Deputat: “Bu, zamanında verilmiş xəbərdarlıqdır, məsuliyyətini hiss etməyəcəklərsə, daha radikal addımlara əl atacağıq…”

“Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold”un əməkdaşları Rusiya sülhməramlı qüvvələrinin müvəqqəti yerləşdiyi Azərbaycan ərazilərinə keçərək, Xocalıda sülhməramlı qüvvələrin qərargahında sülhməramlıların komandanlığı ilə müzakirələr aparıblar. Həmin qurumların əməkdaşları Azərbaycan Qanunvericiliyinə uyğun şəkildə öz vəzifələrini icra edirlər. Bu, zamanında verilmiş xəbərdarlıqdır. Qarşı tərəflər də bundan nəticə çıxartmalıdırlar. Əks halda, təbii ki, daha arzuolunmaz nəticələrə gətirib çıxara bilər…”

Bu sözləri Pravda.az-a açıqlamasında Milli Məclisin Təbii ehtiyatlar, energetika və ekologiya komitəsinin üzvü Nəsib Məhəməliyev deyib.

Deputat bildirib ki, faydalı qazıntıların qanunsuz istismarının aparıldığı yataqlar Azərbaycanın suveren ərazilərində yerləşir:

“Dövlət olaraq öz təbii sərvətlərimizə, ekologiyamıza sahib çıxmalıyıq. Burada nə Ermənistan, nə də Rusiya faktoru əsas rol oynamamalıdır. Azərbaycan xalqının, dövlətinin maraqları var və bu maraqlar uğrunda həm dövlət, həm də xalq olaraq mübarizə aparacağıq. Azərbaycan xalqının mülkiyyətinin, xalqımıza mənsub olan təbii sərvətlərin ermənilər tərəfindən qaçaqmalçılıq yolu ilə vəhşicəsinə tarmar olmasının, ekologiyamıza vurulmuş ziyanın qarşısı alınmalıdır. 30 illik işğal dövründə erməni separatçıları və onlara himayədarlıq edənlər Azərbaycan iqtisadiyyatına, ekologiyasına, təbii sərvətlərinə külli miqdarda ziyan vurublar. Artıq 44 günlük müharibədən sonra yeni reallıqlar yaranıb. Biz öz torpaqlarımıza, təbii sərvələrimizə sahib çıxırıq. Cənab Prezident İlham Əliyevin bu istiqamətdə apardığı siyasət məqsədyönlü, sülhpərvər siyasətdir. Erməni vəhşiliklərinin qarşısını, təbii ki, güc strukturlarının vasitəsilə də almaq olar. Prezident tərəfindən ilk növbədə mülki şəxslərin ora göndərilməsi, Azərbaycan dövlətinin sülhpərvər siyasətinin mahiyyətini göstərir. Bu, Qarabağ ermənilərinə, separatçılara, Ermənistan hakimiyyətinə, eyni zamanda onlara himayədarlıq edən, köməklik göstərən Rusiya sülhməramlılarına bir mesajdır. Artıq sənədlərlə, videogörüntülərlə sübut olunub ki, Azərbaycanın Qarabağ ərazisində yerləşən qızıl yataqları hər hansı texnologiya ilə qorunmadan, ekoloji tələblərə riayət olunmadan vəhşicəsinə dağıdılır, Ermənistana daşınır, Ermənistan vasitəsilə Avropada erməni əsilli insanlara məxsus şirkətlərdə rializə olunur. Növbəti mərhələdə Ermənistan və onlara himayədarlıq edən qüvvələr Prezidentin verdiyi sülhpərvər mesajları dərk etməyəcəklərsə, məsuliyyətini hiss etməyəcəklərsə, təbii ki, biz daha radikal addımlara əl atacağıq…”

Aytəkin Qardaşova

Tarix: 5 Dekabr 2022, 12:32

-->

Xəbər lenti