Emil Əhmədovun Aybəniz İsmayılovanın kadrı olması ilə bağlı deyilənlər həqiqəti əks etdirmir.
Bu barədə Pravda.az-a “Azərbaycan Dəmir Yolları” QSC-dən (ADY) bildirilib.
Qeyd olunub ki, E.Əhmədov ADY-də fəaliyyətə 2016-cı ildən, A.İsmayılova isə 2023-cü ildən başlayıb.
***
2025-02-13 18:21
“Azərbaycan Dəmir Yolları” QSC-də (ADY) kadr dəyişikliyi olub.
ADY-nin Yük daşımaları departamentinə rəhbərlik Samir Həziyevə həvalə olunub.
Samir Həziyev 1982-ci ildə anadan olub. 2000–2006-cı illərdə Azərbaycan Dövlət İqtisad Universitetinin "Beynəlxalq iqtisadi münasibətlər" ixtisası üzrə bakalavriat və magistratura pillələrini bitirib, daha sonra Dünya Bankının təqaüd proqramını qazanaraq ABŞ-nin Kolumbiya Universitetinin dövlət idarəçiliyi üzrə magistratura pilləsində təhsil alıb.
Əmək fəaliyyətinə 2004-cü ildən Azərbaycan Respublikası Mərkəzi Bankında iqtisadçı kimi başlayıb, sonra Fövqəladə Hallar Nazirliyində müxtəlif vəzifələrdə çalışıb.
2018-ci ildə ADY-də fəaliyyətə başlayıb. 2021-ci ildən İnfrastruktur departamentinin rəis müavini vəzifəsində işləyib.
Qeyd edək ki, Yük daşımaları departamentinin rəisi Emil Əhmədov karyerasında yeni mərhələyə başlamaq üçün ADY-dən ayrılıb.
Emil Əhmədov ADY-də 2016-cı ildə fəaliyyətə başlayıb, bir çox uğurlu layihələrin həyata keçirilməsinə və qurumun inkişafına böyük töhfə verib./Trend
Qeyd: E.Əhmədovun “Azərbaycan Dəmir Yolları” QSC-nin Kommunikasiya departamentinin rəhbəri vəzifəsindən nöqsanlara görə azad edilən Aybəniz İsmayılovanın kadrı olduğu bildirilir.
