BURADA REKLAMINIZ OLA
BİLƏR

BURADA REKLAMINIZ OLA
BİLƏR

Zaqatalada içməli su niyə yoxdur? - Deputat AÇIQLADI

Zaqatalada əhali susuzluqdan əziyyət çəkir.

 

Bu barədə Pravda.az-a daxil olan çoxsaylı vətəndaş şikayətlərində bildirilib ki, günlərdir rayonda içməli su yoxdur, problemin həlli üçün heç bir tədbir görülmür.

 

111 saylı Zaqatala-Balakən seçki dairəsinin deputatı Kamilə Əliyeva saytımıza açıqlamasında Zaqatalada su problemi olduğunu təsdiqləyib:

“Su İdarəsinin rəisi ilə danışmışam. Bir neçə gün əvvəl güclü yağışlar yağıb, sular bulanıb. Bildirildi ki, suların duruldulması ilə bağlı iş gedir. Bu səbəbdən içməli suyun verilməsində fasilələr yaranıb. Hazırki problem buradan qaynaqlanır”.

 

Deputat bildirib ki, ümumiyyətlə Zaqatalada su problemi mövcuddur: “Bir neçə gün öncə Zaqatalada vətəndaşlarla görüşdüm. Heydər Əliyev Mərkəzində seçicilərimi qəbul etdim, seçki dairəmə aid kəndləri bir-bir gəzdim. Düzdür, rayonda su problemi var. Əhali həm içməli su, həm də əkin sahələrinin suvarılması ilə bağlı çətinliklərlə üzləşir. Artezian quyularının qazılması barədə cənab Prezident, demək olar, hər il iki dəfə müəyyən vəsait ayırır. Müvafiq qrafik şəklində ehtiyac olan kəndlərdə yeni artezian quyuları qazılır, köhnələr bərpa olunur. Təzə salınan massivlər var. Həmçinin bəzi kəndlərdə köhnə su xətləri ilə bağlı problem mövcuddur. Bu kəndlərin hamısını qeydiyyata götürmüşəm, Su İdarəsinin rəisi ilə danışmışam. İndi məzuniyyət vaxtı olduğuna görə müvafiq qurumlara müraciət etmək mümkün deyil. Sentyabrın 1-dən məzuniyyət bitən kimi aidiyyəti qurumlara müraciətlərimi edəcəyəm. Su problemi bütün rayonlar, o cümlədən Zaqatala üçün bu gün aktual problemdir. Dəfələrlə bu məsələ Milli Məclisdə də qaldırılıb”.

 

K.Əliyeva Müsavat Partiyasının sədri Arif Hacılının Zaqatala rayon icra hakimiyyəti başçısının problemlərlə maraqlanmaması barədə səsləndirdiyi fikirlərə də münasibət bildirib: “Bu fikirlərlə qətiyyən razı deyiləm. İcra hakimiyyəti də problemin həllində maraqlıdır, icra başçısı tərəfindən mütəmadi olaraq səyyar görüşlər keçirilir. Dəfələrlə Zaqatalanın icra başçısı ilə birlikdə kəndlərdə görüşlər keçirmişik, bu problemləri qeydiyyata götürmüşük. Harada nəyə ehtiyac varsa, maraqlanırıq. Problemlərin aradan qaldırılması üçün yollar axtarılır”.

 

Aytəkin Qardaşova

Tarix: 17 Avqust 2022, 18:34   
-->
Xəbər lenti
Çox oxunanlar

Ən son xəbərləri səhifəmizdən də izləyin