Bakıda "VMF Continental" mağazasından 85 min manat dəyərində saat oğurlamaqda təqsirləndirilən Çin Xalq Republikasının vətəndaşları Zhang Guomin və Liu Bo-nun cinayət işləri üzrə məhkəmənin yekun prosesi keçirilib.
Bu gün Bakı Ağır Cimayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə ittiham aktı elan olunub.
Məlum olub ki, təqsirləndirilən şəxslər "VMF Continental"ın Yasamal filialında dəyəri 85 min 28 manat olan "Breguet" markalı saatı görmək üçün satıcı İradə Baramovadan onu vitrindən çıxarmasını xahiş ediblər. Onlar saatın şəklini çəkdikdən sonra Liu Bo satıcının diqqətini yayındıraraq başqa saatı göstərməsini xahiş edib, Zhang Guomin isə saatı oğurlayıb və bununla da təqsirləndirilən şəxslər mağazaya külli miqdarda ziyan vurublar. Bildirilib ki, onlara qarşı sürülmüş ittihamda 5 ildən 10 ilədək azadlıqdan məhrum etmə cəzası nəzərdə tutulub.
Zhang Guomin və Liu Bo elan olunmuş ittihamda özlərini təqsirli biliblər.
Prosesdə ifadə verən Liu Bo bildirib ki, o, ittihamı qəbul etsədə saatı o oğurlamayıb:
"Mən kamera görüntülərini gördüm və oğurluğu qəbul edirəm. Əməlimdən də peşmanam Lakin, saatı mən yox, Zhang Guomin götürüb. Mən ona mağazanın qarşısında əməlin yanlış olduğunu söylədim. O da dedi ki, sadəcə aksesuardır, problem olmaz. Biz saatın bu qədər bahalı olduğunu bilmirdik. Bildirmək istəyirəm ki, VMF şirkətinə dəymiş ziyana görə kompensasiya ödəməyə də hazırıq. Biz ölkəmizə qayıtmaq üçün hava limanında olarkən polis saatı üzərimizdə tapıb. Bakıya gəlmək məqsədimiz isə tranzit ölkə kimi Türkiyədən Çinə getmək olub. Yasamala isə gəzməyə getmişdik. Oranın hara olduğunu belə bilmirdik".
Zhang Guomin ifadəsində bildirib ki, o saatın çox dəyərli olduğunu bilməyib: "Mən saatın bu qədər bahalı olduğunu bilmirdim. Əməlimdən çox peşmanam. Xahiş edirəm mən bağışlayın".
"VMF Continental" şirkətinin hüquqi nümayəndəsi E.Nəsibov bildirib ki, təqsirləndirilən şəxslərdən şikayətçidirlər.
Liu Bo və Zhang Guomin hüquqi nümayəndədən üzr istəyib və xahiş edib ki, onlara kompensasiya verib ölkələrinə qayıtmaq üçün fürsət yaratsınlar: "Bizim hazır ki, vəziyyətimizə görə, hərəmiz 5-10 min dollar arası kompensasiya ödəyə bilərik".
E.Nəsibov rəhbərliklə danışdıqdan sonra münasibət bildirəcəyini söyləyib.
Məhkəmədə ifadə verən şahid, mağazada satıcı çalışan İradə Bayramova bildirib ki, o oğurluğu 10 dəqiqə sonra bilib: "Breguet saatına baxmaq üçün yaxınlaşdılar. Biz proqram vasitəsi ilə Çin dilindən Rus dilinə tərcümə edərək ünsiyyət qurmuşduq. Sadəcə "Breguet" markalı saata baxmaq istəmələrindən anlamışdım ki, onların saatdan anlayışı var. Onlardan Liu Bo bir gün öncədə baxmağa gəlmişdi. Hadisə vaxtı, qutlarında şəkillərini çəkmək üçün qutularına qoymağımı istədilər. İki saatı qutularında kənara qoymağımı və sabah səhər götürəcəklərini dedilər. Mən onlar getdikdən sonra qutuları yoxlayarkən saatlardan birinin olmadığını gördüm və xəbər verdim".
