Cümşüd Nuriyev: “Əli İnsanovun hakimiyyətə yaltaqlanmağa ehtiyacı yoxdur”

“Əli İnsanovun həbs olunarkən itirdiyi mülklərini geri qaytarmaq məqsədilə Prezidenti dəstəklədiyinə inanmıram. Bu, Əli İnsanov barəsində düzgün fikir deyil. Əvvəla, İnsanov öz sözünü deyə bilən bir alim, ziyalıdır. Onun çıxışına diqqətlə qulaq asdım. Adam cənab İlham Əliyevin 2020-ci ildən sonrakı fəaliyyətini araşdırıb, nəticədə bu fikrə gəlib. Bir dəlilər, bir də ölülər fikirlərini dəyişmirlər. İlham Əliyev haqqında çox adam müsbət mənada fikrini dəyişdi. Sözün açığı, Qarabağın geri alınma ehtimalı çox aşağı, həddindən artıq çətin idi. İki il keçib, hələ də bütün dünya gücləri bunu gözlənilməz siyasi zərbə kimi qəbul edirlər. Əli İnsanovun Prezidenti dəstəkləməsi və buna görə “xalq düşməni” elan olunması haqsız yanaşmadır. Adam analiz aparır, Azərbaycanın bu müddət ərzində əldə etdiklərini də müzakirə edib. Baxmayaraq ki, Əli İnsanov qatı Əliyevçidir. O, rəhmətlik Heydər Əliyevin bir nömrəli təbliğatçısı idi. Əməllərinə görə cəzalanıb, bu, ayrı bir şeydir. Həbsdən çıxandan sonra qatı müxalifətdən birmənalı şəkildə mərkəzçi mövqeyə keçməsində mənfi çalar görmürəm”.

Bu sözləri Pravda.az-a açıqlamasında politoloq Cümşüd Nuriyev deyib.

Politoloq bildirib ki, sabiq nazir Əli İnsanovun çıxışını bəziləri bunu özlərinə xəyanət, İlham Əliyevə yaltaqlıq kimi dəyərləndirirlər: “Əli İnsanovun hakimiyyətə yaltaqlanmağa ehtiyacı yoxdur. Yaşı da o yaş deyil ki, bu yaşında gedib kiminsə yanında olmaq istəsin. Ona vəzifə verilməyəcək, bir şey edilməyəcək. İnsanov bütün bunların hamısını ölçüb-biçib danışan adamdır. O, çox səviyyəli bir alimdir. Haqqına girənlər özləri bilərlər. Hər kəs fikrində sərbəstdir. Amma bu xalqı sevənlərin, uzun müddət Prezidentə qarşı müxalifətdə olanların əksəriyyəti Əli İnsanovun fikirləri ilə razılaşırlar. Bu fikirləri mətbuata açıqlamasalar da, artıq həmin adamlar həmin tənqidi mövqedən çəkiniblər. Mən Əli İnsanovun çıxışında xəyanət görmürəm. İnsanov çox ağıllı adamdır, xalqını, millətini sevir və bu millətə qüruru, şərəfi yaşadan Prezidentə də hörmətlə yanaşır”.

C.Nuriyev Ə.İnsanovun YAP-a üzv olacağı barədə iddialara isə belə münasibət bildirib: “YAP-ın qurucularından biri Əli İnsanovdur. Məncə, Haqq Ədalət Partiyasının YAP-a birləşməsi yeni bir çalar, rəng qatar, hər iki partiya udar. Deyə bilmərəm ki, bu, YAP-ı gücləndirəcək, yaxud əksinə. Amma bütün hallarda bu, ola bilər. Azərbaycanda 59 partiya qeydiyyatdan keçib. Ən demokratik ölkə ABŞ-dır. Orda belə iki – iqtidar və müxalifət partiyası var. Qardaş Türkiyədə dörd partiya var. Dünyanın heç bir dövlətində siyasi partiyaların sayı 8-10-u keçmir. Bir milyard yarımlıq Çində Kommunist Partiyasına alternativ cəmi iki partiya var. Amma 10 milyonluq Azərbaycanın 59 partiyasının olması siyasi eybəcərlikdir. Siyasi partiya cəmiyyətin mövqeyini göstərir. Bir millət ki 59 cür fikirləşir, deməli, orada birlik yoxdur. Amma 44 günlük müharibədə Azərbaycan xalqı göstərdi ki, bu xalq birləşməyi də bacarır, düşmənə qarşı vahid mövqedədir. Bu dəqiqə də İranın atdığı ağılsız addımlara qarşı Azərbaycan bir yerdədir. Bu mənada siyasi partiyaların təmərküzləşməsi həm sosial sifarişdir, həm də zamanın tələbidir. Bunu cəmiyyət də fikirləşir. Onsuz da zamanla ayaqlaşa bilməyən partiyalar birləşsələr, yaxşıdır. Zaman onları ələkdən keçirir”.

Aytəkin Qardaşova

Tarix: 8 Noyabr 2022, 15:53

Xəbər lenti