Bakı Ağır Cinayətlər Məhkəməsində hakim Azad Məcidovun sədrliyi ilə "Urmedhelp” və “My Doc Tour” adlı şirkətlərin sahibi Nuridə Seyidova və digər iki nəfər – Aynur Bayramova ilə Aysel Məmmədovanın cinayət işi üzrə məhkəmə prosesi davam edir. Hakim qarşısına çıxarılan müttəhimlər talassemiyadan əziyyət çəkən uşaqlar üçün toplanmış vəsaitləri dələduzluq yolu ilə ələ keçirməkdə ittiham olunurlar.
Prosesdə Dövlət Vergi Xidməti və Əmək Müfəttişliyinə məhkəmə tərəfindən göndərilən sorğulara cavablar açıqlanıb. Əmək Müfəttişliyinin məktubunda göstərilib ki, təqsirləndirilən şəxslərdən Nuridə Seyidova ilə bağlı əmək müqaviləsi və digər məlumatlar sistemdə yoxdur. Nuridə Seyidova isə özü haqqında sistemdə məlumat olmamasını xarici ölkənin vətəndaşı olması ilə izah edib. Digər təqsirləndirilən şəxslər – Aysel Məmmədova və Aynur Bayramovanın əmək müqavilələri haqqında isə məhkəməyə məlumat verilib. Dövlət Vergi Xidmətinin cavab məktubunda isə yazılıb ki, “My Doc Tour” və “Urmedhelp” MMC-lərdə faktiki kassa aparatları quraşdırılmayıb: “Yalandan vətəndaşları aldadıb, onlara qəbzlər vermisiniz. Sizin rəhbərlik etdiyiniz MMC-lərin heç kassa aparatı da olmayıb. Bununla bağlı Dövlət Vergi Xidməti məhkəməyə 72 vərəq hesabat göndərib. Hesabatlarda 5-6 manat pul yazmısınız, amma yüzminlərlə vəsait olub”.
Hakim daha sonra zərərçəkmişlərdən Tural Nəsmiyevin məhkəməyə göndərdiyi mülki iddianı elan edib. Zərərçəkmiş mülki iddia ərizəsində göstərib ki, 42 min 800 manat maddi, 8 min mənəvi ziyana görə, 264 manat isə mülki iddia üçün ödədiyi dövlət rüsumunu tələb edir. Onun hər 3 təqsirləndirilən şəxsdən ümumi tələbi 51 min 40 manatdır. Zərərçəkmiş mülki iddiasında yazıb ki, bu məbləği 3 təqsirləndirilən şəxsdən müştərək qaydada tələb edir. Aynur Bayramovanın vəkili Elnur Quliyev mülki iddianın onun müvəkkilinə aid edilməsinə etirazını bildirib. Vəkil qeyd edib ki, Aynur Bayramovaya zərərçəkmiş Tural Nəsmiyevin övladıyla bağlı ittiham verilməyib: “Ona görə də bu hissədə mülki iddia geri qaytarılmalıdır”. Aysel Məmmədova da mülki iddiaya etiraz edib. O bildirib ki, zərərçəkmiş Tural Nəsmiyev istintaqda ona qarşı şikayət və tələbinin olmaması barədə ərizə verib: “Dayım ona 10 min ödəniş etmişdi, o da şikayət və tələbi olmaması barədə ərizə vermişdi”. Zərərçəkmiş isə deyib ki, o, istintaqdakı ərizəsində şikayətçi olmadığını yox, 10 min manat aldığını, qalan məbləği də tələb etdiyini yazıb. Müzakirələrdən sonra mülki iddianın icraata götürülməsinə qərar verilib. Digər zərərçəkmiş Aysel Abdullayeva isə bu işin daha dərindən araşdırılmasını, təqsiri olan başqa şəxslərin də dairəsinin müəyyənləşdirilməsini istəyib. O bildirib ki, təqsirləndirilən şəxslərə qanunsuz olaraq, Talassemiya Mərkəzinə giriş və oradan məlumatlar, sənədlər əldə etmək imkanı yaradılıb: “Talassemiya Mərkəzi qapalı müəssisədir. Aynur Bayramova oradan xəstələrin qan nümunələrini, onların sənədlərini necə götürüb? Bunlar araşdırılmayıb. Bu adamların havadarları var. Onları tapıb cəzalandırmaq lazımdır”.
