Bakı Apellyasiya Məhkəməsində kompüter sisteminə qanunsuz daxil olmada və kompüter sisteminə və ya kompüter məlumatlarına qanunsuz müdaxilədə təqsirləndirilən Ebrahimi Harris Mohamadın barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Fərid Əyyubovun sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
İttihama görə, İran vətəndaşı Ebrahimi Harris Mohamad “Deniz Egece Neuoroscience Academy” MMC-nin informasiya texnologiyaları sahəsində (İT) xidmətlər göstərib. Onunla bağlanmış əmək müqaviləsinə 08 oktyabr 2021-ci il tarixdə xitam verilib və o, bu barədə məlumatlandırılıb. Sonra Harris Ebrahimi MMC-nin kompyuter məlumatlarına və sosial şəbəkə profillərinə qanunsuz müdaxilə edərək daxil olub.
Cinayət materiallarında qeyd edilib ki, o, kompüter sisteminə daxil olmaq hüququ olmadan kompüter məlumatlarını ələ keçirmək və başqa şəxsi niyyətlə qəsdən daxil olub, onun kompüter məlumatlarını buna hüququ olmadığı halda qəsdən zədələyib, silib, korlayıb, dəyişdirib və bloklayıb.
