Nizaməddin Şəmsizadə: “İlham Əliyev nəinki Azərbaycanın, hətta Turanın lideri olmağa layiqdir”

“30 il bundan əvvəl - Qarabağ işğal edildiyi günlərdə cavan idim, demişdim ki, kim Qarabağı işğaldan azad etsə, o, Azərbaycanın daimi prezidenti olacaq. Həyat elə gətirdi ki, ulu öndər Heydər Əlyevin təklifi ilə İlham Əliyev prezident seçildi. Dəfələrlə yazmışam ki, hələ heç bir ölkənin padşahı, prezidenti öz xalqına İlham Əliyev qədər yaxın olmayıb. Bu, əsas şərtdir. İlham Əliyev kabinet adamı deyil, o, xalq içərisindədir. Müharibə günlərində hər kəs gördü, İlham Əliyev xalqı necə ilhamlandırırdı. Vətən müharibəsi zamanı “Müharibə: qürur və kədər, “Erməni faşizmi””, “İşğal” kimi yazılar yazmışam. Bütün dünyanı əhatə edən ağır pandemiya dövründə də bir məktub yazmışdım ki, xalqını ümumbəşəri bəladan xilas etdiyinə, daha az itkilərlə çıxardığına görə Prezidentə Milli Qəhrəman adı vermək lazımdır...”

Bu sözləri Pravda.az-a Əməkdar elm xadimi, professor Nizaməddin Şəmsizadə deyib.

N.Şəmsizadə cənab Prezidentə Milli Qəhrəman adının verilməsi təklifini irəli sürdüyünə görə tənqid edilməsini isə belə dəyərləndirib: “Doğrudur, Amerikada oturan daxili, xarici düşmənlərimiz haqqımda ağızlarına gələni dedilər. Lakin həmin sözümün üstündə dayanıram. İlham Əliyevə Allah uzun ömür versin. Nəinki Azərbaycanın ömürlük prezindenti olmasının tərəfdarıyam, hətta ona Milli Qəhrəman adı verilməsini şəxsiyyətlər fondu olan Milli Məclisdən xahiş edirəm. Çünki İlham Əliyev çox təvazökar adamdır. Son vaxtlar ölkəmizdə görülən işlər göz qabağındadır. Prezident müharibə dövründə dostlarımızın və düşmənlərimizin telejurnalistlərinə 20-dən artıq müsahibə verdi. O, böyük diplomatdır, yüksək məntiqə malikdir, xalqını yaxşı tanıyır, xalqını sevir, dövlətçiliyini yaxşı bilir, torpaqlarımızın təbii sərvətlərini öz əsl yiyəsinə - Azərbaycan xalqına vermək niyyətindədir. Nəhayət, bütün dünya prezidentlərindən fərqli olaraq, böyük quruculuq işləri görür. Azərbaycan İlham Əliyevin hakimiyyəti dövründə əsrə bərabər inkişaf yolu keçib. İlham Əliyev Heydər Əliyev məktəbinin ən yaxşı şagirdi, davamçısıdır. Təkcə ziyalı yox, Əməkdar elm xadimi, Dövlət mükafatı laureatı, filologiya elmlər doktoru kimi son vaxtlar türkçülük, Azərbaycançılıq, Turançılıq mövzusunda yazılar yazıram. İlham Əliyev nəinki Azərbaycanın, hətta Turanın lideri olmağa layiqdir. Turan hələ idealdır, gerçəyə çevrilməyib. Allahın izni ilə yolumuz Turanadır. İlham Əliyevin Orta Asiya respublikalarına səfərləri baş tutdu. Türk Xalqları Birliyini yaratmaq ideyası ilə ortaya atılıb. Biz onu dəstəkləməliyik. İstəyiriksə ki, bütün dövlətlərdən güclü olaq, onda türkçülüyü, Turançılığı, Azərbaycançılığı və İlham Əliyevi dəstəkləməliyik”.

Aytəkin Qardaşova

Tarix: 13 Dekabr 2022, 10:29

Xəbər lenti