Deputat: “Revanşistləri ruhlandıran siyasət heç bir halda gündəmə gətirilməməlidir”

“Azərbaycanla Ermənistan arasında keçirilən danışıqlar formatından və yerindən asıllı olmayaraq ölkəmizin irəli sürdüyü 5 baza prinsipi əsasında aparılır. Ermənistana təqdim etdiyimiz 5 baza prinsip beynəlxalq normalara, BMT Nizamnaməsinə uyğundur və danışıqlar masasında oturan heç bir tərəf bu prinsiplərin əksini Azərbaycandan tələb edə bilməz. Oktyabrın 31-də Soçidə keçirilən üçtərəfli görüşü də Azərbaycanın regionda davamlı sülh yaratmaq təklifi üzərində quruldu. Bu görüşdə razılaşdırılan məsələlər əvvəl razılaşdırılmış məsələlərin icrasının sürətlənməsinə töhfə verəcək”.

Bu sözləri Pravda.az-a açıqlamasında Milli Məclisin deputatı Azər Badamov deyib.

Deputat Soçi görüşündə razışaldırılan üç məsələyə diqqət çəkib: “Birincisi, BMT Nizamnaməsinə və 1991-ci il Alma-Ata Bəyannaməsinə uyğun olaraq suverenliyin, ərazi bütövlüyünün və sərhədlərin toxunulmazlığının qarşılıqlı tanınması əsasında sərhədlərin delimitasiyası və demarkasiyası prosesinin sürətləndirilməsi, ilin sonuna qədər konkret nəticələrə imza atılması ilə bağlıdır. Təbii ki, ölkəmiz delimitasiya və demarkasiya prosesinin tezləşdirilməsinin tərəfdarıdır. Çünki sərhədlərin delimitasiyası və demarkasiyası bir çox mübahisəli məslələrin həllinə gərtirməklə Ermənistanla sülh müqaviləsinin imzalanmasına yol açacaqdır. İkinci razılaşma humanitar məsələlərlə bağlıdır. Belə ki, görüşdə Azərbaycanla Ermənistan arasında ictimaiyyətin, ekspert birliklərinin nümayəndələri və dini liderlər arasında Rusiyanın köməyi ilə dialoqu davam etdirmək üçün, həmçinin iki ölkənin xalqları arasında etimadı möhkəmlətmək məqsədilə üçtərəfli parlamentlərarası əlaqələrin cəlb edilməsi üçün müsbət ab-hava formalaşmasının vacibliyi qeyd olundu. Əgər biz sülh müqaviləsinin bağlanmasından və gələcəkdə qonşuluq münasibətlərin formalaşdırılmasından danışırıqsa, əlbəttə ki, bu gün biz ölkələrimiz arası 30 illik düşmənçilik səhifəsini bağlayıb, təmiz səhifədən başlamalıyıq. Açılacaq yeni səhifə xalqlar arasında etimad mühütünün yaranmasına və birgəyaşayışa söykənməlidir. Üçüncü məsələ kommunikasiyaların açılmasıdır. Hesab edirəm ki, Ermənistan ilk növbədə 10 noyabrda imzalanmış üçtərəfli bəyanatın tərkib hissəsi olan Qərbi Zəngəzurdan azərbaycanlıların maneəsiz keçidini təmin etməlidir. Sonrakı mərhələdə isə ölkələrimiz arası bütün kommunikasiyalar açılmalıdır. Açılacaq digər kommunikasiyalar Azərbaycan və Ermənistanın suverən hüquqlarına əsaslanmalıdır, yəni Zəngəzur dəhlizinin digər açılacaq kommunikasiyalardan fərqli statusu olmalıdır. Bu status Naxçıvana maneəsiz keçidlə bağlıdır”.

A.Badamov deyib ki, Rusiya tərəfi Azərbaycan-Ermənistan arasında mübahisələrin ədalətlə həll edilməsinə, o cümlədən Cənubi Qafqazda sülh və sabitliyin möhkəmlənməsinə töhfə verməsinə hazır olduğunu bir daha bildirdi:

“Cənubi Qafqazda sülhün və sabitliyin formalaşması üçün revanşistləri ruhlandıran siyasət heç bir tərəfdən, heç bir halda gündəmə gətirilməməlidir. Hesab edirəm, Soçidə keçirilən üçtərəfli görüşdə bu məsələ ətrafında da fikir mübadiləsi olub və bundan sonra hər bir tərəf özünün açıqlamalarına diqqətli olacaq. Regionun gələcəyi davamlı sülhün üzərində qurulmalıdır. Düşünürəm ki, Soçi görüşü də bu istiqamətdə töhfəsini verəcək”.

Aytəkin Qardaşova

Tarix: 1 Noyabr 2022, 13:05

Xəbər lenti