“Kişi olsaydın, oğlun olardı” - 2 nəfəri başından güllələyən 60 ya...

Şəkidə iki nəfəri qətlə yetirməkdə təqsirləndirilən Namik Məmmədovun cinayət işi üzrə məhkəmə araşdırması başa çatıb. Məhkəmədə törədilən dəhşətli qətllərin təfərrüatı məlum olub.

Şəkinin Baş Şabalıd kəndində 60 yaşlı Namik Məmmədov həmkəndliləri 1966-cı il təvəllüdlü Sədiyev Azər Sədi oğlunu və 1957-ci il təvəllüdlü Məmmədsoy İsrafil Əhmədiyyə oğlunu güllələyərək qətlə yetirib.

İttihama görə, Namik Məmmədov əvvəlcə özünə məxsus torpaq sahəsində mal-qara otarmaqda günahlandırdığı İsrafil Məmmədsoyu öldürüb.

Sonra isə qonşusu Azər Sədiyevi güllələyib. Azər Sədiyevi isə daha əvvəl aralarında baş vermiş narazılığa görə öldürüb. Belə ki, Namik Məmmədov Azər Sədiyevin onu və ailə üzvlərini təhqir etdiyini, oğlan uşağı olmadığına görə onu ələ saldığını əsas gətirərək qətlə yetirib.

Qətlə yetirilənlərdən İsrafil Məmmədsoy Baş Şabalıd kəndində yerləşən tibb məntəqəsinin müdiri olub.

Namik Məmmədova qarşı Cinayət Məcəlləsinin 120.2.10-cu (xüsusi amansızlıqla iki və ya daha çox şəxsi öldürmə və xuliqanlıq niyyəti ilə, xüsusi amansızlıqla təkrarən qəsdən adam öldürməyə cəhd) maddəsi ilə ittiham irəli sürülüb.

Təqsirləndirilən şəxs qətli özünə məxsus ov tüfəngi ilə törədib. Həmin silahdan kənd ərazisindəki yırtıcı heyvanlardan qorunmaq üçün istifadə edirmiş.

Dindirilən zaman N.Məmmədov bildirib ki, qonşusu İsrafil Məmmədsoy tərəfindən təzyiqlərə məruz qalırmış:

“İsrafil Məmmədsoy qonşuluğa köçdüyü gündən ailəm və özüm dözülməz təzyiqlərə məruz qalmışıq. Yaşca böyük olduğuna görə ona cavab qaytarmamışam. Ancaq İsrafil bundan istifadə edirdi. Bilərəkdən həyətdə söyüş söyürdü. Onun üzünü görməmək üçün həyətdə 4 metr hündürlükdə hasar çəkdirdim. Ancaq İsrafil əl çəkmirdi. Həyətdə söyüş söyəndə odun doğrayan aləti işə salırdım ki, söyüşləri ailəm eşitməsin. İsrafilin qardaşlarına, oğluna, polisə bu barədə məlumatlar vermişəm.

İsrafil müxalifətçi idi. Həmişə məni hədələyirdi ki, hakimiyyətə gələndən sonra hamını həbs edəcək. Seçki məntəqəsinə üzv olduğuma görə Azər və İsrafil məni təhqir edirdilər”.

Hadisə günü baş verənlərdən danışan N.Məmmədov deyib ki, İsrafil onun pay torpağını yararsız hala salıbmış:

“Heyvanları torpağa salıb məhv etmişdi. Buna görə İsrafilə iradımı bildirdim. Mübahisə zamanı yenə məni təhqir etdi. Dözməyib onu vurdum”.

Azər Sədiyevi qətlə yeitrməsinin səbəbi haqda danışan N.Məmmədov söyləyib ki, uzun illərdir həmin qonşusu ilə də münasibətləri yaxşı olmayıb. İsrafili öldürdükdən sonra Azəri də öldürmək qərarına gəlib:

“3 il bundan əvvəl yaz aylarında Azər Sədiyev texnika gətirib mənim evimin qapısını sıyırmışdı. Bu vaxt Azərə irad tutdum. Dedi ki, yaxşı edirəm. Mənə və nəslimə satqın dedi. Azərlə küsülü olmağımıza baxmayaraq, oğlan övladım olmadığı üçün mənə söz atırdı. Deyirdi ki, sən kişi olsaydın, oğlun olardı.

Həmin gün İsrafili öldürüb evə qayıdırdım. Azəri həyətimdə görüb əsəbiləşdim. Əvvəlcə sinəsindən, sonra da başından vurdum”.

Onun sözlərinə görə, hadisədən sonra özünü də öldürmək istəyib:

“Tüfəngdəki cilizləri boşaltdım. İçinə patron doldurub sinəmə dayadım. Əlim tətiyə çatmadığı üçün tüfəngin lüləsi sürüşdü. Atəş açılsa da, mənə dəymədi”.

Suallara cavab verən N.Məmmədov hər iki qətlin səbəbi kimi mərhumların onu təhqir etməsini, şərəf və ləyaqətini alçaltmasını göstərib.

Mərhum İsrafil Məmmədsoyun oğlu dindirilən zaman qonşuları Namikin uzun illərdir əsassız yerə atası ilə danışmadığını deyib. Bildirib ki, onların qonşu torpaqlarında olan bir ədəd şabalıd ağacına görə mübahisələri olub. Hüquqi varis qeyd edib ki, Namik qonşuları İsrafil və Azərin həmişə paxıllığını çəkib. Buna səbəb isə Azər və İsrafilin övladlarının yaxşı işdə işləməsi imiş.

Məhkəmədə şahidlər də dindirilib. Onlar həm Namik Məmmədovun, həm də mərhumların yaxınları və tanışları olub. Onlar tərəflər arsında söz-söhbətin, küsülülüyün uzun illərdir davam etdiyini təsdiq ediblər.

Namik Məmmədov törətdiyi iki dəhşətli qətlə görə 20 il azadlıqdan məhrum edilib.

Qeyd edək ki, bu maddə ilə N.Məmmədova ömürlük azadlıqdan məhrumetmə cəzası da təyin edilə bilərdi. Lakin məhkəmə onun yaşını da nəzərə alıb.

Musavat.com