Həbsdən yeni çıxmış şəxs qonşusunu küçəyə zibil atmaq üstündə bıçaqladı

Bakıda qonşusunu bıçaqlamaqda təqsirləndirilən Rahib Quliyevin cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Samir Əliyevin sədrliyi ilə keçirilən prosesdə hökm oxunub.

Məhkəmənin hökmü ilə o, 9 il müddətinə azadlıqdan məhrum edilib. Rahib cəzasını ciddi rejimli cəzaçəkmə müəssisəsində çəkəcək. Bildirilib ki, onun barəsində seçilmiş həbs qətimkan tədbiri hökm qanuni qüvvəyə minənədək dəyişdiriləsin.

İttihama görə, 13 fevral 2022-ci ildə saat 19 radələrində Bakı şəhəri Xəzər rayonu, Binə qəsəbəsi, Binə Atçılıq yeni yaşayış massivində qeydə alınıb.

Belə ki, 1993-cü il təvəllüdlü Rahib qonşusu, 1995-ci il təvəllüdlü Babayev Məmməd (ad şərtidir-red) ilə əvvəl mübahisə, daha sonra əlbəyaxa dava edib. Dava zamanı o, Məmmədi bıçaqlayıb.

Məhkəmə iclasında Rahib ona elan olunmuş ittiham üzrə özünü qismən təqsirli bilib. O, ifadəsində göstərib ki, Məmməd onun qonşusudur:

“Hər dəfə qonşumun həyətindən “drel” səsi gələndə ona öz iradımı bildirirdim. Hadisədən üç ay əvvəl idi ki, cəzaçəkmə müəssisəsindən çıxmışdım. 13 fevral 2022-ci ildə həyətimdə olan ağacları budayıb iş görürmüşdüm. Qonşuluqda yaşayan Zahidin yük avtomobili var və ondan xahiş etdim ki, zibilləri gəlib aparsın. Məmmədlə qapımız arasında 5-6 metr məsafə var. Həmin günü saat 20 radələrində Zahidlə birlikdə küçəmizə gəldik. Evin qarşısında Məmmədi gördüm. O, məni görüb öz-özünə “bu nədi yığıblar, mən maşını həyətə necə salacam?” deyib deyinməyə başladı. Evin qarşısına çatan kimi Məmməd mənə yaxınlaşıb “bu zibilləri sən tökmüsən?” deyə soruşdu. Mən də zibilləri tökdüyümü etiraf etdim və artıq yük maşını çağırdığını və zibilləri aparıb atacağımı söylədim. Məmməd avtomobilini həyətə sala bilmədiyini qeyd etdi. Mən də Məmmədə “bir az səbirli ol, yığıb aparacağam” dedim. Məmməd deyinməyə davam etdi. Mən Məmmədə “nə deyirsən sən?! Birinci dəfə deyil sən belə deyinirsən mənim üçün. Bu küçənin ağasısan bəlkə?!” söylədim. Məmməd əlimdən tutub məni kənara çəkdi. Həmin səs-küyə həyətdə işləyən İskəndər gəlib çıxdı. Bizi aralamağa çalışdı. Mən şalvarın arxa cibində olan bıçağı çıxardıb Məmmədi bıçaqladım.

Hadisə baş verən gün həyətimdə ağacları budamaq üçün həmin bıçaqdan istifadə etmişdim. Məmməd əvvəllər də mənimlə mübahisə edib və gedib 3-4 nəfəri toplayıb üzərimə gəlmişdi. Onu öldürmək niyyətim olmayıb. Xuliqanlıq etməmişəm, İskəndər zərərçəkmiş şəxs deyil, ona heç nə etməmişəm. Etdiyim əməldən peşmanam”.

Məhkəmə iş materiallarını araşdıb, işdə olan sübutlara qiymət verərək hesab edib ki, təqsirləndirilən şəxs Cinayət Məcəlləsinin 126.2.4-cü (Qəsdən sağlamlığa ağır zərər vurma, ümumi təhlükəli üsulla, xuliqanlıq niyyətilə) və 221.3-cü (Xuliqanlıq) maddələri ilə nəzərdə tutulmuş cinayət əmələrlini törətməkdə təqsirlidir.

Kamal Məmmədov

Tarix: 29 Avqust 2022, 16:25

Xəbər lenti