“Lukoil”də kişini bıçaqlayan xadimə: “Əvvəl bacı dedi, sonra əxlaqsızlıq təklif etdi”

Gəncə Ağır Cinayətlər Məhkəməsində kişini bıçaqlamaqda təqsirləndirilən Səbinə Fərzəliyeva (ad, soyadı şərti) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Elmin Rüstəmovun sədrliyi ilə keçirilən prosesdə hökm oxunub.

Məhkəmənin hökmü ilə ona şərti cəza verilib. Qeyd edilib ki, təqsirləndirilən şəxs barəsində seçilmiş polisin nəzarəti altına vermə qətimkan tədbiri hökm qanuni qüvvəyə minənədək dəyişdirilməsin.

Qeyd: Hadisə 6 dekabr 2021-ci il tarixdə, saat 07:45-də Gəncə şəhəri Nizami rayonu, Təbriz küçəsində yerləşən “Lukoil” yanacaq doldurma məntəqəsində qeydə alınıb.

Belə ki, yanacaq doldurma məntəqəsində xadiməçi işləyən Səbinə Göygöl rayon sakini Vüsal Əmrahovu şəxsi münasibətlər zəminində bıçaqlayıb. Xəstəxanaya yerləşdirilən yaralının əməliyyat olunub və onun həyatını xilas etmək mümkün olub.

Daha sonra Səbinə Fərzəliyeva polis əməkdaşları tərəfindən saxlanılıb və onun barəsində Cinayət Məcəlləsinin 126.1-ci (Qəsdən sağlamlığa ağır zərər vurma) və 221.3-cü (Xuliqanlıq) maddələri ilə ittiham irəli sürlüb.

Məhkəmə iclasında qadın ona elan olunmuş ittiham üzrə özünü təqsirli bilib. O, ifadəsində göstərib ki, boşanıb, azyaşlı övladı var, “Lukoil” yanacaq doldurma məntəqəsində xadiməçi işləyib.

Səbinənin sözlərinə görə, Vüsal Əmrahovla yolda tanış olub, kişi onun nömrəsini alıb:

“Həmin şəxs mənə bacı deyə müraciət etdi. Sonra mənə zəng etdi, əvvəl boşandığını, daha sonra evli olduğunu söylədi. Vüsal mənimlə yaxından tanış olmaq istədiyini, hotelə dəvət etdiyini, orada əxlaqsız hərəkətlər etməyimi bildirdi. Mən isə razılaşmadım. Onun dediyi sözlər pisimə gəldi, çox əsəbləşdim. Sonra yalandan onunla hotelə gedəcəyimi söylədim. Oğlumu da götürüb özümlə onun maşınında getdim. Özümlə də evdən bıçaq götürdüm. Bildirdim ki, “Lukoil” yanacaq doldurma məntəqəsinin yanında saxlasın və uşağın sənədlərini götürüm. Maşın dayanan kimi Vüsala ümumilikdə 7 bıçaq zərbəsi vurdum.
Həmin vaxt Vüsal idarə etdiyi avtomobilə əyləşib yanacaq doldurma məntəqəsindən uzaqlaşıb getdi. Mən də onu bıçağı yanacaq doldurma məntəqəsinin otağının pəncərənin yanına qoydum. Sonra əvvəlcə azyaşlı oğlumu bağçaya apardım. Daha sonra isə işlədiyim yanacaq doldurma məntəqəsinə gəlib təmizlik işlərini gördüm. Bundan sonra isə Gəncə şəhər Nizami Rayon Polis İdarəsinə gedərək tanımadığım bir nəfərin mənə qarşı əxlaqsız təkliflər etdiyi üçün onu bıçaqla vurduğunu dedim”.

Kamal Məmmədov

Tarix: 29 Avqust 2022, 18:18

Xəbər lenti