Nərimanov Rayon Məhkəməsində oliqarx, SOCAR-ın sabiq vitse-prezidenti Mikayıl İsmayılovun keçmiş gəlini Fidan Abbasovaya qarşı iddia üzrə məhkəməyə hazırlıq iclası keçirilib.
Hakim Nərgiz Tağıyevanın sədrliyi ilə keçirilən iclasda Fidan Abbasovanın vəkilləri aidiyyət məsələsini qaldırıblar.
Bildiriblər ki, vəkil Adəm Məmmədov Fidan Abbasovaya qarşı şərəf və ləyaqətin alçaldılması üzrə iddianı Nərimanov Rayon Məhkəməsinə təqdim edib. Fidan Abbasova isə Xətai rayonu ərazisində qeydiyyatda olmaqla oradakı mənzilində yaşayır. Buna görə də iddiaya aidiyyəti üzrə Xətai Rayon Məhkəməsində baxılmalıdır. Hakim Nərgiz Tağıyeva vəkillərin etirazını əsaslı sayıb və iddiaya baxılması üçün Xətai Rayon Məhkəməsinə göndərilməsi barədə qərar qəbul edib.
Fidan Abbasovanın anası Ülkər Abbasova Musavat.com-a qızına qarşı iddiaların əsassız olduğunu, onu susdurmağa yönəldiyini deyib:
“Mənim nəvəmin taleyi ilə oynayırlar, alver ediblər. Bu gün də Fidana qarşı bir neçə iddia qaldırmaqla uşağın taleyi ilə bağlı yaratdıqları süni maneələrin aradan qaldırılmasına əngəl törətməyə çalışırlar. Xətai Rayon İcra Şöbəsinin məmuru Xatir Məmmədov qarşı tərəfin maraqlarından çıxış edir. Qızım barəsində yalandan əsas yaradıb axtarış elan etmişdi. Guya qızıma çağırış göndərib, guya qapımıza gəlib qapını açmamışıq. Halbuki qızımın vəkilləri ona dəfələrlə zəng etmişdilər, biz də evdə olmuşuq. Ona görə də Xatir Məmmədovun hərəkətlərinin qanunsuz hesab edilməsi, barəsindəki axtarış haqqında 17 may 2024-cü il tarixli qərarın ləğv edilməsi barədə şikayətə baxıldı. Məhkəmə Fidan Abbasovanın şikayətini araşdıraraq belə qərar gəldi ki, icra məmuru Xatir Məmmədov icra sənədi üzrə əsassız olaraq onun barəsində axtarış qərarı qəbul edib. Məhkəmə qərardadında yazdı ki, icra məmuru qanunsuzluğa yol verib, qızım barəsində heç bir qanuni əsas olmadan, qanunsuz olaraq həbsli axtarış qərarı verib. İcra məmuru Xatir Məmmədov qızıma heç bir halda rəsmi heç bir bildiriş təqdim etməyib, yaşadığımız ünvana gəlməyib. Buna baxmayaraq qızım Fidan Abbasovanın qeydiyyatda olduğu ünvanda yaşamadığı ilə bağlı əsassız akt tərtib edib. İcra məmuru Xatir Məmmədov qərəzli hərəkətlər edərək qızım barəsində əsassız olaraq təqdimat vermişdi. Sağ olsun ədalətli məhkəmə, Xatir Məmmədovun əsassız qərarını ləğv elədi. O zaman da bu sayaq nəvəmin övladlıq məsələsini əngələ salmışdılar. Qızımın adından Sabunçu Məhkəməsinə Ruslan adlı şəxs iddiadan imtina sənədinə qol çəkmişdi. Bunların bir istəyi var – qızımın övladı ilə bağlı iddiasına baxılmasın”.
Ülkər Abbasova bildirib ki, Sabunçu Rayon Məhkəməsinin 2(008)-2074/2017 saylı, 12 may 2017-ci il tarixli qərardadından 3 oktyabr 2023-cü il tarixdə şikayət vermək üçün buraxılmış müddətin bərpa olunması barədə qızı ərizə verib.
Sabunçu rayon Məhkəməsi ərizəni təmin etməyib. Bakı Apellyasiya Məhkəməsinə müraciət olunub. Bakı Apellyasiya Məhkəməsinin 2(103)-1885/2024 saylı qərardadı ilə Bakı şəhəri Sabunçu Rayon Məhkəməsinin 2(008)-2074/2017 saylı işi üzrə 30.10.2023-cü il tarixli qərardadı ləğv olunub. Müddət bərpa edilib və ərizəyə baxılması üçün mülki işin Sabunçu Rayon Məhkəməsinə göndərilməsi qərara alındı.
Ülkər Abbasova bildirib ki, Bakı Apellyasiya Məhkəməsi Sabunçu məhkəməsinin qarşısına bir sıra tapşırıqlar da qoyub. Ülkər Abbasova deyib ki, qızının iddiasına Sabunçu Rayon Məhkəməsində hakim Ruslan Mirzəliyevin sədrliyi ilə iyulun 12-də baxılacaq.
Xatırladaq ki, Fidan Abbasovanın vəkili Ziya Ələsgərov Musavat.com-a demişdi ki, müvəkkilinə qarşı qanunsuz addımlar atılır.
Vəkil bildirmişdi ki, Xətai Rayon Məhkəməsində qarşılıqlı iddiaya baxılarkən qarşı tərəf vəsatətlə çıxış edib və işə mahiyyəti üzrə baxış sonuclanana qədər Fidan Abbasovaya sosial şəbəkələrdə və KİV-də Orxan İsmayılzadə barəsində şəxsi məlumatların paylaşılmasının qadağan edilməsini xahiş edib. Məhkəmə vəsatəti təmin edərək bu barədə qərardad çıxarıb. Vəkil bildirib ki, Fidan Abbasova Orxan İsmayılzadə barəsində şəxsi məlumatları deyil, özünün hədələnməsi, aldadılması, övladının ata adının təmin edilməsi, aliment tələbindən danışıb və bunlar heç bir halda Orxan İsmayılzadənin şəxsi məlumatları hesab edilə bilməz. Orxan Mikayıl oğlu İsmayılzadə ona qarşı Xətai Rayon Məhkəməsinə şərəf, ləyaqətə və işgüzar nüfuza zərər verilməsinə dair iddia təqdim edib.
Orxan Mikayılzadə məhkəməyə şikayətində Fidan Abbasovanı övladının atasının onun olmasını bildirməklə şər atdığını, onun şərəf və ləyaqətini alçaltdığını iddia edib. Xətai Rayon Məhkəməsində Orxan İsmayılzadənin şikayətini araşdıran hakim Aygün Həsənova obyektiv qərar verilməsi üçün bioloji qohumluğun təyini – atalıq testi təyini haqda qərardad verib. Qərardad icra olunması üçün Məhkəmə Tibb Ekspertizası(MTE) və Pataloji Anatomiya Birliyinə (PAB) həvalə olunub. Bioloji qohumluğun təyini – atalıq testi – DNT-nin keçirilməsinin zamanı haqda tərəflərə məlumat verilib. Lakin Orxan İsmayılzadə ekspertizanın keçirildiyi ünvana gəlməyib.
Həmin gün Musavat.com-a açıqlama verən Fidan Abbasova bildirib ki, məhkəmə qərardadı əsasında ekspertizanın keçirildiyi MTE və PAB-ın Bakı şəhəri, Mərdanov qardaşları 131 ünvanında yerləşən inzibati binasına gəlib. Özü ilə övladı Nili də gətirib.
