Abşeron Rayon Məhkəməsində əmlakı qəsdən məhv etmədə təqsirləndirilən Vüsal Qarayevin (soyadı şərti) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Şövkət Nəcəfovanın sədrliyi ilə keçirilən prosesdə hökm oxunub.
Məhkəmənin hökmü ilə o, 3 il müddətinə azadlıqdan məhrum edilib. Vüsal Qarayev məhkəmə zalından həbs olunub.
İttihama görə, təqsirləndirilən şəxs vahid qəsdlə qaynanası zərərçəkmiş Tahirə Həsənova (şərti) və qaynı zərərçəkmiş Tahir Həsənovun (şərti) əmlakını yandırmaqla qəsdən məhv etmək qərarına gəlib. Bu məqsədlə o, yanacaqdoldurma məntəqəsindən hər birində bir litr olmaqla iki butulka benzin alaraq Tahirə Həsənovanın Abşeron rayonu, Saray qəsəbəsi, 20 Yanvar küçəsi 2 saylı yaşayış binasının birinci mərtəbəsində yerləşən 2500 manat dəyərində 2 saylı mənzilin qarşısına gələrək, yerdən götürdüyü daşla mənzilin pəncərəsinin şüşəsini sındırıb. Daha sonra Vüsal bir ədəd butulkadakı benzini alışdırmaqla mənzilin pəncərəsinin şüşəsini sındırdığı yerdən içəri ataraq mənzildə yanğın törədib. Mənzilin 150 manat dəyərində pəncərəsi, pəncərənin 1500 manat dəyərində olan pərdəsi, pəncərənin aşağı hissəsində 50 manat dəyərində olan divar kağızları yansa da, mənzildə yanğın kənar müdaxilə olmadan söndürülüb. Nəticədə Tahirə Həsənovaya məxsus 25000 manat dəyərində mənzili və mənzilin yataq otağının 90 manat dəyərində olan lüstüru, iki ədəd hər birinin qiyməti 750 manat olan pərdələri, 300 manat dəyərində olan güzgülü kamot, üç ədəd ümumilikdə qiyməti 200 manat olan dolab dəsti, 50 manat dəyərində uşaq oyuncaqları, 600 manat dəyərində mətbəxt mebeli, 400 manat dəyərində taxt olmaqla cəmi 28140 manat dəyərində xeyli miqdarda əmlakını yandırmaqla bilavasitə qəsdən məhv etməyə cəhd edib.
Bundan sonra, Vüsal vahid qəsdlə əhatə olunan əməlini davam etdirərək həmin gün saat 20:40- də Abşeron rayonu, Saray qəsəbəsi, İ.Hüseynov küçəsi 53 saylı evin qarşısına gələrək orada qaynı Tahirə məxsus küçədə saxlanılan 15000 manat dəyərində olan “BMW 6” markalı avtomobilin üzərinə özü ilə bir litrlik plasmas butulkada gətirdiyi benzini tökərək alışqanla yandırıb. Lakin yaxınlıqda olan şəxslər tərəfindən yanğın söndürüldüyündən bilavasitə cinayəti törətməyə yönəlmiş qəsdən edilən əməli iradəsindən aslı olmayan səbəblərə görə başa çatdıra bilməyərək zərərçəkmişə 15000 manat dəyərində, avtomobilini yəni xeyli miqdarda əmlakını vahid niyyətlə yandırmaqla məhv etməyə cəhd edib.
