Cümşüd Nuriyev: “Bakıda müxtəlif vəzifələrdə çoxsaylı ermənilər çalışır, onları televiziyada danışdırmaq lazımdır”

“Rusiyanın sülhməramlı kontingentinin müvəqqəti yerləşdiyi Qarabağ ərazisinə dinc yürüşlərin təşkil olunması yaxşı təklifdir. Amma bunu Xankəndindən, Xocalıdan olanlar həyata keçirməlidir. Düzdür, dövlət qulluqçuları öz işlərini görür, həmin ərazilərə onlar gedirlər. Bu da yaxşı addımdır. Xocalıdan, Xankəndindən olanlar öz qohumlarının qəbrini ziyarət etmək, dədə-baba yurdlarına, evlərinə baş çəkmək adı ilə ora gedə bilərlər. Buna haqları da var. Həmin vətəndaşlarımızın tələbi ikiqat effekt verəcək. Çünki 2020-ci il 10 noyarda imzalanmış üçtərəfli bəyannamədə üç tərəf də imzalayıb ki, Xocalıdan, Xankəndindən olanlar öz yerlərinə qayıda bilərlər. Ən azından müvəqqəti gedib-gəlmək adı ilə bunu etmək lazımdır. Çünki sülhməramlılar artıq öz məramlarından kənar başqa işlərlə məşğul olurlar və ermənilər çox fəallaşıb. Ona görə də Azərbaycan bu addımı atmalıdır…”

Bu sözləri Pravda.az-a açıqlamasında sabiq deputat Cümşüd Nuriyev deyib.

O bildirib ki, Bakıda 30 minə yaxın erməni var: “Müxtəlif vəzifələrdə çoxsaylı ermənilər çalışır. Onları televiziyaya dəvət edib, danışdırmaq lazımdır. Media bunu etməlidir, 1990-cı illərdə də bunu etmişik. Erməniləri danışdırmaq lazımdır ki, onlarla Bakıda, Sumqayıtda, Gəncədə necə rəftar edirlər, övladları hansı vəzifələrdədir... Bakıdakı ermənilərin siyahıları var, hamısı məlumdur. Bütün mənzil yaşayış sahələrində - “JEK”lərdə ermənilərin hansı mənzillərdə yaşadıqlarını çox gözəl bilirlər. Düzdür, ərinin soyadını qəbul edən erməni qadınlar var, bunu başa düşürük. Amma 50-60 ildir, Bakıda yaşayan təmiz ermənilər də var. Onlara müraciət etmək lazımdır. AZTV və digərləri nümunə kimi belə verilişlər hazırlamalıdır. Görsünlər ki, bu, həm xalq diplomatiyasıdır, həm də Azərbaycan Prezidenti bunu elan edir. Onlara həqiqi yanaşma nə yerdədir? Bu qədər televiziya kanalları var. Başqa şeylər üçün vaxt tapırlar. Erməniləri efirə dəvət etsinlər. Bu, televiziyada daha yaxşı effekt verəcək. Desinlər ki, Azərbaycanda hər cür şəraitləri var. Vallah, Bakıda ermənilər bizdən yaxşı yaşayırlar…”

C.Nuriyev rus sülhməramlılarının nəzarət etdikləri Azərbaycan ərazilərinə dinc yürüşlərin təşkilinin gərginlik yaradacağı, diplomatik gedişlərin hələ tükənmədiyi fikrinə isə belə münasibət bildirib: “Bu sözü deyən qorxaqdır. Diplomatiya həmişə məcburiyyətdən doğur. Vətəndaşlar dövləti məcbur etməlidir. Dövlət siyasətini dəstəkləmək lazımdır. Bu mənada, biz dövlətə hava, su kimi lazımıq. Bunu dövlət təklif etməməlidir, media məsələni qaldırmalıdır. 10 noyabr bəyannaməsini imzalayıblarsa, əməl etməlidirlər. Jurnalistlərin Xankəndinə buraxılmaması ilə bağlı kadrlarda gördük ki, sülhməramlılarla bərabər, qeyri-qanuni erməni silahlı dəstəsi də orada iştirak edir. Onların geyim formaları da fərqli idi. Rusca da yaxşı danışa bilmirlər, o saat bilinir ki, ermənidirlər. Ləhcələrindən də hiss olundu. Həm də qollarında işarə yox idi. Erməni dəstələri birmənalı şəkildə sülhməramlı “çətiri” altında, ruslarla birgə silahlı keşik çəkirlər…”

Aytəkin Qardaşova

Tarix: 9 Dekabr 2022, 15:49

Xəbər lenti