“Yazıçı bahalı sanatoriyalarda müalicə olunmalı, nəvə-nəticənin cibinə ayda 300-500 dollar xərclik qoymalıdır”

“İllərdir, bizim yazıçıların beynini boş, cəfəng şeylərlə doldurublar. Guya yazıçının pul, gəlir, qazanc kimi söhbətlərdə işi olmamalı, özünü dərvişyana aparmalı, gündə iki qutu siqaret çəkməli, teli havada dalğalanmalı, şalvarı belindən düşməli, gözü göydəki durnalarda olmalı, hər yerdə dava salmalı, şalvarı belindən düşsə də, qalstuk taxmalı, bir sözlə, harada avara, vizyonsuz iş, hərəkət var, onları etməlidir. Yazıçı yaradıcılığının elə bir mərhələsi gəlir ki, orada taktika düzgün qurulmalıdır. Kitablar, məqalələr, çıxışlar sistemləşdirilməli, tərcümə edilməli, onlayn satış platformalarına yüklənməli, nəşriyyatlarla iş prinsipi düzgün qurulmalı, yazıçı öz adına, imicinə xələl gətirəcək çıxışlar etməməli və başqa min cür karyera siyasətinə əməl etməlidir”.

Pravda.az-ın xəbərinə görə, bunu yazıçı Günel Mövlud bildirib.

Yazıçının sözlərinə görə, bütün bunlar o zaman effektivdir ki, yazılar da yaxşı, keyfiyyətli ədəbiyyat olsun: “Bu gün Azərbaycanda əsərləri dünya ədəbiyyatının standartlarına tam cavab verən onlarla yazıçı var. Əsərlərinə bir-iki vacib sosial-siyasi-ictimai fonu versələr, trendlərdən bir az xəbərdar olsalar, karyeralarını düzgün qursalar, rahatca dünyaya çıxa bilərlər. Məsələn, Şərif Ağayar kimi brilliant nəsri olan bir adama bircə nəfər yaxşı ingilis dili bilən ədəbi agent lazımdır. Bir də müəllim aradabir ictimai yerlərdə nitqini rəndələsə, əjdaha yazıçıdır. Hər il nə qədər sorğu, xahiş gəlir. Qafqaz ədəbiyyatı antologiyası hazırlayan, hansısa ədəbi forumlarda çıxış edən, hekayələr topluları hazırlayan, festival təşkil edən nə qədər adam müasir Azərbaycan ədəbiyyatı ilə maraqlanır. Bir siyahı hazırlayıb göndərirəm. Ardınca ikinci sual gəlir ki, bu adamların arasında nifrət nitqi, müharibəyə çağırış, homofobiya, gender ayrı-seçkiliyi edən varsa, onları siyahıdan çıxarın. Bəli, burda həmin siyahını ürək ağrısı ilə qısaltmalı olursan. Bizim yazıçıların çoxu dünya trendlərini izləmir, imicinə diqqət etmir, agent köməyindən istifadə etmir, dünyada hansı ədəbi festival, residentura var, maraqlanmır, nəşriyyatlarla əməkdaşlığını düzgün qurmur, sonra da qocalanda düşürlər köməksiz vəziyyətə. Hər bir yazıçı karyerasını elə qurmalıdır ki, yaşlananda heç kimə möhtac qalmasın. Yazıçılıq işi kasıblıq, səfalət, ehtiyac kimi anlayışlarla assosiasiya olmasın. Xüsusilə konyukturdan uzaq, Anar kimi monopolist ədəbiyyatla məşğul olmayan, müstəqil yazarlar bu ölkədə azad yazarlığın təkcə şərəfli deyil, həm də gəlirli iş olduğunu anlamalı, yaşamalı və başqalarına da nümayiş etdirə bilməlidir. Yaşı 65-i keçən hər bir yazıçının o yaşa qədər yazdıqları, bazası ona xidmət etməlidir. Bu yaş dövründən etibarən yazıçı Maldivlərdə, Kanar adalarında, ölən yeri Antaliyada yay istirahəti keçirməli, bahalı sanatoriyalarda müalicə olunmalı, nəvə-nəticənin cibinə ayda 300-500 dollar xərclik qoymalıdır. Hamınızdan yaşlananda gözləntim budur. Özümdən də...”

Tarix: 2 Dekabr 2022, 12:03

Xəbər lenti