“Əxlaqsız əməllərin qanuni olmasını təklif edənlər…” - Şeyx Əbdül

“Bu cür düşünüb fikri yayındıranların hamısı mənəviyyatsız adamlardır. Arzuladıqları bu şeyləri getsinlər evlərində, ailələrinin yanında etsinlər. Bu nə düşüncə tərzidir? Mənəviyyatsız, əxlaqsız biri üçün nə fərqi var ki, o işdə, oteldə, çimərlikdə, yaxud hansısa villadadır. Burada söhbət əxlaqsızlıqdan gedir və yolverilməzdir. Bunun kökündə isə ehtiyac və sosial problemlər dayanır. İndi insanlar ehtiyacdan dolayı sınırlar. Əgər 5-10 nəfərdən 1-2-i sınırsa, görün bu kütləvi olanda say hara gedir çıxır. İnsanları mənəvi baxımdan sındırıb, ehtiyac üzündən bu yola təhrik edirlər. Bunun arxasında isə çox ciddi sosial problemlər dayanır. Bu iş dövlət səviyyəsində çox ciddi şəkildə nəzarətə götürülməli və cəza tətbiq edilməlidir. Belə əxlaqsız əməllərin qanuni olmasını təklif edənlərə gəlincə, yəqin, onların ailəsi işdə yox, hoteldə əxlaqsızlıq edə bilər... Qoy, etsinlər... Allah işlərini avand etsin! Belə mənəviyyatsızların nə təklifi, nə ideyası, nə də hər hansı fikri bizim üçün göstəricidir”

Bunu Pravda.az-a açıqlamasında Azərbaycanın xalq artisiti, kinorejissor Şeyx Əbdül Mahmudbəyov deyib.

Xalq artisti bildirib ki, burada əsas söhbət xalqdan, onun mənəviyyatından, əxlaqından, namusundan, qeyrətindən gedir: “İnsanlar iş yerinə zəhmət çəkmək, evinə, ailəsinə bir parça çörək qazanmaq üçün gedirlər. Orada əxlaqsızlıq edib dövlət işini bir tərəfə qoyub şəxsi kefi ilə məşğul olmağa getmirlər. Bunun özü də cinayətdir. Sən dövlətin ayırdığı 8 saat işi bir kənara qoyub, şəxsi kefinlə məşğul olursansa, o idarələrin rəhbərləri də, buna rəvac, dəstək verənlər də ciddi şəkildə cəzalanmalıdır. Belə əxlaqsızlıq, mənəviyyatsızlıq açıq-aydın göstərilməli və cinayətkarlar ittiham olunmalıdırlar. Bundan əlavə, belə məsələlərdə ümumxalq qınağı olmalıdır, xalqı bundan kənar saxlamaq olmaz. Çünki dövlətin mənbəyi xalqdır. Bizi çapıb talamaları bir tərəfə qalsın, indi də əxlaqsızlığa əl atırlar. Çapılıb-talalanan xalqın bu hadisələrdən nəyə görə kənar qalmalı olduğunu başa düşmürəm? Nəyə görə xalqın mövqeyi rəsmi şəkildə bildirilmir? Niyə bütün müzakirələr bağlı qapılar arxasında gedir? Xalqa isə ancaq yalan informasiyalar verilir. Ümumiyyətlə, bu, Azərbaycanı çapıb-talayan qrupun növbəti təxribatıdır. Xəstə adam hamının qabına tüpürür ki, digərlərini da xəstə etsin. Bu gün vəzifədə olan əxlaqsız, mənəviyyatsız adamlar hamını xəstə etmək iddiaları, prinsipləri ilə işləyirlər. Yəni onun öz ailəsi belədirsə, qoy başqaları da elə olsun”.

Leyla Yusubova

Tarix: 19 Avqust 2022, 15:23

Xəbər lenti