Vikipediya dünyanın ən böyük açıq onlayn ensiklopediyasıdır. Hazırda Azərbaycanca Vikipediyada 199.120 məqalə mövcuddur. Azərbaycan informasiya resurslarının Vikipediyadakı vəziyyəti son zamanlar geniş müzakirə mövzusuna çevrilib. Ekspertlər bildirirlər ki, Azərbaycanca Vikipediyanın inkişafı istiqamətində Fəaliyyət Planının, bu sahənin inkişafını təmin etmək üçün təkliflər paketinin hazırlanmasına, problemlərin və onların həlli yolları istiqamətində mütəxəssislərin cəlbinə böyük ehtiyac var.
Mövzu ilə bağlı Pravda.az-a fikirlərini bölüşən Milli Məclisin deputatı Naqif Həmzəyevin sözlərinə görə, Vikipediya sahəsində uzun illərdir, problemlər mövcuddur.
“Xüsusilə, Vikipediyanın açıq ensiklopediya olması, eyni zamanda erməni əsilli mütəxəssislərin orada daha çox sayda təmsil olunmaları vəziyyəti daha da gərginləşdirir. Eyni zamanda Azərbaycan həqiqətlərini tanıdan məqalələrin silinməsi, təhrif və ya düzəlişlərin edilməsi də məhz həmin qüvvələr tərəfindən həyata keçirilib. Bunları bilsək belə, çox təəssüf ki, boşluğu doldurmaq üçün sistemli işlər görə bilməmişik. İstənilən məqaləni, yazını dəyişmək, silmək, şikayət etmək mümkündür. Biz dəfələrlə Azərbaycanla bağlı yanlış informasiyaların məhz Vikipediyada yayılmasına şahidlik etmişik. Əsasən kitabxana sistemləri vasitəsilə kitabxanalarda müxtəlif vəzifələr tutan şəxsləri məhz işlərə cəlb etməklə Vikipediyadakı boşluqları doldurmağa çalışmışıq. Təbii ki, bu da o qədər böyük effekt verməyib. Könüllü vikipediyaçılar da boş vaxt tapdıqda xüsusi məqalələrin yerləşdirilməsi, düzəlişlərin edilməsi məsələləri ilə məşğul olublar. Könüllülər də bir müddət sonra başqa işlər tapırlar, karyeralarında yüksəliş olur və avtomatik şəkildə könüllülük fəaliyyətlərini dayandırmalı olurlar, yaxud fəaliyyətləri zəifləyir. Ümumiyyətlə, açıq ensiklopediya məkanlarında sistemli fəaliyyət təşkil etməliyik. Çalışmalıyıq ki, bu sahədə konkret mütəxəssislər yetişdirən və onların fəaliyyətini mütəmadi dəstəkləyən bir iş olsun. Belə olan halda mütəxəssislər bu fəaliyyətə ciddi yanaşacaqlar. Könüllülükdən başlayan bu fəaliyyət sonradan işə çevriləcək. Nəticə etibarilə, Vikipediyada daha güclü ola biləcəyik. İnanıram ki, Vikipediyada məqalələr dərc edən, tərcümə edən, onların müxtəlif dillərdə təbliğ edilməsinə töhvə verə biləcək şəxsləri qoruyub saxlaya biləcək, onların bilik və bacarıqlarını yeni gələn gənclərə ötürəcəyik. Vikipediya mütəxəssisləri ilə yanaşı hər bir Azərbaycan vətəndaşı da fəal olmalıdır ki, məhz Vikipediya və buna bənzər platformalarda aktivlik nümayiş etdirək, bacardığımız qədər Azərbaycan həqiqətlərinin doğru-düzgün təbliğ edilməsinə töhvə verək”, - deputat bildirib.
N.Həmzəyev təklif edib ki, universitetlər də mütləq prosesə cəlb etməlidir: “Könüllülük fəaliyyəti ilə məşğul olan tələbələrin çoxluğunu nəzərə alsaq, düşünürəm, ali məktəblərdə daha çox vikipediyaçı yetişdirə bilərik. Belə olacağı təqdirdə daha çox könüllülərin cəlb olunmasını, məqalələrin və informasiyaların Vikipediya vasitəsilə yayılmasını təmin etmək olar. Düşünürəm, əla fürsət yaranıb ki, Vikipediyadakı boşluqları, nəhayət, hər kəs daha yaxşı dərk edir. Proseslərə daha ciddi yanaşaq. Azərbaycanda mövcud Vikipediya üzrə mütəxəssislər də doğru-düzgün fəaliyyət proqramı hazırlayaraq bütün universitet və kolleclərdə könüllü vikipediyaçıların yetişdirilməsinə nail ola bilərlər. QHT-lərin də bu proseslərdə aktiv olmaları vacibdir. Həm Gənclər Fondu, həm də Qeyri-Hökumət Təşkilatlarına Dövlət Dəstəyi Agentliyi, Elmin İnkişafı Fondu tərəfindən, bir sözlə, mövcud qrant verə, vəsait ayıra biləcək fondlar və təşkilatlar tərəfindən bu cür layihələr dəstəklənməlidir”.
