Reklam

Qazaxda arvadını güllələyərək öldürən şəxs azadlığa buraxıldı

Qazax Rayon Məhkəməsində ehtiyatsızlıqdan adam öldürmədə təqsirləndirilən Nihad Məhərrəmov və onun anası Ayaz Osmanlının cinayət işi üzrə məhkəmə istintaqı başa çatıb.

 

Pravda.az-ın əldə etdiyi məlumata görə, hakim Neymət Musayevin sədrliyi ilə keçirilən prosesdə hökm oxunub.

 

Məhkəmənin hökmü ilə Ayaz Osmanlı Cinayət Məcəlləsinin (CM) 124.1-ci (Ehtiyatsızlıqdan adam öldürmə) maddəsi ilə təqsirli bilinərək aylıq qazancından hər ay dövlət nəfinə 20 % məbləğdə pul tutulmaqla 2 il müddətinə islah işləri cəzasına məhkum edilib. CM-in 69.3-cü maddəsinə əsasən, Ayaz Osmanlının həbsdə saxlanıldığı və ev dustaqlığında olduğu 5 ay 23 gün saxlamanın bir günü islah işləri növündə cəzanın müddətinə bir günə üç gün hesabı ilə hesablanmaqla təyin olunmuş 2 il müddətinə islah işləri cəzasından 17 ay 9 gün çıxılaraq üzərində aylıq qazancından hər ay dövlət nəfinə 20 % məbləğdə pul tutulmaqla 6 ay 21 gün müddətə islah işləri cəzası saxlanılıb.

 

Onun barəsində seçilmiş ev dustaqlığı qətimkan tədbirinin başqa yerə getməmək haqqında iltizam qətimkan tədbiri ilə əvəz edilib. Bu hökmdən dövlət ittihamçısı narazı qalıb və apellyasiya protesti verib.

 

Gəncə Apellyasiya Məhkəməsinin qərar ilə prokurorun apellyasiya protesti təmin edilib, birinci instansiya məhkəməsinin çıxardığı hökm dəyişdirilib.

 

Belə ki, Ayaz Osmanlı 2 il müddətinə azadlıqdan məhrum edilib. “8 noyabr - Zəfər Günü münasibətilə amnistiya elan edilməsi haqqında” Milli Məclisin qərarına əsasən, amnistiya tətbiq edilərək o, təyin olunan 2 il müddətinə azadlıqdan məhrumetmə cəzasından azad edilib.

 

İttihama görə, hadisə 04 avqust 2020-ci il tarixdə, saat 01 radələrində Qazax rayonunun Qaymaqlı kəndində qeydə alınıb.

 

Belə ki, kənd sakini, 1971-ci il təvəllüdü Ayaz Osmanlı evinin yataq otağında arvadı, 1973-cü il təvəllüdü Maral Osmanlı ilə cavanlıq və əsgərlik vaxtlarına aid köhnə fotoşəkillərə və məktublara baxaraq növbəti günü Bakı şəhərinə getməli olduqları üçün ümumi təmizlik işləri aparıb. O, uzun müddət ov üçün istifadə etdiyi atasından yadigar qalmış tüfəngi qarşısında üzbəüz dayanmış Maral Osmanlıdan götürərək təmizləməyə başlayıb. Bu zaman Ayaz bilmədən tətiyə basaraq silahdan atəş açıb və nəticədə güllə Maralın belinə, döş qəfəsinə və qarın boşluğuna dəyib. Qadın xəstəxanaya aparılarkən yolda dünaysını dəyişib.

 

Daha sonra Ayaz Osmanlı polis tərəfindən saxlanılıb və barəsində ev dustaqlığı qətimkan tədbiri seçilib.

 

Kamal Məmmədov

Tarix: 8 Oktyabr 2022, 08:07   
Xəbər lenti
Çox oxunanlar

Ən son xəbərləri səhifəmizdən də izləyin