Xaçmazda bacısının namusuna görə həmyerlisini bıçaqlayana AĞIR CƏZA

Sumqayıt Ağır Cinayətlər Məhkəməsində oğurluq və qəsdən sağlamlığa ağır zərərvurmada təqsirləndirilən Fikrət Hənquliyevin (şərti) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Hafiz Əliyevin sədrliyi ilə keçirilən prosesdə təqsirləndirilən şəxsə hökm oxunub.

Məhkəmənin hökmü ilə o, 9 il ay müddətinə azadlıqdan məhrum edilib.

İttiham aktına əsasən, əvvəllər oğurluq əməlinə görə həbs edilən Fikrət Hənquliyev məhkumluğu ödənilmədiyi və götürülmədiyi halda 26 mart 2021-ci il tarixdə Xaçmaz rayonu, Çarxı kəndində yerləşən Hikmət Quliyevin (şərti) evindən oğurluq edib.

Bundan başqa o, 1 aprel 2021-ci il tarixdə saat 11:15 radələrində Xaçmaz şəhəri, Bakı prospektində olarkən zərərçəkmiş Səlim Qafarovu (şərti) Xaçmaz şəhər avtovağzalı ilə üzbəüz yolun digər tərəfində olan marketin qarşısında dayanmış avtomobilin sükanı arxasında əyləşdiyini görüb. O, bacısı Aytacın (şərti) hamilə qalmasında Səlimin günahkar olmasını bəhanə edərək üstündə gəzdirdiyi bıçaqla bir dəfə zərbə vurub.

Xəstəxanaya çatdırılan yaralının həyatını xilas etmək mümkün olub.

Polis əməkdaşları tərəfindən saxlanılına Fikrət Hənquliyevin barəsində Cinayət Məcəlləsinin 126.2.4-cü (qəsdən sağlamlığa ağır zərər vurma) və 177.2.3-cü (oğurluq) maddəsi ilə ittiham irəli sürülüb.

Məhkəmədə ifadə verən Fikrət oğurluq maddəsi üzrə özünü tam, həmyerlisini bıçaqladığı üçün isə qismən təqsirli bilib.

O deyib ki, xalasının sözlərinə görə, cəzaçəkmə müəssisəsində olduğu vaxtda, yəni 2018-ci ildə Səlim bacısı Aytacla cinsi əlaqədə olub. Bu məsələni eşitdikdən sonra zərərçəkmişlı danışmaq üçün görüşüb. Bu zaman ondan bacısı ilə aralarında nə keçdiyini soruşub. Səlim Aytacı bacısı kimi gördüyünü, onunla heç bir münasibəti olmadığını söyləyib. Daha sonra Aytacla danışaraq Səlimin ona dediklərini bacısına çatdırıb. Aytac isə qardaşının dediklərindən sonra Səlimlə cinsi əlaqədə olduğunu etiraf edib.

Hadisə günü Səlimin avtomobilində olduğunu görüb və ona yaxınlaşıb siqarət istəyib. Ardınca isə onu təhqir edərək Aytacla aralarında keçən münasibəti bildiyini söyləyib. Bu zaman zərərçəkmiş qəzəbli şəkildə peşman olmadığını, yaxşı etdiyini deyib.

Fikrət Hənquliyev qeyd edib ki, Səlimin bu sözlərindən hiddətlənərək üzərində hər zaman gəzdirdiyi bıçağı çıxardıb və avtomobilin qapısını açmaq istəyib. Lakin qapı açılmayıb. Pəncərə açıq olub. O, pəncərədən bıçağı içəri keçirdərək Səlimi vurmaq istəməyinə baxmayaraq zərbə ona dəyməyib. Daha sonra Səlim avtomobilin digər qapısından çıxaraq, söyüş söyərək üzərinə gəlib və həmin vaxt bıçaqla ona zərbə endirib. Xəsarəti yetirdikdən sonra Səlimə bir şey olmasından qorxaraq “102 xidməti”nə zəng vurub.

Kamal Məmmədov

Tarix: 9 Noyabr 2022, 09:15

Xəbər lenti