Türkiyənin Antalya şəhərində keçirilmiş dünya çempionatı zamanı bıçaqlanan Azərbaycan Muay Tay Federasiyasının (AMTF) prezidenti Araz Musayev hazırda müalicəsini qardaş ölkədə davam etdirir. Mayın 28-də baş vermiş hadisə ilə əlaqədar bir qrup şəxs saxlanılaraq, istintaqa cəlb olunub. Araz Musayev Teleqraf-a müsahibəsində olayın necə baş verməsindən, qarşı tərəflə aralarında yaranan münaqişənin səbəblərindən danışıb. Onunla müsahibəni təqdim edirik:
- Hadisənin sifarişçisinin Adil Əliyev olduğunu iddia etmisiniz. Bu, kifayət qədər ciddi ittihamdır. Sübutunuz varmı? O, mediaya müsahibəsində bu iddianın yalan olduğunu, istintaqı çaşdırmaq məqsədi daşıdığını bildirib...
- Azərbaycan Kikboksinq Federasiyasını (AKF) Adil Əliyev idarə edir. 7-8 ay əvvəl AKF Gənclər və İdman Nazirliyinə məktubla müraciət edərək, AMFT-yə iddiasını ortaya qoymuşdu. Bu məqsədlə məni görüşə çağırmışdılar. Onlar mənə belə bir istəyin olduğunu bildirəndə mən "AMTF ictimai birlikdir, rəhbərliyi 4-5 ildə bir dəfə keçirilən seçki yolu ilə müəyyənləşir” formasında etiraz etdim. Adil Əliyevə “siz necə deputat seçilmisinizsə, burada da o formada seçkilər olur", - dedim. O isə deputatlıqla bunu eyniləşdirməməyimi bildirərək “Muay-tay bizim olacaq və bu məsələ də bitəcək" cavabını verdi. Bu söhbət zamanı orada 5-10 nəfər adam var idi. Ondan sonra da belə mübahisələr davam etdi. Falçı deyiləm ki, qabaqcadan məni vuracaqlarına dair məlumat verim. Türkiyəyə yollanmamışdan öncə ölkə rəhbərliyinə və hüquq-mühafizə orqanlarımıza, bir sözlə, hər yerə məlumat vermişdim. Çünki məndə müəyyən məlumatlar var idi. Məni vuranların heç birini tanımıram. O adamları saxlayıblar, içəridədirlər. Adil Əliyevin mənimlə bağlı yazışmaları, səs yazısı, sözatması var. O deyilsə, niyə adı bu olayda çəkilsin ki?! Özü də deyir ki, belə söz-söhbətlərdə niyə adım hallanır?
Mənim düşmənim yoxdur, bundan əvvəl də olmayıb. Digər tərəfdən, bu, adi bıçaqlanma deyil, sui-qəsddir, 100-dən çox ölkənin idmançılarının gözü önündə baş vermiş hadisədir. Mən əminəm ki, onlar ora göndərilmişdilər. Türkiyə polisi onları qısa müddətdə Antalya hava limanında - Rusiyaya qaçmaq istədikləri vaxt yaxaladı. Hamısı bəllidir. Onlar mayın 19-dan məni izləyiblər. Bu, mütəşəkkil cinayətdir. Əks halda, AKF-in vitse-prezidenti Elşən Abdulrəhmanovun, Azərbaycan Uşu Sanda Federasiyasının prezidenti Azər Həsənsoyun burada nə işi vardı?
- Azər Həsənsoy əvvəllər sizin məşqçi-müəlliminiz olub, deyilənə görə. Onunla nəsə probleminiz olub?
- Xeyr, o mənim müəllimim olmayıb. Amma həmişə hər yerdə “müəllim” adından istifadə edib. Yanında cəmi bir il məşğul olmuşam.
- Federasiyanı sizə Azər Həsənsoyun verdiyi bildirilir...
- Federasiya onun atasının malı deyil. AMTF ictimai birlikdir, heç kəsin deyil. Federasiya prezidenti seçki yolu ilə müəyyənləşir. Onun deyil ki, götürüb mənə versin. Hər yerdə o sözü işlədir. Məgər federasiya firma və yaxud şəxsi obyektdir?
- Bəs onun özünün rəhbərlikdən ayrılmasının səbəbi seçkidə uduzması idi, yoxsa özü getmək istədi və bu vəzifə sizə təklif olundu?
- Federasiya yaranan gündən orada vitse-prezident kimi fəaliyyət göstərmişəm. 3 il öncə seçkilər təşkil olunub və mən federasiya prezidenti seçilmişəm. Vitse-prezident olduğum vaxtlarda da prezident kimi fəaliyyət göstərmişəm. Azərin əlində isə az qala 15-20 qurum olub. Mən idmançı kimi aktiv olmuşam. Gənclərə dəstək verərək onları inkişaf etdirmək yönündə də öndə olmuşam. Federasiya kiminsə mülkü deyil ki, mənə hədiyyə etsin. Deyir “Federasiya mənim olub, mən vermişəm”. Mənimsəmənin bir yolu da budur. Federasiya Ədliyyə Nazirliyində qeydiyyatdan keçmiş ictimai birlikdir. 3 ildir ki, federasiyaya rəhbərlik edirəm.
- Sizə qarşı bunu da deyirlər ki, 9 dəfə dünya çempionluğunu harada qazanmısınız? Bunu da açıqlayardınız...
