TƏBİB-in rəsmisi Yaqut Qarayeva deyib ki, insanlar karantinlə bağlı qaydalara əməl etmir, heç kəs maska taxmaq istəmir. Əgər yoluxma halları artsa, hər hansı regionda, yaxud bütövlükdə ölkə ərazisində karantin rejimi sərtləşdirilə bilər.
Milli Strateji Düşüncə Mərkəzinin növbəti onlayn toplantısında bu məsələ müzakirə edilərkən belə bir ümumi rəy oldu ki, insanlar illər ərzində aparılan rəsmi təbliğata inanmadıqlarından əhali arasında pandemiya təhlükəsi də ciddi qarşılanmır.
Bakıda marşrut avtobuslarının mütləq əksəriyyətində sosial məsafənin gözlənilmədiyi, bəzi hallarda isə əməlli başlı basabas olduğu faktdır. Dünən bərbərxanada fasiləsiz öskürməkdə davam edən bərbər, hətta mənim iradımdan sonra da maska taxmadı. Hamı bir-birini inandırmağa çalışır ki, guya bütün bu karonavirus söhbətləri bir uydurmadır, nəsə beynəlxalq səviyyədə qurulmuş bir fırıldaqdır və sair.
Aprelin ilk yarısında Bakıda insanlar həqiqətən karantin tələblərinə ciddi əməl etdi və bu səbəbdən vəziyyət yaxşılığa doğru xeyli dəyişmişdi. Bu günkü rəqəmlər göstərir ki, vəziyyət artıq pisləşməyə doğru gedir. Son günlərdə yol verilən kütləvi məsuliyyətsizliyin acısını virusun inkubasiya dövrü bitəndən sonra yaxın günlərdə daha qabarıq hiss edəcəyik. Allah eləsin, belə olmasın. Amma görünən odur ki, yoluxma halları və müvafiq olaraq ölüm halları artmaqda davam edəcək.