Daha sonra Nuridə Seyidova prokurorun, vəkillərin suallarını cavablandırıb. O, suallara cavaba başlayarkən məhkəmənin nəzərinə çatdırıb ki, bugünlərdə anası dünyasını dəyişib, lakin övlad olaraq, onun dəfnində, yas mərasimində iştirak edə bilməyib. Nuridə Seyidova onu da qeyd edib ki, toplanan vəsaitlər hesabına beş nəfər talassemiyalı uşağın tam müalicəsi həyata keçirilib. O, bir neçə ad sadalasa da, hakim ondan bunu təsdiqləyən sübutlar, ətraflı məlumatlar istəyib. Bu yerdə zərərçəkmişlərdən biri Natiq Qubadov onun dediklərinə etiraz edib: “Bu, dələduzdur, deyir ki, anam rəhmətə gedib. Allah rəhmət eləsin. Amma onun anası müəyyən yaşa dolmuşdu, amma zərərçəkənlərin övladları uşaqdır. Bu yaxınlarda 12 yaşında bir uşaq rəhmətə getdi. Zərərçəkmişlərdən Elman Nuriyev məhkəməyə gəlmir, çünki uşağın vəziyyəti çox ağırdır. Talassemiya xəstəliyi bilirsiniz nədir? Mütəmadi qan vurulmalıdır. Bəzən elə olur ki, artıq bədən başqasının qanını qəbul eləmir. Bizim pulumuz hesabına yaşayıblar. Bunların havadarları kimlərdir? Onlara arxayındılar. Bu iş üzrə istintaq da düzgün aparılmayıb. Baş Mütəşəkkil Cinayətkarlıqla Mübarizə İdarəsində Əhəd müəllim işi düzgün araşdırmayıb. Mən özüm keçmiş polis işçisiyəm, 23 yaşından müxtəlif dövlət qurumlarında xidmət etmişəm. 4 ildir uşağıma görə yata bilmirəm. Kömək üçün ağız açmaq da ağırdır. Dost-tanış, qohumlar toplaşdılar, pul yığdılar. Bunun kimilərə edam cəzası verilməlidir. Talassemiya xəstələri üçün donor tapmaq çox çətindir. Elmanın övladına donor tapılıb, övladının yaşaması üçün şans yaranıb. Amma pulu yoxdur ki, gedib əməliyyat elətdirsin”.
Hakim bildirib ki, təqsirləndirilən şəxslərin dindirməsi başa çatandan sonra zərərçəkmişlərə də ətraflı ifadə vermək üçün şərait yaradılacaq: “Biz Cinayət-Prosessual Məcəlləsi əsasında məhkəmə prosesi aparırıq. Təqsirləndirilən şəxslərin dindirməsi başa çatandan sonra siz də ətraflı ifadə verəcəksiniz”.
Nuridə Seyidova zərərçəkmişlərdən alınmış vəsaitlərin və pulların kimlər arasında bölünməsi barədə danışarkən Natiq Qubadov yenidən əsəbiləşib: “Mənim xəstə balamın pulunu yemisən. Sən yaşamalı deyilsən. Sən buradan çıxsan belə, səni yaşatmayacam. Hətta tutulmağım bahasına olsa belə...”
Bundan sonra Nuridə Seyidova yenə də vəkillərin suallarını cavablandırıb. O bildirib ki, xəstələrin yaxınlarından alınmış vəsaitlər 4 nəfər arasında bölünüb. Onların üçü hazırda məhkəmə qarşısında dayanan şəxslərdir: “Mən, Aynur Bayramova, Aysel Məmmədova və Turan xanım...”
Aysel Məmmədova isə xəstə yaxınlarının aldadılıb, onların pullarının ələ keçirilməsi ilə bağlı ünvanına səslənən ittihamı qəbul eləməyib. O deyib ki, şəxsən onun xəstə yaxınlarından aldığı vəsaitlər depozitə qoyulub, əməliyyat baş tutandan sonra ona çatan hissəni götürürüb. O, əlavə edib ki, Nuridə Seyidova yalan danışır: “Mən biləndə ki, bu, xəstələri aldadıb, özüm votsap qrupunda zərərçəkmişlərə dedim ki, gedib şikayət eləsinlər”.
İttihama görə, talassemiyalı xəstələrin valideynlərinin Daxili İşlər Nazirliyinə müraciətindən sonra ötən ilin fevralında cinayət işi başlanılıb.
