“ABŞ və Fransa nümayəndələrinin Şuşaya gedib-getməməsi Ermənistan və Azərbaycan arasındakı prosesə heç bir təsir göstərmir” - RƏY

Xəbər verdiyimiz kimi, avqustun 27-də Şuşada işə başlayan beynəlxalq konfransda Azərbaycanda akkreditə olunmuş, Ankarada, Tehranda və Moskvada fəaliyyət göstərən qeyri-rezident səfirlər, hərbi attaşelər, beynəlxalq təşkilatların təmsilçiləri, Türkiyə Xarici İşlər Nazirliyinin və digər dövlət qurumlarının yüksəkvəzifəli şəxsləri də olmaqla ümumilikdə 160-dan çox nümayəndə iştirak edir. Nümayəndələr arasında Böyük Britaniya, Niderland, İsveç, Danimarka, Belçika, Almaniya, İtaliya, Müqəddəs Taxt-Tac, Macarıstan, Portuqaliya, Polşa, Çexiya, İran, Səudiyyə Ərəbistanı, Qətər, Bəhreyn, Çin, Filippin, Avstraliya, Yeni Zelandiya, İndoneziya, Kanada, Dominikan, Qvineya, Salvador, Meksika, Panama, Argentina, Braziliya, Qvatemala, Uqanda, Ruanda, Sudan, Çad, Kamerun, Namibiya, Mərakeş, Liviya və digər ölkələrin səfirləri, səfirliklərinin əməkdaşları və hərbi attaşeləri də yer alıblar. Azərbaycana ən uzaq məsafədə yerləşən ölkələr belə Şuşaya diqqət göstərib bu konfransa qatılsalar da, ABŞ və Fransa səfirləri bu dəfə də konfransda iştirak etməyiblər. Azərbaycan tərəfi hər iki ölkənin diplomatlarına Şuşaya səfərlə bağlı dəvət göndərsə də, onlar riyakarlıq göstərərək konfransa qatılmayıblar. Nəzərə alsaq ki, ABŞ və Fransa BMT Təhlükəsizlik Şurasının 5 daimi üzvündən biridir, eyni zamanda vaxtilə ATƏT-in Qarabağ probleminin həlli üzrə yaradılmış Minsk Qrupunun həmsədrləri olublar. Lakin indi onların bu addımı ikili standartların bariz nümunəsidir.

Bununla bağlı Pravda.az-a fikirlərini bölüşən Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev təəssüflə bildirib ki, ABŞ və Fransa post-münaqişə reallığını qəbul etməyə hazır deyil:

“Hər iki ölkə müxtəlif vasitə ilə faktiki olaraq münaqişə dövründə olan gündəliyi aktual saxlamağa çalışır. Artıq Azərbaycan öz ərazilərini işğaldan azad edib. Post-münaqişə çərçivəsində bir sıra proseslər baş verir, o cümlədən həm Brüsseldə, həm Moskva istiqamətində danışıqlar gedir. Bilirik ki, bu yaxınlarda Brüsseldə, eyni zamanda Moskvada görüş olmalıdır. Əsas fundamental məsələ sülh sazişidir. Eyni zamanda Moskvada həm delimitasiya, həm də kommunikasiya ilə bağlı məsələlər müzakirə olunacaq. Beləliklə, biz artıq post-münaqişə gündəliyini formalaşdırmışıq və irəli gedirik. Bunu ABŞ və Fransa müxtəlif səbəblərə görə qəbul etmək istəmir. Burada, təbii ki, diaspor faktoru var. Eyni zamanda ənənəvi olaraq burada diplomatiya çərçivəsində müəyyən geosiyasi oyunlar baş verir. ABŞ və Fransa öz təsirini regionda saxlamaq istəyir. Düşünürəm, onlar artıq yanlış alətlərdən istifadə edirlər. Buna baxmayaraq, bilirik ki, bu gün Şuşaya 160-dan çox diplomat, dövlət rəsmiləri, mütəxəssis gedib. ABŞ və Fransanın Şuşaya gedib-getməməsi Ermənistan və Azərbaycan arasında olan prosesə heç bir təsir göstərmir. Ümumiyyətlə, bu proses məhz Azərbaycanın həm siyasi, həm hərbi təzyiqi nəticəsində formalaşır. Biz uğurla ardıcıl olaraq öz hədəflərimizə nail oluruq”.

Aytəkin Qardaşova

Tarix: 27 Avqust 2022, 15:59

Xəbər lenti