Bağçalarda uşaqlar necə qidalanmalıdırlar? – Dietoloq açıqladı

“Məktəbəqədər yaş dövründə uşaqların yüksək enerjiyə ehtiyacları olduğundan gündəlik qida rasionu enerji, vitamin və minerallarla zəngin olmalıdır. Uşaqlar gündəlik enerjilərinin 50 faizini sağlam yağ mənbələrindən almalıdırlar. Buna görə də yeməklərə keyfiyyətli lif sortları əlavə edilməlidir. Onların qidalanmasında tərəvəzlərə, meyvələrə, dənli bitkilərə və yüksək lif tərkibli paxlalılara əhəmiyyət verilməlidir. Zülal ehtiyacları uşaqların çəkisinə görə hesablanmalıdır. 2-3 yaşlı bağça uşaqları üçün istehlak ediləcək zülal miqdarı 1 kiloqrama 0,95 qram protein olduğu halda, 4-5 yaşlı uşaqlar üçün hər kiloqrama 1,1 qram protein təşkil etməlidir. Bu dövrdə olan uşaqlara düzgün qidalanma davranışlarını öyrətmək lazımdır, çünki uşağın qazandığı qeyri-kafi qidalanma gələcəkdə piylənməyə və bir çox başqa sağlamlıq problemlərinə səbəb ola bilər. Uşaqlara yeməkləri qarışıq deyil, özünəməxsus ləzzətləri ilə təqdim etmək lazımdır. Onlar yeməyi tanımalıdır. Eyni zamanda uşaqlara əl ilə yeməyə icazə verilməlidir. Onlara yeməklər müəyyən vaxtlarda təqdim edilməlidir. Bununla da uşaqlarda zərərli qidalardan istifadənin qarşısı alınacaq və müntəzəm qidalanma proqramına alışacaqlar”.

Bunu Pravda.az-a açıqlamasında dietoloq Ceyhunə Yusifova deyib.

C.Yusifova qeyd edib ki, kiçik mədə tutumu olan uşaqlar üçün həcmi az və enerjisi yüksək olan yağların (fındıq, qoz, kərə yağı, zeytun yağı) verilməsi üstünlük təşkil etməlidir: “Uşaqların şəkər ehtiyacını qablaşdırılmış məhsul və ya şokoladla deyil, təzə və ya quru meyvə, təzə sıxılmış meyvə şirəsi, bal, doşab, ev mürəbbəsi, ev tortları və ya ev peçenyesi və südlü desertlərlə qarşılamaq olar. Hazır meyvə şirələri, meyvə qatıqları və müxtəlif içkilər şəkərin çox olması səbəbindən uşaqlara təklif edilməməlidir. Uşaqların qəbizlik yaşamasının qarşısını almaq və ya mövcud qəbizliyi aradan qaldırmaq üçün yeməklərinə tərəvəz, meyvə və taxıl məhsulları daxil edilməlidir. Eyni zamanda onlara həftədə 2-3 gün balıq verilməsi tövsiyə olunur. Uşaq yeməklərində duz istehlakı məhdudlaşdırılmalıdır. Onların immunitet sistemini gücləndirmək üçün yeməklərinə portağal, mandarin və pomidor kimi C vitamini mənbələri daxil edilməlidir. Sümük və dişlərin inkişafı üçün çox vacib olan kalsiumu isə qida rasionlarına süd, pendir, qoz-fındıq və yaşıl yarpaqlı tərəvəzlər əlavə etməklə qarşılamaq olar. Bədəndə kalsiumun effektiv istifadəsi üçün lazım olan D vitaminini qızılbalıq, skumbriya, qatıq və yumurta sarısı kimi qidalar əlavə etməklə qarşılamaq olar. Dəmir çatışmazlığından qaynaqlanan anemiya uşaqların əqli və fiziki inkişafına mənfi təsir göstərir. Bu səbəbdən körpələr evi menyularına dəmir mənbəyi olan ət, yumurta, paxlalılar, doşab, yaşıl yarpaqlı tərəvəzlər və qoz-fındıq daxil etməlidirlər. Uşaqların sevmədiyi tərəvəzləri incə şəkildə doğrayaraq onlara təqdim etmək olar. Eyni zamandan uşaqlar üçün menyu hazırlayarkən böyük ət parçalarından çəkinmək lazımdır. Çünki onlar bu yeməkləri yeməkdə çətinlik çəkirlər və buna görə də çoxlu yemək qalıqları olur. Bu səbəbdən də bağçalarda kiçik ət parçaları və küftələrdən hazırlanan yeməklərə üstünlük verilməlidir”.

Leyla Yusubova

Tarix: 19 Avqust 2022, 16:58

Xəbər lenti