Aprelin 26-da Avropa Birliyinin, Avropa Şurasının və Sosial Tədqiqatlar Mərkəzinin (STM) "Azərbaycanda kıbercinayət və kıbertəhlükəsizlik barometri" birgə tədqiqat layihəsinin nəticələrinə dair "Ölkə üzrə kibercinayətlərə və kibertəhlükəsizliyə ictimai rəydə münasibət" mövzusunda konfrans keçirilib.
Pravda.az xəbər verir ki, konfransın əvvəlində STM-in İdarə Heyətinin sədri, Milli Məclisin komitə sədri Zahid Oruc mövzu ilə bağlı geniş çıxış edib.
Z.Oruc bildirib ki, Vətən müharibəsində parlaq Qələbəmiz ölkənin Birinci şəxsi, Prezident İlham Əliyevin informasiya məkanında fasiləsiz hücum əzmi ilə yanaşı, fəzada aparılan süni intellekt savaşı ilə mümkün olub: “Lakin post-müharibə reallığı-Azərbaycanın hazırkı geosiyasi mövqeyi, hərbi potensialı, fəal xarici siyasəti cari və perspektiv təhlükəsizlik təhdidlərini artırır. Vətən müharibəsi dövründə Ermənistandan ölkəmizin maliyyə/bank sisteminə edilən hücumları hamıya məlumdur. Hazırda Azərbaycanda vətəndaşlara vacib xidmətlərin böyük bir qismi rəqəmsallaşdırılıb. Maraqlı qüvvələr Azərbaycan gəncləri arasında yad dini-ideoloji təbliğatda yeni texnologiyalardan istifadə edirlər. Virtual məkan burada sui-istifadə edilir. Bir çox faktlar göstərir ki, uşaq və gəncləri hədəfə alan məqsədyönlü fəaliyyətlər çoxluq təşkil edir. İndi Laçın və bütün coğrafi sərhədlərimizdə qurulan istehkamlar virtual sərhədlərimizin qorunması ilə birlikdə aparılmalıdır. Davam edən Rusiya-Ukrayna müharibəsi göstərdi ki, savaş-torpaqla yanaşı, daha çox kritik infrastrukturlara qarşı aparılır. Dövlət strukturlarında xarici proqram təminatlarının, İT həllərin və anti-virusların tətbiqi yeni bayraktarlar və haroplar qədər vacibdir”.
