Ayaqları tutulan Məsumə Babayeva: “Əməyimdən istifadə edib, özlərinə bahalı ev aldılar”

“Mədəniyyət Nazirliyi vəziyyətimdən xəbərdardır, amma heç nə etmir. Bir dəfə Qurban bayramında evə qurbanlıq payı göndərdilər. Ondan sonra səs-səmirləri kəsildi. Heç kim mənimlə əlaqə saxlamayıb. Elə bil ki, yoxam bu dünyada. İllərlə çalışdığım, hazırda isə yaşıma görə çıxdığım Gənc Tamaşaçılar Teatrının Həmkarlar İttifaqı yanvar ayında yardım məqsədi ilə mənə bir qutu ərzaq göndərdi (makaron, vermişel, çay, qənd və s.). Ondan sonra heç kim mənimlə nə maraqlanır, nə də hansısa maddi yardım edir.

Mən yaşıma görə müəyyən miqdarda təqaüd alıram. Amma aktrisalıq fəaliyyətimlə bağlı heç bir təqaüd almıram. Mənimlə nə maraqlanan var, nə də bu haqda danışmaq istəyirəm”.

Məsumə Babayeva onu seriallara çəkən rejissorlardan da gileylənib. Aktrisa deyib ki, onlar səhhətinin ağırlaşdığını bildikdən sonra onunla bütün əlaqəni kəsiblər:

“Bir çox seriallara çəkilmişəm. Amma o serialların rejissorları bir dəfə də olsun zəng vurub mənimlə maraqlanmırlar. Onlar mənim əməyimdən istifadə edib, özlərinə bahalı avtomobillər və ev aldılar. Şəraitlərini düzəltdilər. Mənim ağzıma isə bir tikə atırdılar ki, danışma, sus. Zəhmətimi əlimdən alırlar, amma əvəzində heç nə vermirlər.

Deyəndə ki, xəstəyəm, bununla da hər şey bitir. Rejissorlara dedim ki, xəstəyəm, məni seriala çağırmayın. Ondan sonra bir adam da tapılmadı ki, maraqlansın, varam, yoxsa yoxam”.

Sənətkar gününü televizora baxaraq keçirdiyini söyləyib:

“Oturmuşam evdə, günümü elə televizora baxa-baxa keçirirəm. Bütün gün uzanıram. Evin içində ayağa durub, gəzə bilirəm. Amma uzun məsafə gedə bilmirəm. Stulda da çox oturanda ayağımdakı damarlar işləmir. Gərək uzanım ki, qan damarlarda dövrə etsin. Ona görə mənə çox çətindir”.

Qeyd edək ki, ötən il Məsumə Babayevanın sinəsində şiş aşkarlandığı üçün əməliyyat olunmuşdu. Əməliyyat zamanı isə onun süd vəziləri xaric edilmişdi.