Keçmiş arvadını bıçaqlayaraq öldürən şəxs: “Qızım “ata, etmə” deyərək qışqırırdı”

Sumqayıt Ağır Cinayətlər Məhkəməsində qətl törətməkdə təqsirləndirilən Nurlan Sultanovun cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Fəhmin Hümbətovun sədrliyi ilə keçirilən prosesdə təqsirləndirilən şəxsə hökm oxunub.

Məhkəmənin hökmü ilə o, 18 il 6 ay müddətinə azadlıqdan məhrum edilib.

Qeyd: Bu il avqustun 24-də rayonun Qobu qəsəbəsi ərazisində 1995-ci il təvəllüdlü Kəmalə Sultanovanın qəsdən öldürülməsi faktı ilə bağlı Cinayət Məcəlləsinin müvafiq maddələri ilə başlanan cinayət işinin ibtidai istintaqı tamamlanıb.

İstintaqla zərərçəkmişin keçmiş əri, 1989-cu il təvəllüdlü N.Sultanovun şəxsi münasibətlər zəmnində aralarında yaranan mübahisə zamanı bıçaqla çoxsaylı xəsarətlər yetirərək azyaşlı uşaqlarının və anasının gözü qarşısında K.Sultanovanı qəsdən öldürməsinə və cinayətin qarşısını almağa çalışan K.Sultanovanın anasını itələyərək qəsdən sağlamlığa az ağır zərər vuran bədən xəsarəti yetirməsinə əsaslı şübhələr müəyyən edilib.

İş üzrə toplanan kifayət qədər sübutlar əsasında N.Sultanova Cinayət Məcəlləsinin 120.2.4 (xüsusi amansızlıqla və ya ümumi təhlükəli üsulla adam öldürmə) və 127.2.1-ci (qəsdən sağlamlığa az ağır zərər vurma) maddələri ilə ittiham elan edilib və barəsində həbs qətimkan tədbiri seçilib.

Məhkəmədə N.Sultanov ona elan edilmiş ittiham üzrə özünü təqsirli bilərək göstərib ki, 24 avqust saat 18 radələrində həyətdə işləyərkən uşaqların ağladığını eşidib evə yaxınlaşıb. Qapının bağlı olduğunu görüb. Pəncərədən niyə ağladıqlarını soruşduqda analarının onları evdə qoyub getdiyini deyiblər. Axşam keçmiş arvadı Kəmalə evə gələndə ondan niyə uşaqları evdə qoyub getdiyini soruşub. Qadın isə cavabında söyüş söyməyə və mübahisə etməyə başlayıb. Kəmaləyə uşaqları evdə qoyub getməməyi deyib və pul lazım olduğu halda verəcəyini bildirib. Qadın isə yenə də valideynlərinin ünvanına nalayiq söyüşlər söyüb. Hirslənərək Kəmaləni bıçaqlayıb. O, qadına 2 bıçaq zərbəsi vurduğunu xatırlayır. Ondan sonra nə baş verməsini və Kəmalənin anası Qızxanıma da xəsarət yetirməsini xatırlamayır.

Daha sonra verilən suallara cavab olaraq N.Sultanov deyib ki, Kəmaləni bıçaqla vurarkən uşaqları evdə olub. Qızı Səma (şərti) anasını bıçaqlayarkən onu görüb. Qızı “ata, etmə” qışqırıb və bundan sonra o, dayanıb. Neçə bıçaq zərbəsi vurmasını dəqiq xatırlamadığını söyləyib. Qızxanıma xəsarət yetirməyindən peşmandır.

İttihamda isə qeyd edilib ki, N.Sultanov zərərçəkmiş şəxsin yalvarışlarına, həmin vaxt yaxınlıqda olan azyaşlı uşaqlarının “ata, eləmə” demələrinə məhəl qoymayıb qadına bıçaq zərbələri endirməyə davam edib.

Kamal Məmmədov

Tarix: 6 Noyabr 2022, 13:10

Xəbər lenti