- Onu harada qazanmağımı Adil Əliyevdən soruşun. O bilir. Həmin dövrlərdə o, AKF prezidenti olub. Çoxunu kikboksinq üzrə qazanmışam.
- Böyüklər arasında?
- Bəli. Hansı illərdə qazandığım döyüş növünə, yarışın adına və Adil Əliyevin özünün imzasına qədər Gənclər və İdman Nazirliyində arxivdə var. Mənim 50 yaşım var. Bundan sonra arxivdən nəyisə tapıb kiminsə qabağına qoyan deyiləm. Həmin illərdə Adil Əliyevin təqdimatı ilə cənab Prezidentin qəbulunda olmuş, əməkdar idman ustası adı almışam. Neçə döyüş keçirməyimə qədər qeydiyyata almışdılar.
Nazirliyində rəhmətlik Tofiq Babanlının şöbəsi vardı, o vaxt keçirdiyim döyüşlər sayına qədər qeyd olunub. Bu gün onların adını “hoqqa” qoyur. Sonra dərinə gedəndə “Biz o federasiyaları tanımamışıq” deyir. Sən tanımamısansa, deməli, belə çıxır ki, 20 il ölkə rəhbərliyini aldatmısan?
- Kikboksinq üzrə dünyada tanınan bir təşkilat var - WAKO (Ümumdünya Həvəskar Kikboksinq Təşkilatı - red.). Siz bu təşkilatın versiya üzrə dünya çempionluğu qazanmısınız?
- Yalnız o təşkilat deyil. Dünyada bir çox kikboksinq federasiyası var. Azərbaycan da onların bir neçəsi ilə müqavilə bağlamışdı və nümayəndəsi idi. WAKO-da o dövrdə iştirak edən də mən və Roman Tağıyev olmuşuq. İndiyə qədər Azərbaycanda üçüncü yerə çıxan da yalnız mən olmuşam. Yalnız WAKO adı söylənilirsə, yazın ki, bu versiya üzrə neçə dünya çempionumuz var. Eduard Məmmədov WAKO versiyası üzrə bir ya iki dəfə dünya çempionu olub. Elə isə niyə yazılır ki, 28 dəfə dünya çempionu olub? O zaman yazın ki, kikboksinq əvvəl olmayıb, 2-3 ildir fəaliyyətə başlayıb. O vaxtlar federasiyaların bəziləri bağlandı, bəziləri birləşdi. Bunlar karatedə də, kikboksinqdə də, muay tayda da var. Karate 80, kikboksinq 8 federasiyadan ibarət idi. Sonra birləşdilər və bir federasiya oldu. Biz o zamanlar hər birində sərbəst olaraq döyüşürdük. Azərbaycan nümayəndəliyi olmasaydı, bizi döyüşə buraxmazdılar. Azərbaycandan çıxmaq, səfirlikdən icazə almaq üçün Gənclər və İdman Nazirliyinin xarici əlaqələr şöbəsinin möhürü olmalı idi. Olmasaydı, heç bir yarışda iştirak edə bilməzdik. Türkiyə və digər viza olmayan ölkələrlərdə iştirak edə bilərsən. Amma Avropa ölkələrinin heç birində vizasız mümkün deyil. O yarışlar da İtaliyada, Yunanıstanda və digər şengen zonası ölkələrində olub.
- Hadisəni necə xatırlayırsınız?
- Biabırçı olay kimi xatırlayıram. Burada hər kəs azərbaycanlılara nifrət oxuyurdu. İstər türklər, istər xaricilər – hamısı baş yelləyib, çıxıb gedirdi. Bundan pis nə ola bilər? İki dövlətin nümayəndəsi bir-birini qırır. Kikboksçuları yollayıb burada uduzdururlar, cavan uşaqları döydürürlər. Əlbəttə, qanunsuz bir şeydir.
- Dünya çempionatına AKF də idmançı göndərmişdi?
- Bəli. 10 nəfər idmançı göndərmişdilər. Mən orada onları qanadımın altına aldım.
- Yoxsa yarışa buraxmırdılar?
- Buraxmaya bilərdilər. Mən yaxınlaşmadım ki, cavan uşaqlardır. Gördüm, hər kəs mənə düşmən kimi baxır. Hər biri hazırlaşmışdı. Mənim üstümə gəldilər, çiyin vurdular. Vurulan an da onların idmançısı çiyin vurub məni çölə çıxartdı. Sadəcə, gənc idmançı olduğundan adını verməmişəm. Azərbaycanda istintaqda lazım olarsa, onun da adını verəcəyəm. Videosu var.
- Necə oldu ki, sizi çölə çıxardılar?
- Yarış davam edən müddətdə federasiya prezidenti kimi çəkiliş edirdim. Çəkən zaman Azər Həsənsoy telefonu əlimdən almaq istədi. Dedi ki, rəhbərliyin göstərişi var, kikboksçuları çəkməyim. Mən də "federasiya prezidentiyəm, necə yəni çəkmə?!" cavabını verdim. Sonra məni itələdi. İtələdikdən sonra o biri oğlan yaxınlaşdı ki, məni vursun. Məni bayıra çıxartdı. Çölə çıxandan sonra da başıma bu iş gəldi.
- Videoda da görünür siz kiminləsə söhbət edirsiniz. Yəqin orada mübahisə edirdiniz...
