Deputatlar qanvermə aksiyasında iştirak edəcəklər? - SORĞU

Qafqaz Müsəlmanlar İdarəsi avqustun 8-də Məhərrəm ayının Aşura günündə qanvermə aksiyası keçirəcək. Aksiya Bakı da daxil olmaqla bir sıra regionlarda həyata keçiriləcək. Bəs Milli Məclisin deputatları bu aksiyaya qoşulacaqlarmı?

Pravda.az bununla bağlı bir neçə deputat arasında sorğu keçirib.

Deputat Ceyhun Məmmədov hazırda Bakıda olmadığını, lakin qanvermə günü Bakıda olacağı təqdirdə aksiyada iştirak edəyəcəyini bildirib:

“Hesab edirəm ki, Aşura mərasimlərinin bu formada keçirilməsi daha məqsədəuyğun və düzgündür. Biz belə aksiyalarla qana ehtiyacı olan insanlara daha çox fayda verə bilərik. Bu həm də daha sivil və normal yanaşma olardı. Vətəndaşlara da tövsiyə edirəm ki, onlar da münasibətlərini bu formada bildirsinlər. Allah bütün Kərbəla, eləcə də Vətən müharibəsi şəhidlərinə rəhmət eləsin”.

Deputat Tahir Kərimli deyib ki, qanvermə aksiyasında iştirak edə bilməyəcək:

“Təəssüf ki, hazırda məzuniyyətdə olduğum üçün qanvermə aksiyasına qoşula bilməyəcəm”.

Parlamentin üzvü Cavanşir Paşazadə isə bildirib ki, hər il Aşura günündə qanvermə askiyasında iştirak edir və bu il də istisna deyil:

“İnsanlar Aşura günündə özlərinə xəsarət yetirir, əziyyət verirdilər. Dindən kənarda olan bəzi məsələlərdə zərər çəkirdilər. Belə aksiyalar insanlar qan verməklə xalqımıza, dövlətimizə, xəstələrimizə yararlı olsun deyə keçirilir. Bu, artıq respublikada keçirlir. Məhərrəm ayında kəsici alətlərlə özlərinə zərər yetirənlər vərdişlərini kənara qoyub cəmiyyətimizə xeyirli olan, addımlar atmalıdırlar. O dönəmdə İmam Hüseyn simasında haqqın yolunda şəhidlər vermişiksə, bu gün də şəhidlərimiz var. Hələ də müalicə olunan qazilərimiz var. Müharibədən çıxan bir ölkəyik və buna görə də qüvvətlənməliyik. Hərbi tərəfdən qüvvətlənməyimizdən aslı olmayaraq, bəzi ehtiyatlarımız, eləcə də qan ehtiyatımız olmalıdır. Hər birimiz bu aksiyaya müsbət yanaşaraq iştirak etsək, xalqımız üçün daha xeyirli olar. İmam Hüseynə yaraşan, Cənab Prezidentin dinə verdiyi azadlıq siyasətinə uyğun şəkildə davranmağımız daha düzgün olardı”.

Deputat Arzu Nağıyev Aşura günü Bakıda olmayacağını təəssüflə qeyd edərək, qanvermədə iştirak edə bilməyəcəyini bildirib:

“Avqustun 8-də Tovuzda “Turan” futbol klubunun Azerbaycan Premyer liqasında ilk oyunu keçiriləcək, həmin gün orada iştirak etməyi planlaşdırmışam. Qanvermə aksiyasında iştirak edə bilməyəcəm. Lakin bu addımı dəstəkləyirəm, mühüm məsələdir. Hər bir Azərbaycan vətəndaşı səhhətindən, sağlamlığından aslı olaraq aksiyaya qoşulmalıdır. Çünki bu həm xalqın birliyi, eyni zamanda da kiminsə səhhətində olan problemlərin həlli istiqamətində atılan addımdır”.

Deputat Naqif Həmzəyev qanvermə aksiyasına Gəncədə qoşulacağını deyib: