2022-ci il noyabrın 11-də Bakının Sabunçu rayonu Maştağa qəsəbəsi, Savalan yeni yaşayış massivində 1984-cü il təvəllüdlü Sevinc Müseyibova qətlə yetirilib. Məlumatla əlaqədar dərhal prokurorluq və polis əməkdaşları məhkəmə-tibbi ekspertinin iştirakı ilə hadisə olan evə baxış keçirilib.
Faktla bağlı Sabunçu Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
Hadisəni törədən 1978-ci il təvəllüdlü Vidadi Müseyibov isti izlərlə saxlanılıb.
Lent.az məlum qətl hadisəsinin istintaq materiallarını əldə edib.
İstintaqla müəyyən edilib ki, Vidadi Müseyibov Rusiya Federasiyasının Moskva şəhərində olduğu müddətdə, arvadı Sevinc Müseyibova onun telefon zənglərinə tez-tez cavab verməyib, aktiv şəkildə sosial şəbəkədən istifadə edib. Bununla belə, 2022-ci il noyabrın 10-da V.Müseyibovun oğlu ona anasının əvvəllər iş yoldaşı olmuş Rövşən Məmmədovla telefon əlaqələrinin olması barədə məlumat verib. Bütün bunlardan sonra V.Müseyibov arvadının ona xəyanət etməsindən şübhələnib.
Baş verənləri aydınlaşdırmaq üçün noyabrın 11-də təyyarə ilə Bakıya gəlib, Savalan qəsəbəsində yerləşən kafedə spirtli içki qəbul edib, həyat yoldaşının işdən evə qayıtmasını gözləyib. Saat 21 radələrində orta dərəcəli sərxoş vəziyyətdə evə gələrək, arvadından kiminlə münasibətdə olduğunu soruşub, SMS yazışmalarına baxması üçün mobil telefonunu ona verməsini tələb edib.
Sevinc Müseyibova əlində saxladığı telefonu ona verməkdən imtina etdikdə, sağ əli ilə qadının üzünə yumruqla zərbə vurub, telefonu zorla əlindən alıb. O, arvadının Rövşən Məmmədovla "WhatsApp" tətbiqində yazışmaları olduğunu görüb, xəyanətinə əmin olaraq, qısqanclıq zəminində onu öldürmək qərarına gəlib. Bıçaqla müstəsna dərəcədə rəhmsizliklə əvvəlcə evin dəhlizində, sonra isə arxasınca qaçıb, həyət qapısının qarşısında ümumilikdə 13 dəfə zərbə vuraraq, arvadını öldürüb.
İş üzrə dindirilmiş Vidadi Müseyibov bildirib ki, hadisədən təxminən doqquz ay əvvəl tikinti sahəsində işləyib, pul qazanmaq üçün Moskva şəhərinə gedib. Demək olar ki, hər gün, həyat yoldaşı və uşaqları ilə telefonla əlaqə saxlayıb, pul köçürmə sistemi vasitəsi ilə onlara pul göndərib:
"Təxminən son 2-3 ay ərzində arvadımın mənə qarşı münasibətinin soyuduğunu hiss etdim. Gah zənglərimə cavab vermirdi, gah da "WhatsApp" tətbiqi vasitəsi ilə danışarkən tez-tez görüntünü bağlayırdı.
Noyabrın 10-da kiçik oğlum mənə görüntülü zəng edib, anasının Rövşən adlı keçmiş iş yoldaşı ilə tez-tez telefonla əlaqə saxladığını dedi. Hətta onların arasında olan səs yazılarını da mənə göndərdi. Oğluma heç nə etməməsini tapşırdım, dedim ki, özüm evə qayıdıb məsələni aydınlaşdıracam. Növbəti gün, təyyarə ilə Bakıya gəldim, yaşadığım qəsəbədə kafedə yemək yeyərkən, 200 qram araq içdim. Saat 21 radələrində evə gələndə, qapını açan Sevinc məni görüb təəcübləndi.
Əlindəki telefonu mənə verməsini tələb edəndə, arvadım üzü hamam otağına tərəf qaçdı. Arxasınca qaçıb sağ əlimlə saçından tutdum, sol əlimlə üzünə yumruqla zərbələr vurdum. Sonra isə zorla telefonu dartıb əlindən aldım. "WhatsApp" tətbiqinə baxanda, həqiqətən də onun Rövşən adlı şəxslə yazışdığını gördüm və qəzəblənərək, aqressiv şəkildə Sevincdən "bu nə danışıqlardı" deyə soruşdum. Aralarında yaxın münasibət olub-olmadığını soruşduqda, yoldaşım bunu inkar edərək, oğlumun ona şər atdığını dedi. Bıçaqla arvadımın arxasınca qonaq otağına girib, ona zərbələr vurmağa başladım. Sevinc müqavimət göstərərək, pəncərədən həyətə tullandı. Bunu görüb dərhal həyətə çıxdım və qapıdan qaçmağa çalışan yoldaşımı tutaraq, bıçaqlamaqda davam etdim. Bu zərbələrdən sonra Sevinc bir neçə addım atıb yerə yıxıldı. Özümə gələndə evin yaxınlığında oturduğumu və üzərimə yağış yağdığını xatırlayıram. Saat 21:50-də Daxili İşlər Nazirliyinin 102 xidmətinə zəng etdim. Lakin telefonda Rusiya mobil operatoruna məxsus nömrə olduğundan zəng alınmadı. Bundan sonra həmin quruma Sevincin telefonu ilə zəng edərək, adam öldürdüyümü bildirdim. Bir azdan hadisə yerinə gələn polis əməkdaşlarına təslim oldum".
Zərərçəkmiş şəxsin hüquqi varisi Vahid Xankişiyev ifadəsində göstərib ki, qızı Sevinc 2000-ci ildə Vidadi Müseyibovla ailə həyatı qurub, bu nikahdan üç övladları dünyaya gəlib:
"2015-ci ildə maddi vəziyyətləri pis olduğundan Sevinc metronun "Koroğlu" stansiyasının yaxınlığında yerləşən şirkətdə aşpaz köməkçisi, 2021-ci ildə evlərinin yaxınlığındakı tikiş sexində dərzi, son aylarda isə Bilgəh qəsəbəsində yerləşən fərdi evdə xadimə işləyib. Sevincin Vidadi ilə münasibəti bu illər ərzində yaxşı deyildi, daim evlərində söz-söhbət olurdu.
Qızım dəfələrlə acıq edib, evimizə gəlib. Hətta 2022-ci ilin yanvar ayında, boşanma ilə bağlı Xəzər rayonunda yerləşən Mediasiya Şurasına müraciət etsək də, Vidadi üzrxahlıq edib və arvadı ilə barışıb. Noyabrın 11-də evdə olanda oğlum bizə gəlib Vidadinin Sevinci bıçaqla vurduğunu xəbər verdi. Taksi ilə 3 saylı şəhər Kliniki Xəstəxanasına çatanda həkimlərdən qızımın öldüyünü öyrəndim".
