Şəkidə çəkiclə kafe sahibini uşağının gözü qarşısında vuran şəxsə AĞIR CƏZA

Şəki Ağır Cinayətlər Məhkəməsində həmkəndlisini öldürməyə cəhdə təqsirləndirilən Həsrət Əliyevin cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Rafail Əliyevin sədrliyi ilə keçirilən prosesdə hökm oxunub.

Məhkəmənin hökmü ilə o, 10 il müddətinə azadlıqdan məhrum etmə cəzasına məhkum edilib.

İttihama görə, hadisə 6 aprel 2022-ci il tarixdə, saat 0030 radələrində Ucar rayonu, Lək kəndi ərazisində qeydə alınıb.

Belə ki, kənd sakini, 1991-ci il təvəllüdlü Həsrət Əliyev sərxoş vəziyyətdə olan zamanı həmkəndlisi Vüsal Quliyevlə yaşadığı küçə ilə küçədə aralarında şəxsi münasibətlər zəminində mübahisə yaranıb. Mübahisə zamanı Vüsal onu nalayiq sözlərlə təhqir edib. Daha sonra Həsrət çəkiclə zərərçəkmiş şəxsin baş nahiyəsinə zərbə endirib. Bu zaman Vüsal yerə yıxılıb, Həsrət isə ona çoxsaylı zərbələr endirib.

Məhkəmədə dindirilən Həsrət Əliyev ona elan edilmiş ittihamda özünü qismən təqsirli bilərək ifadəsində göstərib ki, zrərçəkmiş şəxsin işlətdiyi kafeyə tez-tez gedib-gəlib. 5 aprel 2022-ci il tarixdə saat 21 radələrində anasına məxsus mobil telefon ilə Vüsala zəng edərək 3 manat pulu olduğunu, iki bakal pivə içmək istədiyini deyib, əvvəlcədən borclu qaldığı 9 manat pulu da sonra ödəyəcəyini söyləyib. Sonra yaşadığı evdən çıxıb piyada Vüsalın kafesinə gedib. Orada tək oturub 1-2 saat ərzində 3 bakal pivə içərək saat 23 radələrində evə getmək məqsədilə son ayağa duraraq cibindən 3 manat çıxarıb vermək istəyib. Bu zaman Vüsal əsəbiləşərək ondan kafesindən çıxmasını tələb edib, 3 manatı yenidən cibinə qoyub ona vermədən oradan çıxıb yaşadığı evə gedib. Həsrət evə getdikdən sonra anasına məxsus mobil telefonla Vüsala zəng edərək nə üçün onu kafesindən qovduğunu soruşub. Vüsal isə cavabında onu tutduracağını deyib.

Telefon danışığı zamanı Vüsal onu söymək istəsə də, buna imkan vermədən kafeyə gələcəyini bildirərək evdən çıxıb, təxminən 400-500 metr aralıda olan kafeyə yollanıb. Yolda gedərkən kafeyə 15 metr qalmış Vüsalın yanında oğlu və atası ilə birlikdə evindən gəldiyini görüb. Vüsal çatan kimi şillə ilə onun sifət nahiyəsindən bir dəfə vurub. Bu zaman Həsrət onun boğazından tutub yerə yıxıb. Yerdə Vüsalın üstünə çıxıb, sol əli ilə onu tutub sağ əlini uzadaraq yerdən bir daş götürüb. Həmin daşla zərərçəkmişin baş nahiyəsindən iki dəfə vurub. Hadisə vaxtı Vüsalın oğlu qışqırdığından ayağa qalxıb oradan qaçıb. Yaşadığı evə gedərək daşı heç bir yerə atmadan özündə saxlayıb, 6 aprel 2022-ci il tarixdə Vüsalı vurduğu üçün Ucar Rayon Polis Şöbəsinə çağırılıb. Şöbədə hadisə barədə izahat verib.

İstintaq orqanı tərəfindən Həsrət Əliyevin barəsində Cinayət Məcəlləsinin qəsdən adam öldürməyə cəhd maddəsi ilə ittiham elan edilib.

Kamal Məmmədov

Tarix: 25 Noyabr 2022, 16:25

Xəbər lenti