Natiq Cəfərli: “Hakimiyyət siyasi partiyaların fəaliyyət fəlsəfəsinə zidd olan qanunu qəbul etməkdə israrlıdırlar”

“Bu gün Parlament “Siyasi partiyalar haqqında" yeni qanun layihəsini 2-ci oxunuşda qəbul edib. Bu qanun layihəsi əlehinə arqumentlərlə, tezislərlə ictimai müzakirələr zamanı dəfələrlə çıxış etmişik, Parlament nümayəndəmiz bu qanunun əlehinə səs verib, qanun layihəsinin beynəlzalq ekspertizası üçün Venesiya Komissiyasına rəsmi müraciət etmişik, bütün bunlara baxmayaraq hakimiyyət öz bildiyini oxuyur, mənasız, məntiqsiz, siyasi partiyaların fəaliyyət fəlsəfəsinə zidd olan qanunu tez-tələsik qəbul etməkdə israrlıdırlar”.

Pravda.az-ın xəbərinə görə, bunu REAL Partiyanın funksioneri Natiq Cəfərli bildirib.

N.Cəfərlinin sözlərinə görə, 44 günlük Vətən müharibəsi zamanı müxalifət haqq savaşına, torpaqların işğaldan azad edilməsi üçün dövlətin atdığı bütün addımlara dəstək verib, beynəlxalq mediada, daxili media resurslarında aparılan siyasətin beynəlxalq hüquqa uyğun olduğunu, haqlı mövqeyi müdafiə edib: “Çünki, Qarabağ, ərazi bütövlüyü və müstəqillik məsələsi dövlət məsələsidir, bu yolda alternativ fikir yox idi, yəni, müxalifət olaraq özümüzə bir sual verdik, “İndi biz hakimiyyətdə olsaydıq, nə edərdik”, bu sualın cavabı birmənalı idi ki, eyni qərarları alardıq, eyni cür davranardıq (ümumiyyətlə, normalda müxalifət istənilən addımı tənqid edərkən, “biz olsaydıq necə davranardıq”, sualına cavab verməli, alternativlər təklif etməlidir). Nəticədə ölkə daxilində siyasi vahid mövqeyin olması ikinci Qarabağ savaşımızın hərbi qələbə ilə başa çatmasında ciddi rol oynadı – kənardan heç bir qüvvə bu məsələdə siyasi oyunçular arasında fikir ayrılığının olmadığını görüb təzyiq etmək üçün heç bir addım da ata bilmədilər. İndi Azərbaycan dövləti (tam haqlı olaraq) İrana, Rusiyaya, Fransaya ciddi iradlar bildirir, ətraf ölkələrlə münasibətlər gərginləşir, xarici təhlükələr artır – belə bir şəraitdə ağıllı və uzaqgörən hakimiyyət siyasi partiyalarla, müxalif təşkilatlarla Dövlət ərkanına uyğun davranmaqdansa “Siyasi Partiyalar haqqında” qanun qəbul etməklə münasibətləri korlayır. Əslində indi dövlətimizə, müstəqilliyimizə, ərazi bütövlüyümüzə təhdidlər 2020-ci ildən heç də az deyil, bu gün hakimiyyətə müxalif partiyalarla dövlət məsələlərində eyni mövqedə olmaq daha çox lazımımdır, amma görünən odur ki, hakimiyyətin, məşhur deyimdə olduğu kimi, “müvəffəqiyyətdən baş gicəllənməsi”, effektini yaşayır. Bir tək seçki dönəmində olan qardaş, əsl müttəfiq olan Türkiyəyə bel bağlamaqla təhlükələrlə dolu yola girmək risklidir, ölkə daxilində Dövlət maraqları çərçivəsində siyasi ittifaqlar qurulmalı, bəlli məsələlərdə vahid platforma yaradılmalıdır ki, xarici və daxili təhdidlərə qarşı siyasi “immunitet” yaratmaq mümkün olsun”.

Kənan

Tarix: 6 Dekabr 2022, 16:16

Xəbər lenti