsi oldu. Yəni burada ölkə başçımızın iradəsi, siyasi gedişləri, planlı düşünülmüş hərbi və diplomatik siyasəti, orudumuzun qəhrəman əsgər və zabitlərinin fədakarlığı, cəsurluğu, qətiyyəti bizi qalib xalqa çevirdi. Postmüharibədə dövründə diplomatik masada müharibə davam edir. Biz bu məsələlərdə də Cənab Prezidentdən nümunə götürməliyik. Cənab Prezident 44 gün ərzində dünyanın 30-dan çox media qurumuna müsahibə verərək haqq səsimizi dünyaya çatdıraraq informasiya cəbhəsində də qalib gəlməmizi təmin etdi. Bu proses indi də davam edir. Burada hər birimizin üzərinə müəyyən vəzifələr düşür. Onlardan biri və bəlkə də əsası ordu ilə bağlı məsələlərdə diqqətli olmağımızdır. Respublika Baş Prokurorluğunun artıq ikinci dəfə bununla bağlı məlumat yayması müəyyən əsaslara söykənir. Bu məsələ ilə bağlı onu qeyd etmək lazımdır ki, ölkədə hansısa qurumlara, hətta dövlətlərə və şəxslərə bağlı olan və onların maraqlarına xidmət edən insanlar mövcuddur. Bu insanlar isə yaranmış sabitliyə, ordu və xalq birliyinə xələl gətirməyə çalışırlar. Ancaq təbii ki, bu mümkün deyil. Azərbaycanda bu məsələ həll olunub. Ölkədə xalq-iqtidar, xalq-ordu birliyi mükəmməl şəkildə formalaşıb. Lakin onu da əlavə etmək lazımdır ki, bu cəhdlər bir çox məlumatsız və siyasi cəhətdən savadı olmayan insanlar arasında anlaşılmaz vəziyyətə gətirib çıxara bilər. Bunun qarşısı isə qətiyyətlə alınmalıdır. Bu yolverilməzdir. Düşünürəm ki, hər birimiz hərbi, dövlət sirrləri ilə bağlı məsələlərdə çox diqqətli, ehtiyatlı olmalıyıq. Faktlara söykənməyən, Müdafiə Nazirliyinin bəyanatlarına, müraciətlərinə istinad etmədən kimlərinsə sözünü informasiya kimi tirajlamağımız doğru deyil. Bu hətta cinayət predmeti yaradır. Ona görə də bu sahədə ancaq rəsmi məlumatlara istinad etməliyik. Bu məsələlərdə hər birimiz ayıq-sayıq olmalı və hətta sosial şəbəkələrdə belə insanların cavabını özümüz verməliyik. Onların ayaq açmasına yol verməməliyik. Hər birimiz dövlətimizin bütün sahələrdə qorunmasında, mühafizə olunmasında fəal olmalıyıq”.

Leyla Yusubova

Tarix: 1 Avqust 2022, 19:58

Xəbər lenti