Arif Hacılının qardaşı: “AXCP siyasi proseslərə təsir etmək gücünü tam itirib, bu, reallıqdır”

“Yadınızdadırsa, Müsavat Partiyasına hücumlar olanda həmişə sözümü demişəm, bütün tədbirlərində fəal iştirak etmişəm. Amma qardaşım 2014-cü ildə bu partiyaya rəhbər seçildikdən sonra hesab etdim ki, Müsavatla bağlı hər hansı yazıya münasibət bildirməyim, bu partiyanın tədbirlərində əvvəlki kimi iştirak etməyim düzgün olmaz. Açığı buna səbəb həm də mərhum Vurğun Əyyubun “Vaqif Hacıbəyli özünü Musavatın “nadzor”u kimi aparır” atmacası oldu. Kimin yadındadırsa, yaxşı bilir ki, o vaxt Müsavatdakı seçkiləri gözdən salma cəhdlərini çox sərt şəkildə ifşa etmişdim. Beləliklə, bu son 8 ildə Müsavatla əlaqədar bir çox daxildən məni narahat edən proseslər baş verdi. Məsələn, Əli Həsənov və digərləri külli miqdarda pul xərcləyib ölkə daxilində və xaricdə total anti-Müsavat təbliğatı aparanda Tofiq Yaqublu, Yadigar Sadıqlı və bir çox başqa tanınmış müsavatçılar özlərini ləyaqətli apara bilmədilər, “Müsavat arayış satıb” xoruna qoşularaq böhtan kampaniyasının fiqurantlarına çevrildilər. O prosesdə çoxları “özünü yandırdı”. Onlardan biri də guya cinsi azlıq kimi Azərbaycanda hüquqları pozulduğunu bəhanə edərək Amerikada yerləşən ANS-çidir. Vaxtılə çox yaxın münasibətlərdə olduğum Elman Fəttah həmin bu bədnam ANS-çiyə müsahibə verərək Azərbaycanı 12-13 sentyabr döyüşlərinə görə borclu çıxarır, açıq -aşkar ermənilərin dəyirmanına su tökür. İndi qrant dəllallarının mütləq əksəriyyəti həşirlə Azərbaycanı beynəlxalq aləmdə az qala təcavüzkar kimi qələmə verir, Elman Fəttah da olsun onlardan biri. Mən bu bayağı və çeynənmiş “paşinyançı” mövqeyə münasibət bildirməyi lazım bilmirəm. Hamı nə baş verdiyini çox gözəl başa düşür. Həmin müsahibədə Müsavata və İsa Qəmbərə ünvanlanan iftiralara isə hər halda münasibət bildirməyi vacib saydım. Elman görünür, “bədnam” aparıcı ilə əvvəlcədən razılaşaraq müsahibənin sonunda onun tərəfindən müsahibədə müzakirə edilən mövzuya heç bir dəxli olmadan verilən suala cavabında açıq -aşkar Müsavata, İsa Qəmbərə “daş atır”. Elman Fəttahın mülahizəsinə görə Müsavat İsa Qəmbər tərəfindən dağıdılır, məhv edilirmiş. Guya bu səbəbdən bir çox partiyalar inkişaf edib Müsavatı ötüb keçiblər. Əvvəla, İsa Qəmbər çamur atmadan da gündəmə gələ bilərdin. Görünən odur ki, məqsəd bu olub. İsa Qəmbər hansı əməli ilə Müsavatı “məhv edib”. Müsavatda keçirilən demokratik seçkiləri nüfuzdan salmaq üçün ləyaqətsizcəsinə faktları təhrif edən, hər fürsətdə Musavata ləkə vurmağa çalışan bəzi namərdləri müdafiə etmədiyi üçünmü? Müsavatı ötüb keçən hansı partiyadır? Əgər YAP-ı nəzərdə tutursansa, onda sənə daha heç bir sözüm yoxdur. AXCP-ni nəzərdə tutursansa, yanılırsan. AXCP əslində siyasi proseslərə təsir etmək gücünü tam itirib. Bu, reallıqdır”.

Pravda.az-ın xəbərinə görə, bunu Müsavat Partiyasının başqanı Arif Hacılının qardaşı Vaqif Hacıbəyli bildirib.

V.Hacıbəyli qeyd edib ki, Azərbaycanda siyasi partiya kimi fəaliyyət göstərən, nizamnamə prinsiplərinə əməl edən yeganə partiya məhz Müsavatdır: “Bu gün siyasi şərait dəyişsə, mövcud iqtidara alternativ kimi ortaya çıxa və geniş xalq kütlələri tərəfindən dəstəklənə biləcək lider isə İsa Qəmbərdi. İsa Qəmbərə və Müsavata olan hücumlar da bununla bağlıdır. Təəssüflər olsun ki, bir vaxtlar simpatiya ilə yanaşdığım Elman Fəttah bu murdar prosesdə yer alıb”.

Kənan

Tarix: 27 Sentyabr 2022, 14:22

Xəbər lenti