Müşfiq Cəfərov: "Ermənistanın məqsədi Azərbaycan tərəfində daha çox insanın itkisinə nail olmaqdır"

“Laçın şəhərinin Azərbaycana təhvil verilməsilə erməni xislətinin bariz nümunəsi də ortaya çıxmış oldu. Belə ki, şəhərdə Müdafiə Nazirliyi tərəfindən 1 318 ədəd piyada əleyhinə mina aşkarlandı. Təbii ki, bu hələ ilkin mərhələnin statistik göstəricisidir. Dövlətimiz beynəlxalq səviyyədə terrorizmlə mübarizə aparır. Ermənistanın buradakı məkrli niyyəti Azərbaycan tərəfində daha çox insanın itkisinə nail olmaqdır”.

Bunu Pravda.az-a açıqlamasında Milli Məclisin deputatı Müşfiq Cəfərov deyib.

Deputat bildirib ki, Azərbaycan regionda sülh, sabitlik naminə mübarizə apardığı halda Ermənistan hakimiyyəti hələ də terrorizmlə məşğuldur: “Laçında yalnız piyada əleyhinə minalar deyil, həmçinin tank əleyhinə mina və çox sayda partlamamış silah-sursat da aşkarlanmışdı. Belə görünür ki, Ermənistan hakimiyyəti qətiyyən sülhün lehinə deyil. 2020-ci ilin noyabr bəyannaməsinə əsasən hər iki tərəf hərbi fəaliyyətləri dayandırmalı idi, ancaq aşkar edilən minalar 2021-ci il Ermənistan istehsalıdır. Bu isə Ermənistanın nəinki 2020-ci ilin 10 noyabrında imzalanmış üçtərəfli bəyannaməni, eləcə də beynəlxalq konvensiyaları pozduğunu aşkar şəkildə göstərir. Hazırda Azərbaycanın minalardan çirklənən ölkələr içərisində ön sıralarda dayandığını desək, yanılmarıq. Bunun da səbəbi Ermənistanın minalama siyasətidir. Ermənistan bu siyasətini davam etdirərək həm Azərbaycan vətəndaşlarının zərər görməsinə, həm də sülh və barışıq səylərinə ciddi şəkildə xələl gətirir. 10 noyabr bəyannaməsindən sonra Azərbaycanda 232 nəfər mina qurbanı olub. Təəssüf ki, bunun nəticəsində 40 nəfər vətəndaşımız həyatını itirib, 192 nəfər isə müxtəlif dərəcəli xəsarət alıb. Ermənistanın minalama siyasətinin qurbanlarının əksəriyyəti mülki şəxslərdir. Məsələ ilə bağlı ATƏT, Aİ, BMT, Avropa Şurası kimi beynəlxalq təşkilatlara müraciətlər ünvanlanıb. Biz həmin təşkilatlardan konvensiya və prinsiplərə sadiqlik nümayiş etdirərək Ermənistanın bu mənfur əməllərini ifşa edən sənədlər qəbul etməsini, həmçinin Ermənistanı Azərbaycan torpaqlarından çıxarılmağa məcbur edilməsini gözləyirik. Əgər beynəlxalq prinsip və hüquqların işlək olması etibarının qorunub saxlanılması həmin qurumlar üçün əhəmiyyətlidirsə, bu zaman Ermənistan təcili şəkildə ərazilərin mina çirkləndirməsini dayandırılmalı, Azərbaycan torpaqlarında törətdikləri terrorizmə görə layiqli cavab verilməlidir. Əks halda dünya ölkələri və xalqları üçün kağız üzərində olan bu konvensiyaların heç bir etibarı olmayacaq və günü-gündən terrorizm, özbaşınalıq demokratik prinsiplərin tapdalanması daha da artacaq. Bu isə dünya üçün heç də yaxşı nəticələr verməyəcək”.

Leyla Yusubova

Tarix: 31 Avqust 2022, 18:19

Xəbər lenti